I. Je Than 15 - Iaai Bible 1901 (New Caledonia)

¹ KE haba hnyi huna a eitininy musi anyi Jeroboama nöku Nebata me ame hwân Abiama he ka musi hnyi Juda.

² E ame musi hnyi Jerusalema hnyi kun ta huna: ke haba ien hinyen, me, Maaka, momo nöku Abisaloma.

³ Ke e ame vheno ta je hwakecin hia ae kong anyin kamen, waleji e ame ânyâ ehac: ke ame ca bekhot ut hnyekon kö Iehova a Khongon, helâ me hnyeku Davita a kiben.

⁴ Ke so bi haba Iehova Khongon ame ham kâû lamepa hnyi Jerusalema, ga Davita, he ka otilâ nokon hwaban, me he ka otilâ hmâ Jerusalema:

⁵ anyin a haba Davita ame ânyâ ûnyi ae wisa hnyi hnyimakö Iehova, me ca saû ûnyi hnyi ta je ûnyi hia e ame hûna kâu hnyi bongon ta je bong hia, ke so bi hwakecin thibi ga Uria at Heth.

⁶ Ke ame labö vat Reoboama me Jeroboama hnyi bongon ta je bong hia.

⁷ Ke haba kolon je hna ânyâ hnö Abiama, me anyin ta je huliwa, hawa, adre me ca sihnalimen hnyi tuâ hnân ba je bong bongon je than Juda? Ke ame labö vat Abiama me Jeroboama.

⁸ Ke ame mokut ut Abiama tha e me lakamen; me ödrin e konâm e hnyi taun anyi Davita: ke ame than biju Asa a nokon hwaban.

⁹ Ke haba hnyi huna a twenteiny musi a Jeroboama, than Isaraela, me haba Asa ame hwân ka musi hnyi Juda.

¹⁰ Ke fâte wan je hunainy ka musi hnyi Jerusalema: ke haba ien hinyen, me, Maaka nöku Abisaloma.

¹¹ Ke haba Asa ame ânyâ wisa hnyi hnyimakö Iehova helâ me Davita a kiben.

¹² Ke e ame ohia tavat adre me hwen Sodoma ûnyi hnyi hnyei, me hom hia je idola wale a ânyâ lakamen.

¹³ Ke e ame digic Maaka minya a hinyen, me me ca momo than hmetu, anyin a e ame theati Aseira; ke haba Asa ame sö degecâ idola anyin momo, me thong degecâ hnyi wagewe Kederon.

¹⁴ Ke adre ca ohia je dok ae görany: ke so bi e bekhot ut hnyeku Asa nnyi Iehova hnyi bongon ta je bong hia.

¹⁵ Ke e ame hom ka hnyi uma umo Iehova je unyi a okabâ kamen, me je ûnyi a ka okabâ bi e, sileva, me gol, me je kaia.

¹⁶ Ke ame labö vat Asa me Baasa than Isaraela hnyi bongudru ta je bong hia.

¹⁷ Ke haba Baasa than Isaraela ame he Juda ai ka vat, me op Rama, me me ca hna ke at he ka didrut me didro kö Asa than Juda.

¹⁸ Ke haba Asa ame hom sileva me gol hia kolon je omjeû hnyi uma umö Iehova, me je omjeûiny uma umen than, me hna ka hnyi hnyamen lathnyabainy: ke haba Asa than ame kunʼ ödrin mê kö Ben-adada nöku Taberimona, nöku Heziona, than Suria, at ame laba hnyi Damaseko, me ha, ka habe,

¹⁹ E hu hnötu hna ûhihinyköu, wanbö cica me kâmâm: wa bi, inya oge me kunâ köu bwihlany aleva me gol; he thö ka subâ degecâ ânyâm ûhihinyköu me Baasa than Isaraela, me me he but ûnyi gak.

²⁰ Ke haba Ben-adada ame ling Asa than, me kunâ je taben ʼnym je deo vat he ka tot ka je tauni Isaraela, me kot Ijon, me Dana, me Abela-bethe-maaka, me Kinereth hia, me hnyei Nafatali hia.

²¹ Ka long ut Baasa, me e ûne hna ju op Rama, me e ame laba hnyi Tireza.

²² Ke hnyi ûen e haba Asa than ame hûna manenâ kö Juda hia thithö; a e ba at ame be ka laba baû: ke ödrin e hom degecâ je vetoiny Rama, me utöiny, waleji a op Baasa; ke haba Asa than ame hom ta je ûnyi e he ka op Geba hnyi Beniamina, me Mizepa.

²³ Ke haba kolon je hna ânyâ hia hnö Asa, me hwegien hia, me anyin ta je huliwa, me je taun e ame op, hawa, adre ca sihnalimen hnyi tusi hnân ha je bong bongon je than Juda? Ke hnyi anyin hingat, me ame tabâ li can mok.

²⁴ Ke ame mokut ut Asa tha e me lakamen, ke adre me konâm e tha e me lakamen hnyi taun anyi Davita a kiben: ke ame than biju Jehosafata a nokon hwaban.

²⁵ Ke haba hnyi hunai Asa a loiny than Juda, me ame hwân he ka musi hon Isaraela Nadaba nöku Jeroboama, ke e ame musi hon Isaraela lo li huna.

²⁶ Ke e ame ânyâ monu hnyi hnyimakö Iehova, me vheno gethen deny kamen, me anyin hulö, wale ûnyi ame okûâ hwakecin ae kong hnyi Isaraela.

²⁷ Ke haba Baasa nöku Ahia hanen lap anyi Isakara ame sihnân: me Baasa ame kot e hnyi Gibethon anyin at Filisiti; anyin a Nadaba me Isaraela hia ame thelöng Gibethon.

²⁸ Ke haba Baasa ame hlingâ e hnyi huna a kuni Asa than Juda, me e ame than hwaban.

²⁹ Ke e than dut, me e ame ie hlingâ lap hia anyi Jeroboama; e ame ca hna but ga Jeroboama ke at he ka möt ke ne o but e ame hlingâ; hoton hofuc ho Iehova waleji e ame ha a deny Ahia athnyabainy a at Silo:

³⁰ can je hulö anyi Jeroboama waleji e ame ânyâ, wale ame okûâ hwakecin ae kong hnyi Isaraela; me can anyin monu wale ame okûâ hmonyin anyi Iehova Khongu Isaraela.

³¹ Ke haba kolon je hna ânyâ hnö Nadaba, me anyin ta je huliwa hia, hawa, adre ca sihnalimen hnyi tusi hnân ha je bong bongon je than Isaraela?

³² Ke ame labö vat Asa me Baasa than Isaraela hnyi bongudru ta je bong hia.

³³ Ke haba hnyi huna a kuni Asa than Juda, me ame hwân Baasa nöku Ahia ka musi hon Isaraela hia hnyi Tireza ke ne o but hnyi twente foa je huna.

³⁴ Ke e ame ânyâ hwakecin ae kong hnyi hnyimakö Iehova, me vheno gethen de Jeroboama, me anyin monu, waleji ame okûâ hwakecin ae kong hnyi Isaraela.