II. Samuela 22 - Iaai Bible 1901 (New Caledonia)

¹ KE Davita ame ha kö Iehova je hofuciny khumöng ang hnyi bong Iehova ame omelö e ûnyi hnyi hnyamen je iwahnaihmiony mē hia, me ûnyi hnyi hnyamö Saulo:

² haingen, ka habe, Iehova kicik, me hnok hnabâ, me at a omeli nya, walönya ang;

³ E Khongon kicik, oge me he ka labageju kâu; E becik, me faoiny meno hnân omeli nya, me tabök tap ae görany, me hnok hna he ka kec kâu: At ûhomeli nya lö, u je omeli nya ûnyi hnyi ûokonguny.

⁴ Oge me he ka hongot kö Iehova, e ûcû he ka ogânâ: Mʼ adre me he ka omeli nya ûnyi ge je iwahnaihmiony mönya.

⁵ Anyin ame wadrö nya je waköiö adre me mekiny, Ame oti nya je di anyin tavat ae kong.

⁶ Ame wadrö nya je toiny hedis: Oge hnok dö ge je tö adre me mekiny.

⁷ Oge me hongot kö Iehovo hnyi anyik vec, Eke, oge me hawâ Khanguk: Ke e ame long hok hnyi umen uma, Ke ame o but hwan anyik khöû ka hnyi li hnyikonyen

⁸ Ke ame bwebwet me öbubuny hmeledrany, A okokok dö je taben drany Me bwebwet, anyin a e hmonyin.

⁹ Ame ölö hai ûnyi hnyi li hnyingöiny, Ke meic ame han ûnyi hnyi hnyimen: A möt dö je walep kâu.

¹⁰ E ame oto hwalö drany minya, me utut; Ke e hu menekholom ae khot eû hmelen li can.

¹¹ Ke e ame laba hon kerubi, me gâ: Eke, adre me wâ e hon li labenyin ang.

¹² Ke e ame ânyâ menekholom hnân je tungen igigilo e, Kʼ ame ûkhöûnâ je köiö hnân je ûlâ ae haki ethö.

¹³ Adre omelö je walepiny meic Ûnyi ge hadröngöc hnyi hnyimakan.

¹⁴ Iehova ame ânyâ hendreng ûnyi hnyi drany, Ke ame fuc At ae ti Beönua.

¹⁵ Ke e ame kunâ je fana me ovesei ödrin; Me hucuce, mʼ ödrin e monumonu.

¹⁶ Me manen dut je deny köiö ae gan, Adre me omanenâ je taben hmeledrany, Anyin a Iehova ame thawâ, Ûnyi ge homenâiny li hnyingöiny.

¹⁷ E ame ûkhûnöng ûheny dö, e ame hum nya; E ame lili nya ûnyi hnyi hnyin je köiö ae se;

¹⁸ E ame omeli nya ûnyi ge iwahnaihmiöny mönya ae hwege Me tavat adre me hûkötiö nya; anyin a ödra hwege huk.

¹⁹ Adre me o könya hnyi bonginy anyik vec: Ke Iehova cik.

²⁰ E ame hum nya minya ka hnyi dok ae gan: E ame omeli nya, anyin a e ame senyin könya.

²¹ Iehova ame hia but bi hwaban könya hoton hwakecik ae wisa: E ame bi hwaban könya hoton hâuen li hnyamok.

²² Anyin oge me vheno je gethen de Iehova, Ke oge me ca saû degecâ bi Khong me be monu but.

²³ Anyin a e bi hnyi hnyimakök anyin je hna owisa hia: Ke oge me ca saû ge anyin je hnanyibu.

²⁴ Ke ba kongik kâu, Ke oge me tuö nya, mʼ oge me ca hnyi monu.

