I. Ioane 5 - Iaai Bible 1901 (New Caledonia)

¹ ADRE hnokoâ ûnyi ge Khong hnyat adre me kap, ka habe, Iesu thibi Keriso: ke haba at ame hnyokâ at a hnokoâ, me ame he ka hnyokâ minya at e ame hnokoâ.

² Hnen thibi ang e manen köta a gʼ ate me betenge ka lakon Khong, anyin ate me hnyokâ Khong kʼ ate me löng hoton anyin ta je hnanyibu.

³ Haba hnyok ka Khong, me wale thibi ang, a gʼ ate me löng hoton anyin ta je hnanyibu: e ca hmak anyin ta je hnanyibu.

⁴ Anyin ame hwege hon hmeledrany ûnyi a hnokoâ ge Khong: ke walang hwege ae hwege hon hmeledrany, wale anyita labageju.

⁵ Anyin a ie at ae hwege hon hmeledrany, hawa ca at bi ame kap a Nokon Khong thibi Iesu Keriso?

⁶ E thibi at eji ame o hnyi köiö me dra, Iesu Keriso; ca hake hnyi köiö, ke köiö me dra.

⁷ Ke Hanu at ame ohnathö, anyin ae hnathu Hanu.

⁸ Anyin a ödrin kun hnyat ödrin e ohnatho, wale Hanu, me köiö, me dra: ke khaca thibi, kun eling.

⁹ Ate ne kap hna ohnathoâ ûnyi ge at, e beönua hon e hna ohnathoâ ûnyi ge Khong: anyin a walang hna ohnathoâ ûnyi ge Khong, a e ame ohnathoâ Nokon.

¹⁰ Haba at ame labageju ka Nokon Khong, me e hu but eû hnyi hnyekon hna ohnatho: haba at ame ca labageju ka Khong, me ame hai thoiâ e; anyin a e ame ca hia but kap hnen Khong hna ohnathoâ Nokon.

¹¹ Ke walang hna ohnatho, a Khong ame ham köta möt ae ca ba balua, ke ûnyi ge Nokon möt eling.

¹² Haba at ae hu but gan Nokon, me hu but gan möt; ke haba at ae ca hu gan Nokon Khong me ca hu bi kâu möt.

¹³ Oge hia but sihnalimen ta je ûnyi e köbun tavat öbun e labageju ka ien Nokon Khong, me me khanʼ öbun ae hu but gabun möt ae ca ba balua.

¹⁴ Ke walang hnyok ae hwege ate me hu kâu, a öta ka he ka sumâtâ ke ûnyi helâ me weny, me ame ling öta:

¹⁵ ke a ne khanʼ öta a e ame ling öta hnyi hnöta hna sumâtâ, me e khanʼ öta ae hu but gata minya ta je ûnyi ate me sumâtâ gan.

¹⁶ A ne ke at ame wâ liamekeiny më ame ânyâ hulo adre me ca mekiny, me e ame he ka sumâtâ, ke Khong ame he! ka ham kâu möt hobi kâu at ame ânyâ hulo a ca hnân mekiny. E hu hulo hnân mekiny: oge me ca ha a e ame he ka khöûâ e.

¹⁷ Haba ta je hwakecin hia ae ca wisa bi, wale hulo: ke e hu hulo bi a ca hnân mekiny.

¹⁸ E khanʼ öta bi a gʼ ame ca ânyâ hulo hnen at adre hnokoâ ûnyi ge Khong; ke ame tuö e hnen at eji a hnokoâ ûnyi ge Khong, ke ame ca kâlâ e hnen at ae kong.

¹⁹ E khanʼ öta a ûheta unyin Khong, ke hmeledrany hia thithö ame mokut unyin at ae kong.

²⁰ Ke e khanʼ öta a gʼ ame hia but o Nokon Khong, ke a hia but ham köta hna wâhmakhmeto, me me khanʼ öta e at ae hnathu, ke öta but eû hnyi hnyekon at ae hnathu, wale eû hnyi hnyekon Nokon a Iesu Keriso. Wale Khong ae hnathu, me möt ame ca ba balua.

²¹ Je wanakat lö tuʼ öbun ju ge ta je hnatheat.