Ioane 19 - Iaai Bible 1901 (New Caledonia)

¹ ME haba Pilato ame hum Iesu thö me osoâ e.

² Haba ta je soja adre me hwâwâ je tö ae ûdedö me hnân korona, me obicâ kâu, me okhaûâ e ge ûkhaû ae udrudrâ hlit;

³ me adre me he thö kâu me ha, ka habe, Talofa Tuhan at Juda! me adre me khaû e.

⁴ Haba Pilato ame dit hmetu but, me ha kodra, ka habe, Wâ bi oge ma odilâ but e köbun, me me manen köbun a oge me ca wâ thö ke monu gan.

⁵ Ame dit minya but Iesu ame bicâ korona ae ûdedö me khavâ ûkhaû ae udrudrâ lit. Haba Pilato ame ha kodra, ka habe, Wâ bi at!

⁶ Ke a wâ but e hnen je taben tavat bihut me tavat tue, me adre me ha hwegiâ, ka habe, Osatauroâ thö, osatauroâ thö. Haingö Pilato kodra, ka habe, Hom bi thʼ öbun me osatauroâ: anyin oge me ca wâ ke monu gan.

⁷ Ame thu kâu at Juda, ka habe, E hu anyihmun hnanyibu, ke ûcû kâu he ka mok hnyi hnanyibu eling, anyin a e ame ka hâiâ e me Nokon Khong.

⁸ Ke a long ut Pilato hofuc e, me e ame ot gan hmâ;

⁹ me e ame dit hmetu thö ka hnyi uma umen than, me ha ko Iesu, ka habe, Ûhem ua? Ke haba Iesu ame ca thu kâu.

¹⁰ Haba Pilato ame ha kâu, ka habe, U me ca thu thö könya? e ca khanö u ae hu anyik musi he ka hnö u, ke hu anyik musi minya he ka osatauroi u?

¹¹ Iesu ame thu kâu, ka habe, Adre ne ca ham köu ûnyi ethö me ba ânyâm musi huk: waleling me me gan hulö anyin at a ham nya köu.

¹² A hwân ang Pilato ka heleû deny he ka thang ut e: ke haba at Juda adre me hongot, ka habe, U je ne he ka thang ut at ang mʼ u ca hanö Kaisara but; anyin a haba at ame wia e me me than, me e ame tot ûcû Kaisara.

¹³ A long ut Pilato hofuc eling me e ame hum Iesu but hnyou ai, me e ame laba hnyi taben owisa hnyi dok, ien, ka habe, Adre ave ge veto, ke haba hnyi hwen Heberu me, Gabatha.

¹⁴ Haba bong eling me bong Penapena paseka: ame ne awa a siksiny. Me e ame ha ka at Juda, ka habe, Wâ bi Tuhöbun!

¹⁵ Me adre me ha hwegiâ, ka habe, Hom dö, hom dö, osatauroâ thö. Haingö Pilato kodra, ka habe, Hawa, oge ma he ka osatauroâ Tuhöbun? Me ame thu je taben tavat bihut, ka habe, E ba minya ju ke tuhöhmun ke hake Kaisara thibi.

¹⁶ Me e ame hna but e kodra mʼ adre me he ka osatauroâ.

¹⁷ Me adre me hum Iesu thö: me e ame didrut ka vadren satauro hobi kâu, ka hnyi dok, ien, Iny ibokomok, ke haba hnyi hwen Heberu, me Gologotha:

¹⁸ me adre me osautauroâ e eling tha e me li at a lo hnyi li ke keihen, ke Iesu eû hnyi wanben.

¹⁹ Ke haba Pilato ame set tusi me ip hon satauro. Ke walang hna sihnalimen, ka habe, IESU AT NAZARETA, TUHAN AT JUDA.

²⁰ E se hia at Juda adre me aû tusi e: anyin ae hakekeny ka hnyi taun dok adre me osatauroi Iesu hnyin: kʼ adre me sihnalimen hnyi hwen Heberu, me Roma, me Heleni.

