I. Je Than 13 - Iaai Bible 1901 (New Caledonia)

¹ KE wâ bi, ame o but hnyi Beth-ela ke aten Khong ûheny Juda ge hofuc ho Iehova: ke Jeroboama ame tot hnyi taben hut he ka Ieû uto ae bo so.

² Ke e ame hongot ka hnyi taben hut ge hofuc ho Iehova, me ha, ka habe, Taben hut, taben hut lö, walang hna ha hnö Iehova, Wâ bi, adre me he ka hnokoâ wanakat ka hnyi lap anyi Davita, Josea ien; ke e ame he ka hudo hom je hnyat bihut hnyi je dok ae görany, tavat ödrin e leû uto ae bo so hom, ke ödrin e he ka le hom je jeien at.

³ Ke e ame bi haten hnyi bong eling, me ha, ka habe, Walang haten ame ha Iehova: Wâ bi, ame he ka hmouca taben hut, me hingölö je dröu ûnyi hnyi hon.

⁴ Ka löng ut than hofuc hwan aten Khong, wale e ame ba ka hnyi taben hut hnyi Bethela, me haba Jeroboama ame inâ hnyamen, ûnyi hnyi hon taben hut, me ha, ka habe, Kât ju e. Me ame meleca hnyamen wale e ame inâ kâu, me me ca khana bi he ka oc hmetu kâu bi.

⁵ Ke ame hmouca but minya taben hut, me hingölö but je dröu ûnyi hnyiʼhon, helâ me haten ame ha aten Khong ûnyi ge hofuc ho Iehova.

⁶ Haba than ame thu me ha ka aten Khong, ka habe, Ö u khöû thö kö Iehova Khongom walang ang, me hic hobi könya, me me so hmetu but hnyamok. Me haba aten Khong ame khöû kö Iehova, me me so hmetu hnyamen than helâ me eja.

⁷ Ke haba than ame ha ka aten Khong, ka habe, Ötu he ka hnyi hnyabak, mʼ u me menâ, me oge me he ka ham köu hwaban.

⁸ Ke haingen aten Khong ka than, ka habe, U je ne ham könya hafiny umâm uma, oge me ca he ka tha dit möu, ke haba khaca, oge me ca he ka han areto me ic köiö hnyi dok ang:

⁹ anyin a helâe hna hûna könya hofuc ho Iehova, ka habe, U me ca he ka han areto me ijem köiö, ke u me ca he ka vheno hmetu dem gethen.

¹⁰ Me e ame hmetu hnyi ke gethen, kʼ ame ca he hnyi gethen e ame o hnyin Beth-ela ai.

¹¹ Ke ame laba hnyi Beth-ela ke perofeta a hingat; ke ame o but ke nokon me thumeto e ge ta je ûnyi hia ame ânyâ aten Khong hnyi bong eling hnyi Beth-ela: kʼ ödrin e thumeto minya kamödrin ge ta je hofuc e ame ha ka than.

¹² Haba kamödrin ame ha ködrin, ka habe, A he ua? Ke haba lakon ödrin e wâ gethen a vheno aten Khong at ame o ûheny Juda.

¹³ Me haingen ka lakon, ka habe, Hûkâlâ ju taben hon asina. Me ödrin e hûkâlâ taben hon asina: me e ame tabâ.

¹⁴ Ke e ame he hoton aten Khong me khaû ju e, a ga laba hmelen iwajo: ke e ame ha kâu, ka habe, U aten Khong waleji a o ûheny Juda? Me haingen, ka habe, Inya.

¹⁵ Me e ame ha kâu, ka habe, Ötu he ka hnyi hnyabak ka me han.

¹⁶ Ke haingen, ka habe, E ca khanö nya he ka tha hmetu möu: ke oge me ca he ka tha han me tha ic möu hnyi dok ang:

¹⁷ anyin a ha könya hofuc ho Iehova, ka habe, U me ca he ka han areto me ic köiö eling, ke u me ca he ka vheno hmetu gethen u je o hnyin.

