Isaia 32 - Iaai Bible 1901 (New Caledonia)

¹ WÂ bi, ame he ke than ka musi hnyi hwakecin ae wisa, kʼ ame he je taben ka owisa hnyi hna owisa.

² Ke ame he at ka helâ me hna lubaduöng ge ang, ke nedrong ge weneû; helâ me je di hnyi dok ae hwahwacit, helâ mē dok ae hmenu hnyi kic ae gan hnyi hnyei ae sēnyin.

³ Ke ame ca he ka hadedak li emakan tavat adre me bwela, kʼ ame he ka tevehlöng li hnyikonyen tavat adre me long.

⁴ Ke ame he je hnyok ame tot bebehû ka nâ he ka wâhmakhmeto, ke ame he je esongodiny tavat ae teta ka ie fuc wisa.

⁵ Adre me ca he hmetu ka ha ge at ae monu, a e at betenge bi, kʼ adre me ca he ka ha ge at iyawo, a e at ame ham gânâ bi.

⁶ Anyin ame he at ae monu ka ha hofuc ae monu, kʼ ame he hnyekon ka ânyâ hulo, wale he ka ânyâ hwakecin ae ca ûcû, me ha monu ga Iehova, me oba jeû ka at ae mekihnânem, me ohmö köiö belen at ae beic.

⁷ Ke e kong je bihihwakecin anyin at iyawo: e ame elâm je ûokonguny, me me ohia tavat ae ilemuk ge hofuc ae thoi, eja ke ne a ne wisa ifucin at ae ba ta ûnyi.

⁸ Ke haba at betenge e ame elâm deny betenge, ke e ame he ka tethmâ ûnyi ge hwakecin betenge.

⁹ Omomo lö, tavat adre me laba wia lö, todrö, long ju ifucik; wahlu, tavat adre me laba monu lö, tevehlöng ju hok hofuc.

¹⁰ Öbun e he ka öbubuny hnyi je bong ae se hia hon khaca huna, öbun je momo ae monu: anyin ame he ka ba wan vine, ame ca he ka o hna menu.

¹¹ Öbun je momo adre me laba wia lö, öbubuny ju; tavat adre me laba monu lö, ot ju: uny jut me me ba ûkhaû, ke hûkölö hnamejibun ju mano ae gan nân.

¹² Adre me he ka khaû ûlaidra can ta hnyei ae kese, me can vine ae wa.

¹³ Ame he ka kû hnyi kânâ kânân lakeik ta je iwadekong me je iwateta-föcö, eke, hon je umainy senyin hia hnyi tauniny senyin:

¹⁴ anyin adre me he ka hna bi uma ae mec, adre me he ka degec taun ae ti hu aten; ame he dok ae hut me tap tue ka hnân op nyiele balua, hnân senyin hnen je asinainy hnyot, hnân han tot hnen ta je hnahat meno;

¹⁵ ke ne o but adre me hingâlâ huta hanu ûnyi ethö, kʼ ame he ka hnyei belök hnyebuba, kʼ adre me he ka aû hnyei belök me hnyot bi.

¹⁶ Me ame he wisa ka laba hnyi hnyebuba, ke ame he hwakecin ae wisa ka laba hnyi hnyei belök.

¹⁷ Ke haba troban hwakecin ae wisa, wale ûsoköu, ke haba obiny hwakecin ae wisa wale laba hnahic me laba khötkic nyiele balua.

¹⁸ Ke ame he lakeik ka laba hnyi dok ae ûsoköu, me je uma adre me laba khötkic hnyin, me je hna menâ wale je dok adre me laba wia hnyin.

¹⁹ Ke ame he ka ta we ae wahma, hnyi ûen ame he ka û hnyot; ke ame he ka hnyikânâ taun.

²⁰ Hnobun hnahic tavat öbun e te hwit hnyi baten ta je köiö hia, me hna je can ta je bolok me asina.