Isaia 29 - Iaai Bible 1901 (New Caledonia)

¹ EKÖLÖ ge Ariela, waleji Ariela a taun ame hunuma hnyin Davita! bi hanen ke je huna ka ke je huna; ânyâ gaga je bijeû:

² me oge me he ka ovecâ Ariela, ke ame he ka hu hlöuhlöu me tenge: ke e ame he ka hing Ariela könya.

³ Ke oge me he ka hunuma igigili u, ke o ge me he ka theling u ge je lap tue, me otilâ je uma ae hwege cici u.

⁴ Ke u me he ka hnyikânâ, me fuc eû hnyi kânâ, ke ame he ka ûhnyûkong ifucâm eû hnyi sesâ; ke ame he ifucâm ka helâ me hwan at tren biobotkong, eû hnyi kânâ, ke ame he hnâm hna fuc ka ulit eû hnyi sesâ

⁵ Ke ame he ka ûcû me sesâ ame gâ ûganiny je iwahnaihmiony möu, ke ame he ka helâ me unen hwit ame oû ang ûseiny tavat ae hwege hnyimakodra: eke, e ame he ka ie o helâ me thuthubademak.

⁶ Ame he Iehova tuhan sabaoth ka senâ e tha e me hwan than, me hwiöi, me hwan ae gan hmâ, me hou, me weneû, me bâhlân meic ame han.

⁷ Ke ame he ka helâ me bwi me hna omanenâ hnyi lit ûseiny je hnyei hia, tavat adre me vat me Ariela, tavat adre me vat mē me je singiny, me tavat adre me hlec e.

⁸ Ke ame he ka helâ me at ae mekihnânem ame bwi, ke wâ bi, e ame han; ke e ame hmak dö, ke mekihnânem bi: ke helâ me at ae beic ame bwi, ke wâ bi e ame ic; ke e ame hmak dö, me wâ bi, e sēnyin bi, ke beic: ke ame he ka helâe ûseiny je hnyei hia tavat adre me vat me bucen Ziona.

⁹ Todru, ke lâiâ thö; hobâ thö ke wa-dröu but: adre monu but, ke ca ûnyi ge waina; adre me ta tot, ke ca ûnyi ge grâg.

¹⁰ Anyin a hia but Iehova hingâlâ hubun hanuiny mokut hnying, me ömûki öbun, wale ta je perofeta; ke ame tube je böbun, wale tavat wâ.

¹¹ Ke haba hnaomanenâ hia köbun me helâ me hofuc hnyi tusi adre ohmâ, waleji adre ham ka at ae khana tusi, me ha, ka habe, Ö u aû thö ang; ke haingen, ka habe, E ca khanö nya, anyin adre okeceâ hmâ e:

¹² ke adre ham tusi ka at ae ca khana tusi, me ha, ka habe, Öu aû thö ang: ke haingen, ka habe, E ca khanö nya tusi.

¹³ Ke haingö Iehova, ka habe, Anyin ame hakekenyi nya tavat ang ge je hnyimödra me oganö nya ge je esongodidra, kʼ adre me oûsâkâûö mönya je hnyekudra, ke haba hnödra hna outö nya, me wale thibi hna nʼ ödra ge hna ûne hnen at:

¹⁴ anyin a wale wâ bi, oge me he bala ka ânyâ ûnyi ae ke bongon bi ka tavat ang, a ûnyi hnân lâiâ me ûnyi a ûöman: ke ame he ka hia metâ anyin tavat ae metâ gadra, kʼ ame he ka iyong ûnykûmânen tavat wâ wia gadra.

¹⁵ Ekölö gadra tavat adre me elâm eû hnyin he ka ikhâlâ ga Iehova anyidra ta je ûhnenamö, ke e bi hnyi menekholom anyidra ta je huliwa, me ha, ka habe, Ia ame ō ʼta? ia ae khana öta?

¹⁶ Öbun e ohnyimenâ hnyikânâi ta je ûnyi! Hawa, adre me he bi ka ûnykûme ka at up kaia, me helâ me kânâ ae kece; me me he bi ûnyi adre tibet ka ha ka at ânyâ, ka habe, E ame ca up nya; me he ûnyi adre me tretrao ka ha ka at ame tretrao, ka habe, E ba metâ gan?

¹⁷ Hawa, adre me ca he logot ka wia Lebanona me me utkânâ ae hoso, kʼ adre me he bi ka ûnykûme utkânâ ae hoso, me hnyot bi?

¹⁸ Ke hnyi bong eling ame he ta je wejiji ka long hofuc hnyi tusi, kʼ ame he li emakan je wadröu ka bwela e ka ba but lit me menekholom.

¹⁹ Ke ame he tavat ae ilemuk ka ogânâ anyidra senyin ga Iehova, kʼ ame he tavat ae theduoc ka hobâ ge Kabi Isaraela.

²⁰ Anyin adre me oûnyibaûâ at ûöveci, ke a obiny jut at hlumö at, ke adre me subâ degeci ödra hia thithö adre me hmâkâ hwakecin ae kong:

²¹ a tavat adre me bijoniny at hnyi hna ivino, me lau hnewe hobi kâu at ame nâ hnyi homagöule, me ohaûâ at ae wisa ke ba can.

²² Anyin a wale, walang hna ha hnö Iehova at ame omeli Aberahama, haingen ge lap anyi Jekob, ka habe, Ame ca he Jekob ka hmehma walang ang, kʼ ame ca he ka löhau hnyimakan.

²³ Ke e ka wâ lakon, wale huliwa anyin li hnyamok hnyi wanben, me adre me he ka okabâ iök; eke, adre me he ka okabâ Kabi Jekob, me outen Khongu Isaraela.

²⁴ Me ame he tavat ae monu hnyekudra ka wâ metâ, kʼ ame he tavat ulit ka ûnö hna ûnö.