I. Je Than 17 - Iaai Bible 1901 (New Caledonia)

¹ KE haba Elia at Tisebi, hanen tavat adre me laba hnyi Gileada, ame ha kö Ahaba, ka habe, Kia inya Iehova, Khongu Isaraela, wale oge me tot hnyi hnyimakan, a ame he ka ba hau, me we hnyi je huna, ke so bi hoton hok hofuc.

² Ke ame o but hofuc ho Iehova kâu, ka habe,

³ He thö eang, me he jio, me lubaduöng hnyi wagewe Kerith, cicö Joridano.

⁴ Ke u me he ka ijem wagewe, ke oge hia but hûna je oreba he ka hâm.

⁵ Ke e ame he me ânyâ hoton hofuc ho Iehova: anyin a e ame he me laba hnyi wagewe Kerith, cicö Joridano.

⁶ Ke haba je oreba ame hom kâu areto me utiö hnyi je hnyomakatu, me areto me utiö hnyi je sahac; ke e ame ijem wagewe.

⁷ Ke haba hwaban ta je bong, ame hme thö wagewe, anyin ae ba we hnyi hnyei.

⁸ Ke ame o but hofuc ho Iehova kâu, ka habe,

⁹ Todrö, he thö Sarepeta ai, hnyi Sidona, me laba ju eling: wâ bi oge hia but ha ka safac eling he ka hâm.

¹⁰ Me e ame todrö me he Sarepeta ai; ke e ame o hnyi homagouleny taun, me wâ bi ame thigö eling safac: ke e ame hawâ momo, me ha kâu, ka habe, Ö u he thö ka hom tap köiö belik, me inye he ka ic.

¹¹ Ke ame he momo ka hom, me e ame hongot ka momo, ka habe, Ö u hom minya thö könya ong areto ae ûhnyûkong hnyi hnyamâm.

¹² Me ame thu momo, ka habe, Kia inya Iehova Khongom, ae ba ong arete unyik, ke khaca thibi hna auk falawa hnyi taben, me ong wakaco hnyi kaia: ke wâ bi, oge me thigâ li ong utö, me inye he ka didro me le hobi könya me nokuk, mʼohmu me an dö kʼ ohmu mokcu.

¹³ Haba Elia ame ha kâu, ka habe, Ca ot; he thö ka ânyâ helâ me hnâm hna ha: ke me bâm ka ânyâ hobi könya ke ong areto, me hom könya, ke hwaban dö e, me u me he ka ânyâ hnân hobi köbu bi a liamokon.

¹⁴ Ke walang hna ha bnö Iehova Khongu Isaraela, ka habe, Ame ca he ka aû tap falawa, ke ame ca he ka hme tap wakaco, ke ne o but ka hnyi bong ame he Iehova ka kunâ we ka hnyi hon kânâ.

¹⁵ Me ame he momo me ânyâ hoton hofuc ho Elia: me haba momo, me e, me lap anyin momo ödrin e han hnyi je bong ae se hia.

¹⁶ Kʼ ame ca aû bi tap falawa, kʼ ame ca hme tap wakaco, helâ me hofuc ho Iehova, wale e ame ha deny Elia.

¹⁷ Ke hwaban ta je ûnyi eling, me hu mok ge nokon momo at a umen uma; ke e ti gan hmâ imekiny, kʼ ame ca menâ hmetu bi.

¹⁸ Me haba momo ame ha kö Elia, ka habe, Aten Khong lö, ieû gak köu? u je o könya he ka oûnykûmi nya ge anyik hulö, me he ka hlingâ nokuk!

¹⁹ Ke haingen ka momo, ka habe, Hom but jem könya nokom. Me e ame kap ûnyi hnyi ûlainy momo, me oliâ e ka hnyi hnyeule wale e ame laba hnyin, me ip ju hon hnen hna mokut.

²⁰ Me e ame hongot kö Iehova me ha, ka habe, Iehova lö a Khonguk, hawa, u je oâ monu minya hon safac wale at oge me laba unyin, he ka hlingâ nokon?

²¹ Me e ame okun mokut hon wanakat me hongot kö Iehova, me ha, ka habe, Iehova lö, a Khonguk, ō u ohmeto ju hanon wanakat ang kâu.

²² Ke Iehova ame long hofuc ho Elia, me ame hmetu bi hanon wanakat kâu, me e ame möt dö.

²³ Haba Elia ame hom wanakat me oliâ hmeto e ûnyi hnyi hnyeule ka hnyi uma, me ham e ka hinyen: ke Elia ame ha, ka habe, Wâ bi a möt ut nokom.

²⁴ Ke haingen momo kö Elia, ka habe, Walang e khanö nya a u aten Khong, ke e hnathu hofuc ho Iehova hnyi hnyimâm.