²¹ Me haingen ta je taben tavat bihut a hnyat Juda kö Pilato, ka habe, Ga sihnalimen, Tuhan at Juda; ke so bi a gʼ ame ha, ka habe, Inya ang Tuhan at Juda.

²² Haingö Pilato, ka habe, Haba hnok hna sihnalimen, me oge hia but sihnalimen.

²³ Ke adre hia but osatauroi Iesu, me ame hom anyin je ûkhaû hnen je soja me khenâ vâkâ ka oûco je soja; helâe minya ûkot: haba ûkot, me adre me ca tibet, ke adre me hwâwâ bekhötâ.

²⁴ Me adre me ûhnenamököuâ, ka habe, Ate me ca he bi ka kia, ke so bi he ka ugleköbâ, a hamö ia he ka hom: me me hwâdâ hna sihnalimen, ka habe, Adre me khenâ anyik je ûkhaû unyidra, Ke adre me ugleköbâ anyik ûkot. Wale ta je ûnyi ame ânyâ ta je soja.

²⁵ Ke ame tot hakekenyâ satauro hinyö Iesu, me liamekeiny me hinyen, jia Maria öiö Kaleopa, me Maria Magadalena.

²⁶ Ke a wâ Iesu hinyen, me ke aten e ame betenge kâu, ödru me tot hakekenyâ, me e ame ha ka hinyen, ka habe, Bai lö, wâ bi nokom!

²⁷ Ke e ame ha minya ka aten, ka habe, Wâ bi, hinyâm! Ke hwân hnyi awa e, haba aten eling ame hom dö momo ka hnyi hnyaban.

²⁸ Hwaban dö e, a wâ Iesu a ga um but ta je ûnyi hia, me e ame ha, ka habe, Oge me beic dö; me me hwâdâ hna sihnalimen.

²⁹ Ame mokut eling kaia ae unöngöt ge vinega: me adre me hûlûlûâ ohmanenâ hnyin vinega, me ip hnyi ke hnyiban hisop, me inâ ka hnyi hnyimen.

³⁰ A hia but Iesu kap vinega, me e ame ha, ka habe, A um dö: me e ame khudrung ju, me hna but hanon.

³¹ Haba at Juda ödrin e sumatö Piliato he ka köt hmetro je li cadrin, me hum ödrin bi, anyin a bong Penapena, me me ca he ka hnen je unyidrin hnyi satauro hnyi sabath (bong ae gan hmâ sabath eling).

³² Me ame he but je soja me thu li can ke at, helâe minya ke at adre me osatauroâ mē:

³³ ke adre me o but kö Iesu me wâ e a mokeu, me ödrin e ca thu li can:

³⁴ ke haba ke soja ame dâ vhaken ge ö, me ame ie hingölö but dra me köiö.

³⁵ Ke ame ohnathoâ hnen at ame wâ, ke hnathu but hnen hna ohnatho: ke a wâ but ae hnathu hnen hna ha, mʼ öbun e he minya ka labageju.

³⁶ Adre me ânyâ ta je ûnyi e me me hwâdâ hna sihnalimen, ka habe, Ame ca he ka hmetru ke jeien.

³⁷ Ke haingen ke hna sihnalimen, ka habe, Adre me he ka wâ at adre me dâ.

³⁸ Hwaban e, haba Josefa at Arimathea, wale ke atö Iesu, ke iyong bi anyin ae outen at Juda, haba at eling ame sumatö Pilato he ka hom unyi Iesu: haba Pilato ame ham. Me e ame he but me hom unyin.

³⁹ Ame o minya Nikodemo, at eji ame senâ hnyi hnyinghet, kʼ ame hom muro, me aloe adre ûhaniken, helâke me wan haded je litara.

⁴⁰ Me adre me hom unyi Iesu, me lan ge mano lino me je ûnyi ae bo so, helâ me hwakecin at Juda ödra ka he ka khon komok.

⁴¹ Eling ke ong utkânâ hnyi dok adre hia but osatauroâ e hnyin; ke wale hnyi ong utkânâ thop ae teb ûnyi a ödra tiga ca hip komok hnyin.

⁴² Me adre me ip Iesu eling, anyin a bong Penapena anyin at Juda, (anyin a e hakekeny thop).