II. Korinito 4 - Iaai Bible 1901 (New Caledonia)

¹ E HU but gahmun huliwa eang, ke adre me betenge gahmun, me waleling öhmun e ca sënyin:

² ke öhmun e hia but degec ta je ûnyi ae iyong hnân ohmehma, kʼ öhmun e ca he me iyawo, ke öhmun e ca othoiâ hofuc hwan Khong; ke öhmun e omanenâ hnathu, me haisoi öhmun hnyi ta je ûnykûmenen tavat hia hnyi hnyimakan Khong.

³ Ke adre me ne tubi anyihmun ûthumetu ae so, me adre me tube ka tavat adre me he bi ka mok:

⁴ wale tavat ame owadruâ je oûnykûmenödra bi, ke adre me ca labageju bi, ûnyi ge khongon hmeledrany eang, wâ e nye melam! kodra melaminy ûthumetu ae so ae hmanenang anyin Keriso, wale ae we Khong.

⁵ Anyin a öhmun e ca kheti öhmun, ke Keriso Iesu a Than, ke öhmun je lathnyabaibun ga Iesu.

⁶ Anyin a Khong, waleji at ame ha, ka habe, Ame he ka umumelam but melam ûnyi hnyi lit, waleji ame öumumelamâ je hnyekuta, me me melam but he ka wâhmakhmetoâ hmanenang anyin Khong hnyi hnyimakö Iesu Keriso.

⁷ Ke hu but gahmun tang omjeû eang hnyi je utkaia kânâ, me me ûnyi ge Khong ûganiny man ae nua, ke ca ka ûnyi hi gahmun;

⁸ adre ûhneki igigili öhmun, kʼ öhmun ca gum bi; öhmun e hlohlo, ke ca gâ bi ûhmun;

⁹ adre me hnu öhmun, kʼ adre ca digic öhmun bi; adre me öū öhmun, ke ca hia öhmun dut;

¹⁰ öhmun e hom tilâ hnyi je unyihmun mok anyin Than Iesu, me me manen minya but möt anyi Iesu hnyi je unyihmun.

¹¹ Anyin a haba öhmun hnyat ae möt, adre me hnʼ öhmun bala ka hnyi mok ga Iesu, me me manen minya but hnyi je unyihmun ame he ka bobot möt anyi Iesu.

¹² Wale me me huliwa mok eû hnyi je hnyekuhmun, ke ame huliwa bi möt eû hnyi je hnyekubun.

¹³ Ke e hu gahmun hanuiny labageju a khaca, helâ me hna sihnalimen, ka habe. Oge me labageju me oge me fuc do; ke öhmun e labageju minya, me öhmun e fuc minya thö;

¹⁴ ke e khanʼ öhmun a haba at ame omelö hmetu Than Iesu, ame he kʼ omeli öhmun hmetu minya me Iesu, me tha omanenʼ öhmun mʼ öbun.

¹⁵ Anyin a hobi köbun ta je ûnyi hia, me me se hia but ole hnân ogânâ Khong, hnen ibetengiö hna osehia hnen tavat ae se hia.

¹⁶ Wale me öhmun e ca sënyin bi; eja ke ne a ne bobot tot je unyihmun hnyi hoton, adre me ohâtâ hnyi je bong hia at eû hnyin.

¹⁷ Anyin a haba anyihmun vec ae hâhâ, wale ame ie hia, ame huliwan gan hmâ tot hobi kohmun hmanenang ae hmak ke nyiele balua;

¹⁸ ke öhmun e ca wâ hmâ ta je ûnyi ae manen, ke so bi ta je ûnyi ae ca manen bi: anyin a haba ta je ûnyi ae manen me e hu obiny; ke haba ta je ûnyi a ca manen bi, me nyiele balua.