II. Je Than 7 - Iaai Bible 1901 (New Caledonia)

¹ KE haba Elisaia ame ha, ka habe, Long ju hofuc ho Iehova: walang hna ha hnö Iehova, ka habe, Helâ nyi ang, ame he ka khaca sea falawa hwaban sekel, ke lo li sea bali hwaban sekel adre me he ka ûco hnyi homagouleny Samaria.

² Haba taben, waleji a he cimâ hnyamen than, ame thu ka aten Khong, ka habe, Wâ bi, ame ne he Iehova ka bi mamalama hnyi drany ame ne he ka manen ûnyi e? Ka haingen, ka habe, Wâ bi, u me he ka hnyi wâ e ge li emakâm kʼ u me ca he ka hnyi han.

³ Ke e hu tavat a lepera a ödrin foa hnyi hwanumen homagöule, ke ödrin e ûhnenamököuâ me ha, ka habe, Anyin a ieû otin e he ka laba eang ke ne o but otin e mokcu?

⁴ Otin e ne ha, ka habe, Ötin a he ka hnyi taun, ke e hmiâ hnyi taun, me otin e he ka mok eling: ke otin e ne laba bala eang, otin e he ka mokcu minya. Ke walang ang otin a kec ka hnyi utbavat anyin at Suria: ödrin e ne he ka omeli otin, otin e he ka möt; ke ödrin e me hlingʼ otin otin e he bi ka mokcu.

⁵ Me ödrin e todrö ke hauhaotreng ut, he ka he ka hnyi hna hunuma anyin at Suria: ke ödrin e o but ka hnyi baten hna hunuma anyin at Suria, me wâ bi, a ba but at eling.

⁶ Anyin a hia but Iehova olöngâ je utbavat anyin at Suria ge medien je kariota, me medien je hors, wale medien je utbavat ae gan: me ödrin e ûhnenamököuâ, ka habe, Wâ bi, than Isaraela ame hia but bi hwaban je than Heth, me je than Aigupito, mʼ adre me vat mötin.

⁷ Anyin a wale ödrin e todrö me kec hnyi hauhaotreng, me hna degecâ umödrin je uma mano, me haledrin je hors me haledrin je asina, wale hna hunuma thiju, me ödrin e kec, anyin a ödrin bemöt.

⁸ Kʼ ame o but je lepera eling ka hnyi baten hna hunuma, me ödrin e didro hnyin ke uma mano me han me ic, ke ödrin e hom ûheny e sileva, me gol, me ûkhaû, me hom, me ikhâlâ; ke ödrin e hmetu me dit hnyin ke uma mano, me hom ûheny e minya, me he me ikhâlâ.

⁹ Ke ödrin e ûhnenamököuâ, ka habe, E ca so hnötin hna ânyâ: bonginy ûthumetu ae so bong ang, ke otin e laba hnyibû: otin e ne laba ke ne o but ame hmouca lany otin e ne he ka wâ ûnyi ae kong: otin e he walang ang ka thumeto lap anyin than.

¹⁰ Me ödrin e o me hongot ka hnyat tuö homagouleny taun: me ödrin e thumetu ödrin me ha, ka habe, Ohmun e o hnyi hna hunuma anyin at Suria, ke wâ bi, e ba but at eling, ke ba hwan at, ke so bi je hors thibi adre noc, me je asina adre noc, me je uma mano thiju.

¹¹ Haba tavat tuö homagöule ödrin e hongot; ke ödrin e thumeto lap anyin than eiö.

¹² Haba than ame todrö hnyi hnyinghet me ha ka lathnyabainy, ka habe, Oge me he ka haimamenâ köbun walang ang hna ânyâ hnen at Suria kötin. E khanʼ ödrin but a otin mekihnânem; anyin a wale ödrin e be but ûnyi hnyi hna hunuma he ka ikhölö hnyi hnyot, ke hai-ngödrin, ka habe, ödrin ka he but ûnyi hnyi taun, me otin e he ka kât meliödrin, me dit ka hnyi taun.

¹³ Haba ke athnyabainy ame thu me ha, ka habe, E so he ka hom je hors a thabûng a ke je kolon biju hnyi taun, (wâ bi, ödrin helâ me ûseiny at Isaraela hia thithö je kolon hnyin; wâ bi ödrin helâ me ûseiny at Isaraela hia thithö a mokcu:) me otin e he ka ûkhûnöng me wâ.

¹⁴ Me ödrin e hom li kariota me je hors; ke haba than ame ûkhûnöng he ka he hoton utbavat anyin at Suria, haingen, ka habe, He thö ka wâ.

¹⁵ Me ödrin e he hotudrin ke ne o but Joridano: ke wâ bi, adre avâ gethen hia ge je ûkhaû me je kaia, wale a hna degecâ ju at Suria hnyi hnödrin hna kec logot. Ke haba je uthumetu ame he hmetu me thumeto than.

¹⁶ Me ame didrut tavat me sö hna hunuma anyin at Suria. Me adre me ûco khaca sea falawa hwaban sekel, ke lo li sea bali hwaban sekel, helâ me hofuc ho Iehova.

¹⁷ Ke haba than ame hûna taben, wale at e ame he cimâ hnyamen, he ka tuö homagöule, me haba tavat adre me uto e hnyi homagöule me e ame mokcu, helâ me hna ha hnen aten Khong, waleji a ha hnyi ûen a o kâu than.

¹⁸ Me ame hwâdâ thö helâ me hna ha hnen aten Khong ka than, ka habe, Ame he ka bi hwaban lo li sea bali ge sekel, ke khaca sea falawa hwaban sekel, helâ nyi ang, hnyi homagöule Samaria;

¹⁹ ke haba taben eling ame thu ka aten Khong, ka habe, Wâ bi, ame ne he Iehova ka bi mamalama hnyi drany ame ne he ka manen ûnyi e? Ke haingen, ka habe, Wâ bi, u me he ka hnyi wâ e ge li emakâm, ke u me ca he ka hnyi han:

²⁰ me ame aat dö helâe kâu, anyin a tavat adre me uto e hnyi homagöule, me e ame mokcu.