¹⁸ Ke haingen kâu, ka habe, Inya ang ke perofeta helâ möu; ke haba angela ame ha könya hnyi hofuc ho Iehova, ka habe, Ohmeto ju e ka hnyi umâm uma, me me han areto me ijem köiö. Ke e ame thoi kâu.

¹⁹ Me e ame tha hmetu më, me e ame ban areto me ijem, köiö.

²⁰ Ke ödru me tiga laba hnyi laulau, me ame o hofuc ho Iehova ka perofeta, at ame ohmeto e:

²¹ me e ame hongot ka aten Khong at ame o ûheny Juda, me ha, ka habe, Walang hofuc ame ha Iehova, ka habe, Can anyin a u je hia but hanyâûâ hofuc ho Iehova, me ca long bi hna hûna, waleji a hûna köu Iehova Khongom,

²² ke u je hmetu, me han areto me ijem köiö hnyi dok waleji e ame hûna köu, ka habe, ca he bi ka han areto, me ijem köiö; anyin a wale ame ca he ka o unyâm ka hnyi erkemok anyin lakâmâm.

²³ Ke a hia but han areto, ke a hia but ic, me e ame hûkâlâ taben hon asina hobi kâu, waleji perofeta e ame ohmeto.

²⁴ Kʼ ame he but, me ame ûkhanö më liona eû hnyi gethen, me hlingâ e; ke adre khûâ eû hnyi gethen unyin a mokcu, ke ame tot asina hakekenyâ e; ke liona minya ame tot hakekenyâ komok.

²⁵ Ke wâ bi ame he eû hnyi gethen tavat, me wâ komok adre khûâ eû hnyi gethen, me liona ame tot hakekenyâ komok: ke ödrin e o me ûthumetu hnyi taun waleji ame laba hnyin perofeta hingat.

²⁶ Ke a long ut perofeta at ame ohmeto e ûheny û hnyi gethen, me e ame ha, ka habe, Wale aten Khong at ame hanyâûâ hofuc ho Iehova: anyin a wale a hia but Iehova hna e ka liona, me ame kia me hlingâ e, hoton hofuc ho Iehova waleji e ame ha kâu.

²⁷ Haba e ame ha ka lakon, ka habe, Hûkâlâ ju taben hon asina hobi könya. Me ödrin e hûkâlâ.

²⁸ Me e ame he me wâ komok adre khûâ eû hnyi gethen, me asina me liona ödru me tha tot hakekenyâ komok: haba liona ame ca an komok, kʼ ame ca kia minya asina.

²⁹ Haba perofeta ame hom unyin aten Khong me ip hon asina, me hmeto: ke e ame o ka hnyi taun anyin perofeta hingat, he ka tenge, me konâm e.

³⁰ Ke e ame ip unyin hnyi anyin bi erkemok; ke ödrin e tenge gan me ha, ka habe, E köiö ge keik!

³¹ Ka hia but konâm e, me e ame ha ka lakon, ka habe, Iny ka mokcu öbun e he ka konim nya hnyi erkemok hon aten Khong; ip ju je jeiök hnyi je jeien.

³² Anyin ame he ka hwâdâ hofuc waleji e ame hongot ge hofuc ho Iehova ka hnyi taben hut hnyi Beth-ela, me hon je uma hia hnyi je dok ae görany hnyi je taun hnyi Samaria.

³³ Hwaban ûnyi eling haba Jeroboama ame ca hmetu ûnyi hnyi hwakecin bi ae kong, ke e ame otilâ hmeto je hnyat bihut anyin je dok ae görany ûnyi hnyi wanben tavat: ame ne weny ke at, e ame okabâ e, me me he ka hu je at bihut hnân je dok ae görany.

³⁴ Ke haba ûnyi eling ame okûâ hulö ka lap anyi Jeroboama, wale he ka subâ degecâ e me ohia e eang hmeledrany.