I. Je Than 19 - Iaai Bible 1901 (New Caledonia)

¹ KE Ahaba ame thumetu Jezebela ge ta je ûnyi hia thithö ame ânyâ ga Elia, me hnen hna hlingâ ta je perofeta hia ge hele vat.

² Me haba Jezebela ame kunâ ûthumetu kö Elia, me ha, ka habe, Ame be je khong ka ânyâ helâe könya me bi hanen minya, oge ne ca ânyâ ânyâm möt me me tha ûcû me möt anyin ke at gadrin, ame ne bong nyi hnyi awa eang.

³ Ke e ame long e, me todrö, me ie kec anyin ae be möt bi, me e ame o hnyi Bere-seba hnyi hnyei Juda, me ip eling athnyabainy.

⁴ Ke e ame he ka hnyi hnyebuba, a khaca bongon ka he; ke e ame o but me laba ju hmelen ûö ratami: ke e ame sumâtâ me me he ka mokcu; haingen, ka habe, Soju; walang ang, Iehova lö, hom dö anyik möt; anyin a iny ca so hon lakamök.

⁵ Ke e ame hlöhlöu me mokut hmelen ûö ratami; ke wâ bi, angela ame bwebwelâ e me ba kâu, ka habe, Todrö me han.

⁶ Ke e ame bwele, me wâ bi, hnyi ban ong areto adre le hon walep, me utköiö. Me e ame han, me ic me hlöhlöu hmetu ju.

⁷ Ke ame olo o angela anyi Iehova me bwebwelâ e, me ha, ka habe, Todrö me han; anyin ae ti sâkâû dem gethen.

⁸ Me e ame todrö me han me ic, me e ame he fâte je bong ke fâte je lit ge troban han eling, ke ne o but hnyi Horeba bucen anyin Khong.

⁹ Ke e ame o but ka hnyi op, me laba eling; ke wâ bi, ame o but kâu hofuc ho Iehova, me e ame ha kâu, ka habe, Elia lö, ieû u me ânyâ ang?

¹⁰ Haingen, ka habe, Inya oge ciâ ga Iehova, Khongon sabaoth; anyin a lakon Isaraela ödrin e hna degecâ ânyâm ûhihinyköu, me hagutâ hnyikânâi ânyâm taben hut, me hlingâ ânyâm je perofeta ge hele vat: ke hake inya thiju kolon; ke ödrin e elâm anyik möt he ka ohia e.

¹¹ Haba e ame ha, ka habe, He thö ka tot hon bucen hnyi hnyimakö Iehova. Ke wâ bi Iehova ame he, ke haba ang ae gan ke hwege ame ohmouca je bucen, me thö je kic hnyi hnyimakö Iehova; ke e biö Iehova hnyin ang: ke hwiöi hwaban ang, ke e hiö Iehova hnyin hwiöi:

¹² ke meic hwaban hwiöi, ke e hiö Iehova hnyin meic: ke haba hwaban meic ke ifucin ae menyik me ûhnyûkong.

¹³ Ke a long ut e Elia me e ame lan hnyimakan ge anyin ûkhaû, me he me tot hnyi hwanumen op. Ke wâ bi ame o but kâu hofuc, ka habe, Elia lö, ieû u me ânyâ ang?

¹⁴ Haingen, ka habe, Inya oge me ciâ ga Iehova Khongon sabaoth; anyin a lakon Isaraela ödrin e hna degecâ ânyâm ûhihinyköu, me hagutâ degecâ ânyâm je taben hut, me hlingâ ânyâm je perofeta ge hele vat; ke haba inya thiju kolon; ke ödrin e elâm anyik möt he ka ohiâ e.

¹⁵ Haba Iehova ame ba kâu, ka habe, He hmetu thö hnyi dem gethen ka hnyi hnyebuba Damaseko: ke u ka o but u me he ka bû Hazaela hnân than Suria:

¹⁶ ke u me he ka hû Jehu nöku Nimesi hnân than Isaraela: ke u me he ka hû Elisaia nöku Safata, ûheny Abela-mehola me perofeta hwabâm.

¹⁷ Ke haba at ame he ka kec ge hele vat anyi Hazaela, me ame he Jehu ka hlingâ: ke haba at ama kec ge hele vat anyi Jehu, me ame he Elisaia ka hlingâ.

¹⁸ Ke so bi oge me he ka hna biju gak hnyi Isaraela seven thauzan tavat adre me ca cibouca kö Baala, me je hnyem hia adre ca ûcimhnyimak më.

¹⁹ Me e ame he ûheny e, me ō Elisaia nöku Safata ame wia kânâ me twelv je ûcû lo li bolok hnyi hnyimakan, kʼ ame tot me at a twelviny: me Elia ame he kâu me khûâ anyin ûkhaû ka hnyi hon.

²⁰ Ke e ame hna li bolok, me wadring hotu Elia, me ha, ka habe, Ö u hnö nya but he ka ûcimhnyimak me cica me bai, mʼ inye he ka he hotom. Ke e ame ha kâu, ka habe, He hmetu thö, ieû oge ânyâ köu?

²¹ Me e ame hmetu ûheny unyin, me hom ûcû lo li bolok, me hlingâ, me thân utioiny ge omjehen li bolok, me ham ka tavat, me ödrin e han. Me e ame todrö me he hotu Elia, me bi athnyabainy.