I. Je Than 18 - Iaai Bible 1901 (New Caledonia)

¹ KE hwaban je bong ae se, ame o but hofuc ho Iehova kö Elia, hnyi huna a kuniny, me ha, ka habe, He thö, ka omanenâ u bi kö Ahaba; ke oge me he ka kunâ we ka hnyi kânâ.

² Ke Elia ame he he ka omanenâ e bi kö Ahaba. Ke e gan hmiâ hnyi Samaria.

³ Ke haba Ahaba ame hao Obadia, at ame tuö hnyaban. (Ke haba Obadia ame ot gan hmâ ga Iehova:

⁴ ke haba hnyi ûen Jezebela ame subâ degecâ je perofeta anyi Iehova, haba Obadia ame hom je perofeta a wan haded, me ikhölʼ ödrin ûsa fifte hnyi li op, me haödrin me habeledrin.)

⁵ Ke Ahaba ame ha kö Obadia, ka habe, Vheno thö hnyei ka hnyi je pupuainy köiö hia, me je wagewe hia: otin e ne he ka wâ hnaonying me hnân omelö je hors me miul, wâ e nye hia but je meno.

⁶ Ke ödru me khenâ hnyei me vheno e: he haba Ahaba ame hake he hnyi ke gethen, ke Obadia ame hake he hnyi ke gethen.

⁷ Ke e tiga e Obadia eû hnyi gethen, me wâ bi, ame ûkhanö më Elia: ke e ame wâhmakhmeto e, me ta hnyikânâi me ha, ka habe, Hawa, u Elia than?

⁸ Ke haingen kâu, ka habe, Inya ang: he thö ka ha ka tuhâm, Wâ bi, wale but ang Elia.

⁹ Ke haingen, ka habe, Ieû anyik hulö, mʼ u me hnö nya a athnyabaem ka hnyi hnyamö Ahaba he ka hlingö nya?

¹⁰ Kia inya Iehova Khongom, ae ba hnyei me dökhu, wale a ca ûkhûnöng than ka hnyin he ka elöm u: ke ödrin e ha, ka habe. E hia, me e ame khemanyin me dökhu me hnyei, a ödrin e ca ō u hnyin.

¹¹ Ke walang ang u me ha, ka habe, He thö ka ha ka tuhâm, ka habe, Wâ bi, walang Elia.

¹² Ke oge me ne he eâu ka he gam, me ame he Hanu Iehova ka hum u ka hnyi dok ae ca khanö nya; ke iny ka he but me thumetu Ahaba, ke e ame ca ō u, me e ame he bi ka hlingö nya: ke inya athnyabaem oge me outö Iehova hwân kʼ iny tiga wanakat.

¹³ Hawa, a ca thumetu u than waleji ge hnok hna ânyâ hnyi ûen ame hlingâ je perofeta anyi Iehova ga Jezebela, a oge me ikhâlâ ta je perofeta anyi Iehova a wan haded, ûsa fifte hnyi li op, me haödrin, me habelidrin?

¹⁴ Ke walang ang u me ha, ka habe, He thö ka ha ka tuhâm, ka habe, Wâ bi, walang Elia: me e ame he ka hlingö nya.

¹⁵ Me haingö Elia, ka habe, Kia inya Iehova tuhan sabaoth, a at oge me tot hnyi hnyimakan, a oge me he ju ka omanenö nya kau hnyi bong ang.

¹⁶ Me ame he Obadia ka ûkhanö me Ahaba, me thumeto e: me ame he Ahaba he ka ûkhanö me Elia.

¹⁷ Me Ahaba ame ō Elia, me haba Ahaba ame ha kâu, ka habe, Awe, u bi; a u at ame omonoâ at Isaraela?

¹⁸ Ke e ame thu, ka habe, Oge me ca omonoâ at Isaraela, ke so bi ûnyi gam me lap anyin kâmâm, waleji hnyi hnobun hna hna degecâ je hnanyibu anyi Iehova me hnu hoton bi je Baala.

¹⁹ Ke haba walang ang u me he ka ûkhûnöng me ûkhacaköuâ könya at Isaraela hia ka hnyi bucen Karemela, me je perofeta anyi Baala a foa haded ke fifte, me je perofeta anyi Aseira a ödrin foa haded a hnyat adre me hnyi han hnyi laulau anyi Jezabela.

²⁰ Me Ahaba ame ûkhûnöng ka lakon Isaraela hia, me ûkhacaköuâ je perofeta ka hnyi bucen Karemela.

²¹ Ke haba Elia ame hakekeny ka tavat hia, me ha, ka habe, Ke ne o but kehö öbun e he ka lolo hnyi li hna ûnykûme a lo? Ame ne Khong Iehova, awe hnu thö e: ke ame ne Baala, awe hnu e bi. Ke ame ca thu kâu tavat ge hofuc a khaca.

²² Ke haba Elia ame ha ka tavat, ka habe, Inya thiju kolon ta je perofeta anyi Iehova; ke haba je perofeta anyi Baala, me ödrin foa haded ke fifte tavat.

²³ Anyin a wale hamödrin he ka ham kohmun lo li bolok; me ödrin e he ka ûca ke bolok hnân hobi ködrin, me susubâ, me ip e hon je utö, ke adre me ca he ka vâc: ke oge me he bi nya ka penapena ke bolok, me ip e hon je utö, ke adre me ca he bi ka vâc.