²⁵ Anyin a wale Iehova ame hia but bi hwaban könya, hoton hwakecik ae wisa; Hoton hwakecik ae wisa hnyi hnyimakan,

²⁶ U me he ka betenge ka at ame betenge bi, U me he ka ti wisa ka at ae ti wisa;

²⁷ U me he ka hwakecin ae hau ka at ame hwakecin ae hau; Ke u me he ka hwali ka at ame ânyâ hwakecien ae hwali.

²⁸ Ke u me he ka omelö tavat adre me oevcâ: Ke u me he ka wâ tavat ae bi gan, mʼ u me he ka ohnyikânâi ödrin ju.

²⁹ Anyin a u, Iehova lö, anyik lamepa: Ke ame he Iehova ka omelamâ anyik menekholom.

³⁰ Anyin a ûnyi gam oge me wadring hon deo vat: Ûnyi ge Khonguk oge me gâ hanyâûâ hna up haginy.

³¹ Haba Khong, e ti wisa deny gethen: Adre cubec hofuc ho Iehova; E becidrin hia tavat adre me labageju kâu.

³² Anyin a ia Khong e ka ca Iehova? Ke ia kic e ka ca Khongutin?

³³ Khong anyik hnabâ ae hwege: Ke e ame su at ae ti wisa hnyi deny gethen.

³⁴ E ame ânyâ li can me me helâ me aila: Me olabö nya hon anyik je dok ae görany.

³⁵ E ame nâ li hnyamok he ka vat; Me me oto cafana bras ge li benyik.

³⁶ U je hia but ham könya becin ânyâm ûhomeli: Ke ame oganö nya ge hwakecâm ae menyik.

³⁷ U je hia but ogânâ je hna okca hmelik, Ke ame ca haûhaû li hnyeûcak.

³⁸ Oge hia but hnu hoton anyik je iwahnaihmiöny me ohiʼ ödrin; Ke khaca oge me ca hmetuhmetu ke ne o but ame hiʼ ödrin hia but.

³⁹ Ke oge hia but ohiʼ ödrin, me dâoi ödrin, me me ca khanʼ ödrin bi tot: Eke, ödrin e ta but hmelen li cak.

⁴⁰ Anyin a u je oweikö nya ge man hobi kâu vat: U je hom ûhnyûkongu ödrin hmelik, tavat adre me tot könya.

⁴¹ Ke u je wia hoton könya je iwahnaihmiöny mönya, Mʼ oge me he ka ohiʼ ödra adre me hûkötiö nya.

⁴² Adre me bwebwele, ke ba at he ka omelö; Kö Iehova, ke e ame ca thu kodra.

⁴³ Me oge me kot omomonu ödra helâ me sesâiny kânâ, Oge uti ödrin helâ me hmudrainy je gethen, me ulili ödra.

⁴⁴ Ke u je hia but omeli nya ûnyi hnyi je iwatretra anyin ik hnyei; U je tuö nya mʼ inye ban ta je hnyei bi: Ame he ka bi athnyabaik hnyei ae ca khanö nya.

⁴⁵ Ame he je atkanyua ka nom könya: Ödra ka long gak, me adre me he ka ling nya.

⁴⁶ Ame he je atkanyua ka aû tot, Me o hnyi öbubuny ûnyi hnyi hnyeutidra ae nedrong.

⁴⁷ E möt Iehova; ke so e hnahic ut kicik; E so adre ogöranyâ Khongon kiciny melik:

⁴⁸ Wale Khong at ame bi hwaban hnân hobi könya, Me hom ûhnyûkongoâ ta je hnyei hmelik,

⁴⁹ Me hum nya ûnyi ge je iwahnaihmiöny mönya: Eke, u je ogöranyi nya hudrin adre me tot könya: U je omeli nya ge at ame ûokongun.

⁵⁰ Anyin a wale oge me he ka ole köu Iehova hnyi wanben ta je hnyei, Me khumöng me ogânâ iâm.

⁵¹ E ame omelö gan hmâ hnân hobi kâu than a ûnyi gan: Me omanenâ ibetengiö ka at e ame hû, Kö Davita me je mâtrâniny nyiele balua.