Isaia 10 - Iaai Bible 1901 (New Caledonia)

¹ EKÖLÖ ge tavat adre me otilö hnanyibu ae ca wisa, me tavat adre me sihnalimen ûnyi ae hwali:

² he ka wia at ae theduoc hnyi hna owisa, me ohia wisa ûnyi ge lakeik adre me vec, mʼ adre me söh ta je safac, me hûgûnâ ta je ûnyi anyin tavat ae ba kamödra!

³ Ke ieû öbun e he ka ânyâ hnyi bonginy sene, ke hnyi hnaûhango ame he ka o ûnyi hnyi dok ae sâkâu? öbun e he ka kec kö ia me me hadruʼ öbun? ke öbun e he ka ip ua anyibun hmanenang?

⁴ Adre me he bi ka tha iyâû thibi me ta je bâ, me tha ta me tavat adre me hlingâ. Ke hnyi ta je ûnyi e hia, e ame ca hwio hnyi anyin hmonyin, kʼ ame lau bala bi hnyamen.

⁵ Ekölö ge at Asuria, osöiny anyik hmönyin, ke utöhmu hnyi hnyamen anyik wathethot!

⁶ Oge me he ka kunâ e ka tavat a adre ca ot, ke oge me he ka hûna kâu hnyei ae hmönyik ka hnyin, he ka hûgûnâ ta je omjeû, me söh ta je ûnyi, me uti ödra helâ me hmudra hnyi je gethen.

⁷ Ke so bi e ame ca weny bi he ka helâe, kʼ ame ca ûnykûme hnyekon he ka helâe; ke e bi hnyi hnyekon he ka ohia me subâ degecâ je hnyei ke ca wakhalet bi.

⁸ Anyin a e ame ha, ka habe, Hawa, ca je hing than hia anyik je taben?

⁹ Hawa, e ca tha ûcû Kalene me Kakemis? ke ca ûcû Hamath me Arepada? ke ca ûcû Samaria me Damaseko?

¹⁰ Haba hnyamok ame hia but wâ ta je dokhu ae hu je idola, ke beönua hnödra hnatheat hudra hnyi Jerusalema me Samaria;

¹¹ me hawa, oge me ca he bi ka ânyâ ka Jerusalema me je idolainy helâ me hnok hna ânyâ ka Samaria me je idolainy?

¹² Anyin a wale e ka hia but Than umo anyin huliwa hia ka bucen Ziona me Jerusalema, me oge me he ka senâ wan hnyok bigan anyin than Asuria, me hmanenanginy li emakan ame begörany.

¹³ Anyin a haingen, ka habe, Oge hia but ânyâ e ge hnyamok ae hwege, me anyik metâ; anyin a inya at wâ wia: ke oge hia but wia je hnyigöulen ta je hnyei, me hûgûnâ ta je tang omjehedra, me ohnyikânâ tavat adre me tabâ je theron helâ me at hwege:

¹⁴ ke hnen hnyamok hna wâ ta je omjeûiny je hnyei helâ me hâûen meno; ke helâ me at ame hlo je wakunyin meno adre de degec, helâe oge hia but hlo ta je hnyei hia: ke ba at ame bwebwet abenyin, me memang, me cûk.

¹⁵ Hawa, ame he gö ka ohobeluâ hon at ame nang e? ame he gili ka ogânâ e ka at ame obwebwelâ e? helâke hnen osö hna obwebwelâ at ame nang e, ke helâke hnen uci hna kap goranyai at a ca utö bi.

¹⁶ Anyin a wale ame he Than, Than tuhan sabaoth, ka kunâ delâ ka anyin ta je pipikhenya; ke eû hnyi hmelen anyin hmanenang adre me he ka vâc hna hiâ helâ me hna hlâiny meic.

¹⁷ Ke haba melaminy Isaraela ame he ka hnân meic, ke haba anyin Kap hnân bâhlân: ke ame he ka thong me an anyin je iwatetaföcö me iwadekong hnyi bong a khaca.

¹⁸ Ke e ame he ka an hmanenanginy anyin hnyot, me iny hnyei ame wa wan, wale hanu me unyin: kʼ ame he ka helâke at kât boûdila ame ta ke mok.

¹⁹ Ke haba kolon ta je ûöiny anyin hnyot ame he ka wakhalet, me me khana wanakat ka sihnalimidrin.

²⁰ Hnyi bong eling ame ca he hmetu bi ka he je kolon hnyi Isaraela, me tavat adre kec möt hnyi lap anyi Jekob ka labageju ka at a kuc ödra: ke adre me he ka labageju, hnyi hnathu kö Iehova, wale Kabi Isaraela.

²¹ Ame he ka hmetu ke kolon, wale kolon unyi Jekob, ka Khong ae man.

²² Anyin a eja ke ne a ne helâ me öny eû hnyi köiö lakem Isaraela, ame he ka hmetu thibi koluidra: adre me ip hmâ he ka ohia, ke wale ame badedö but hwakecin ae wisa.

²³ Anyin a haba ûohiö waleji adre ip hmâ, me ame he Than Iehova tuhan sabaoth ka ânyâ hnyi wanben hmeledrany hia.

²⁴ Anyin a wale, walang hna ha hnen Than, Iehova tuhan sabaoth, ka habe, Lakeik lö, tavat adre me laba hnyi Ziona, ca outen bi öbun at Asuria: eja ke ne a ne kuc u ge osö, me nang anyin uci köu helâji me hnyi Aigupito.

²⁵ Anyin a mē okhaca, me ame he ka hwâdâ wathethot, me anyik hmonyin hnyi ûohiʼ ödra bi.

²⁶ Ke ame he Iehova tuhan sabaoth ka oâ kâu osö, helâ me hna kot at Midiana hnyi kic Oreba; kʼ ame he anyin uci ka e hon köiö, ke e ame he ka hai goranyai e helâ me hnyi Aigupito.

²⁷ Ke hnyi bong eling adre me he ka hom honen hok ûnyi hnyi hon bajebenyâm, me anyin bi hna ûhûkâlâköuâ ûnyi hnyi hon nyem, ke adre me he ka ohia hna ûhûkâlâköuâ, can wakaco hnân hû.

²⁸ E ame o but hnyi Aiath, e ame vheno Migeron; e ame ip anyin bi thatûnyi hnyi Mikemas:

²⁹ adre me hanyâûâ gethen ae hnek; adre me mokut hnyi Geba; ame öbubuny Rama; Gibea anyi Saulo ame kec do.

³⁰ Hlu nöku Galim lö, hongot dö goranyai! Laisi lö, long ju! ekölö gam Anathoth!

³¹ Ame kekec ut at Mademana; kʼ ame ûkhacaköu aten Gebim, he ka kec.

³² Hnyi bong ang e ame he ka laba hnyi Nob: kʼ ame jijingâ hnyamen ka bucen anyin hlu Ziona, a hutiny Jerusalema.

³³ Wâ bi ame ke Than, Iehova tuhan sabaoth, ka sö degecâ ta je vheiny ge hna outen: ke haba tavat ae beû goranyai, me adre me he ka öûo, ke adre me he ka ohnyikânâ tavat bi gan.

³⁴ Ke e ame; he ka sö hnyot ae khot ge fao, kʼ ame he Lebanona ka ta ge at ae hwege.