²⁴ Ke öbun e he ka hawâ ien khongubun, ke oge me he bi nya ka hawâ iö Iehova: ke haba Khong at ame he ka thu ge meie, me wale thibi Khong. Haba tavat hia thithö adre me thu, ka habe, E so hna ha e.

²⁵ Ke haba Elia ame ha ka je perofeta anyi Baala, ka habe, Ûca thö ke bolok hobi köbun, me penapena ama böbun; anyin a öbun se hia; ke hawâ thö ien khongubun, ke so bi ca he ka vâc.

²⁶ Ke ödrin e hom bolok adre ham ködrin, me penapena, me hawâ iö Baala hwân hnyi hnyomakatu ke ne o but jebigö, me ha, ka habe, Baala lö, long ju kohmun. Ke ba hwan, me ba at ame thu. Me ödrin e gâ hon taben hut adre hia but ânyâ.

²⁷ Ke haba hnyi jebigö Elia ame hlumʼ ödrin me ha ködrin, ka habe, Hongot hwege thö: anyin a e khong; ame ne hu ûnykûmânen e, ke ame ne saû, ke ame ne he but, ke ame ne mokut, me so he ka ohmâkâ.

²⁸ Ke ödrin e hongot hwege me ve kavi ödrin bi helâ me hwakecidrin ge je hele, me je ō, ke ne o but ame hingölö drödrin hudrin bi.

²⁹ Ke ame haû but seûno ödrin e perofeta ke ne o but adre me hudo hut hnyi sahac; ke ba hwan, ke ba at hnân thu, ke ba at ame long.

³⁰ Haba Elia ame ha ka tavat hia thithö, ka habe, Hakekeny dö könya; me ame hakekeny kâu tavat hia thithö. Ke e ame ânyâwia taben hut anyi Iehova adre hagutâ hnyikânâi.

³¹ Haba Elia ame hom je veto a twelv hoton je tribuiny laku Jekob, me wale ame o hofuc ho Iehova kâu, ka habe, adre me he ka hwenyi iâm tue Isaraela.

³² Haba e ame khon je veto hnân taben hut hnyi iö Iehova; ke e ame biny thop igigilö taben hut, haba kahmen thop wale ae ûcû ka ip eû hnyin lo li sea hwit.

³³ Me e ame ip gaga uto, me susubâ bolok, me ip bon utö. Ke e ame ha, ka habe, Öunöngötâ thö vak ta kask ge köiö, me hingâlâ hon hudiny leû, me hon ûtoiny.

³⁴ Ke e ame ha, ka haba, Ânyâ hmetu ju, me ödrin e olo ânyâ. Ke e ame ha, ka habe, Ânyâ hmetu ju; me ödrin e okun ânyâ.

³⁵ Ke ame di köiö igigilö taben hut; ke e ame öunöngötâ minya thop ge köiö.

³⁶ Ke haba hnyi ûen hudo hudiny sahac, haba Elia perofeta ame hakekeny me ha, ka habe, Iehova lö, Khongu Aberahama, me Isaaka, me Isaraela, omanenâ thö hnyi bong ang a u Khongu Isaraela, me inya ang athnyabaem, me oge hia but ânyâ ta je ûnyi hia thithö ang ûnyi hnyi hofuc a hwâm.

³⁷ Long ju könya Iehova, long ju könya, me me wâhmakhmeto tavat ang a u Iehova Khong, me u je ohmeto hnyekudrin.

³⁸ Me ame kolu but meic hlögu Iehova, me thong hudiny leû, me je utö me veto, me kânâ, me ame cem degecâ minya köiö hnyi thop.

³⁹ Ke ame wâ e hnen tavat, me ödrin e ta hnyikânâi, me ha, ka habe, Iehova, Khong.

⁴⁰ Me haba Elia ame ha, ka habe, Kât ju je perofeta anyi Baala, ca hna ke at a khaca he ka kec. Me ödrin e kot ödrin; ke Elia ame hum ödrin ka hnyi wagewe Kisona, me hlingʼ ödrin eling.

⁴¹ Me Elia ame ha kö Ahaba, ka habe, Todrö, han ju me ic; anyin ae hu hwan we ae gan.

⁴² Me Ahaba ame he me han me ic. Ke Elia ame ölö ka hnyi ban Karemela; ke e ame ta ju hnyikânâi, me hnyimakan ka hnyi li boucan.

⁴³ Ke e ame ha ka athnyabainy, ka habe, Ölö thö walang ang, me bwele ka hnyi köiö. Me e ame ölö, me wâ, me ha, ka habe, E ba ûnyi, He thö hmetu ke ne o but ka hnyi seven ta ûhem.

⁴⁴ Ke haba hnyi ûen a seveniny e ame ha, ka habe, Wâ bi ame o thö ûheny û hnyi köiö ûlâ ae ûhnyûkong helâ me hnyamen at. Ke haingen, ka habe, He thö ka ha kö Ahaba, ka habe, Penapena thö ânyâm kariota, me he ju me me ca ovheli u bi we.

⁴⁵ Me ame ie khömet ut drany ge je ûlâ me ang, ke gan hmâ we. Ke haba Ahaba ame tabâ anyin kariota me he Jezerela ai.

⁴⁶ Ke e unyi Elia hnyamen Khong; me e ame oweikâ hnyekon, me wâdring hnyi hnyimakö Ahaba ke ne o but hnyi homagouleny Jezerela.