I. Je Than 14 - Iaai Bible 1901 (New Caledonia)

¹ KE haba hnyi ûen eling e mok Abia nöku Jeroboama,

² Me Jeroboama ame ha ka âiân, ka habe, Ö u todrö, ke oiyongi u bi, me me ca manen a u öiö Jeroboama: ke he thö Silo ai; wâ bi, eling Ahia perofeta, at ame ha könya a oge me he ka thaniny hnyei ang.

³ Ke hom dö hnyi hnyamâm je areto a ten, me je ong areto ae balelöû, me tap hani, me he thö kâu: me e ame he ka thumetu u ge ûnyi ame be ka o ka wanakat.

⁴ Ke ame ânyâ helâe öiö Jeroboama, me e ame tot me he Silo ai, me o ka hnyi uma umö Ahia. Ke ca khanö Ahia but bwele, anyin ae hâe but li emakan anyin a hingat ut.

⁵ Ke haba Iehova ame ha kö Ahia, ka habe, Wâ bi, öiö Jeroboama ame he jem he ka hnö ûnyi gam ge nokon; anyin a e mok: u me he ka ba helang me helang kâu; anyin a e ka didro; me e ame he ka bi ke at.

⁶ Ke a long ut Ahia hwan li can momo ame dit hnyi hwanuma, me e ame ha, ka habe, Didro, öiö Jeroboama; ieû gam u me iyâwâ me bi ke at? anyin adre me kunö nya me ûthumetu ae ûnyi hnathu köu.

⁷ He thö ka ha kö Jeroboama, ka habe, Walang hna ha hnö Iehova Khongu Isaraela, ka habe, Oge me oganö u hnyi wanben tavat, me ûco u hnân thaniny hnyei Isaraela,

⁸ me kia luâ dökhu ûnyi hnyi lap anyi Davita, me ham e köu: ke haba u ca ûcû me Davita athnyabaik, at ame tuö hnok je hna hûna me vheno hotuk hia ge hnyekon a khaca, he ka ânyâ thibi wisa hnyi hnyimakök;

⁹ ke u je hia but ânyâ hulö ae gan hon lakâmâm, me he me ânyâ hobi köu bi je khong monu, me je hnatheat adre me oköiâ, he ka ohmönyini nya, ke u je digic nya bi hotom ai:

¹⁰ anyin a wale, wâ bi, oge me he ka okûâ ûnyi ae kong ka lap anyi Jeroboama, ke oge me he ka subâ degecâ ga Jeroboama obaga hia, a hnyat adre ca, me hnyat adre hna hnyi Isaraela, ke oge me he ka aba degecâ lap anyi Jeroboama, helâ me man at ame aba degecâ tet, ke ne o but ame ba but.

¹¹ Haba atö Jeroboama ame ne he ka mok hnyi taun, me ame he je kuli ka an; ke haba at ame he ka mok hnyi hnyei, me ame he je meno ame gâ ka an: anyin a hia but Iehova ha.

¹² Anyin a wale todrö u, me he thö ka hnyi hnyabam: ke u ka utö thö taun, haba wanakat ame he ka mokcu.

¹³ Ke ame he ka tenge gan Isaraela hia, me konâm e; anyin a e thibi hanö Jeroboama ame he ka o ka hnyi erkemok: anyin adre wâ unyin ûnyi ae so kö Iehova Khongu Isaraela hnyi lap anyi Jeroboama.

¹⁴ Ke ame he Iehova ka oâ hobi kâu bi than hon Isaraela, at ame he ka subâ degecâ lap anyi Jeroboama hnyi bong eling: ke ne hö? walang ang.

¹⁵ Anyin ame he Iehova ka kot Isaraela helâ me hna jijingâ sa hlowe hnyi an; ke e ame he ka oc me wân Isaraela ûnyi hnyi hnyei ang ae so, waleji e ame ham ka je lakam-ödrin, me ovesei ödrin ka hnyi ke keihen hoton Wagewe; anyin a ödrin e hia but theati Aseira, me okûâ hmonyin anyi Iehova.

¹⁶ Ke e ame he ka hna degeci Isaraela can je hulö anyi Jeroboama, wale e ame ânyâ, me at ame okûâ je hulö kö Isaraela.

¹⁷ Me ame todrö öiö Jeroboama, me he, me o hnyi Tireza: kʼ ame o thö hnyi hwanumen uma, me ame mokcu wanakat.

¹⁸ Ke haba Isaraela hia ödrin e konâm e, me tenge gan; hoton hofuc ho Iehova, waleji a ha a deny Ahia perofeta athnyabainy.

¹⁹ Haba kolon je hna ânyâ hnö Jeroboama, wale hwakecin anyin vat, me musi, wâ bi adre hia but sihnalimen hnyi tusi hnân ha je bong bongon je than hnyi Isaraela.

²⁰ Ke haba je bonginy musi anyi Jeroboama, me twente tu je huna: ke e ame tha mokut me lakamen, ke Nadaba bi a nokon ame musi hwaban.

²¹ Ke haba Reoboama nöku Solomona ame musi hnyi Juda. Fâte wan je hunai Reoboama hnyi ûen e ame hwân ka musi, ke e ame musi seventin je huna hnyi Jerusalema, wale taun ame ûca Iehova hnyi je tribu hia anyi Isaraela he ka ip ien hnyin: ke haba ien hinyen, jia Naama momo Amona.

²² Ke haba at Juda ame ânyâ hwakecin ae kong hnyi hnyimakö Iehova; ke ödrin e ociâ gan hmâ e hon hna ânyâ hnen lakamödrin, hnyi ta je monu hia ödrin e ânyâ.

²³ Ke ödrin e ânyâ minya hobi ködrin je dok ae görany, me je veto ame tot, me je Aseira, hon je dok ae hut hia, me hmelen je ûö ae hât hia thithö;

²⁴ ke e hu minya hnyi hnyei tavat adre me hwen Sodoma: ödrin e ânyâ hia hoton je hwakecin ae ikiki anyin je hnyei a obâ ga Iehova hnyi hnyimakan lakon Isaraela.

²⁵ Ke haba hnyi huna a thabûngi Reoboama, me ame o but Sisaka than Aigupito he ka vat hnyi Jerusalema:

²⁶ ke e ame hom ta omjeûiny uma umo Iehova, me omjeûiny uma umen than; e ame hûgûnâ hia: ke e ame hom hia je bec gol a ânyâ Solomona.

²⁷ Me Reoboama than ame ânyâ je bec bras me hwaban je bec eling, me hna ka taben tavat tue, a hnyat tuö hwanumen uma umen than.

²⁸ Ke ame ne dit than ka hnyi uma umo Iehova, me ame ve hom hnen tavat tue, me odilâ hmeto ka hnyi hnyeuleiny tavat tue.

²⁹ Ke haba kolon je hna ânyâ hnö Reoboama, me anyin ta je huliwa, hawa, adre me ca sihnalimen hnyi tusi hnân ha je bong bongon je than Juda?

³⁰ Ke ame labö vat Reoboama me Jeroboama hnyi ta ogo bong hia thithö.

³¹ Ke ame mokut ut Reoboama tha e me lakamen, me adre me tha konâm e me lakamen hnyi taun anyi Davita: ke haba ien hinyen, me, Naama momo Amona. Ke ame than biju Abiama a nokon hwaban.