II. Je Than 6 - Iaai Bible 1901 (New Caledonia)

¹ KE haba lakon je perofeta ödrin e ha kö Elisaia, ka habe, Wâ bi, haba dok ohmun e laba hnyin hnyi hnyimâkâm, me ti hnek bi kohmun.

² Ö u hnʼ ohmun dö he ka he Joridano ai me ve hok uto ûheny e, ke ohmun e he ka bi hnyaba eling, mʼ otin e he ka laba eling. Me e ame thu, ka habe, He thʼ öbun.

³ Ke haba ke at ame ha, ka habe, Ö u tha he me lathnyabaem. Ke haingen, ka habe, Ötin a tha he.

⁴ Me e ame tha he mödrin. Ke ödrin e o but hnyi Joridano, me ödrin e si uto.

⁵ Kʼ ame tiga si uto ke at, ame kolu but gö ka hnyi köiö: me e ame kuku, ka habe, Ekölö than! anyin a ûnyi adre hia but mē sumâtâ.

⁶ Ke haingen aten Khong, ka habe, A kolu ua? Me e ame omanenâ kâu dok. Me e ame sö ke ong uto me khûâ eû, me ame mat dö fao.

⁷ Ke e ame ha, ka habe, Hom dö. Me e eme inâ but hnyamen me hom e.

⁸ Ke ame vat than Suria me Isaraela; me e ame ûhnenamö me lathnyabainy, me ha, ka habe, Oge me he ka hunuma hnyi dok e me dok eling.

⁹ Haba aten Khong ame ûkhûnöng ka than Isaraela me ha, ka habe, Wâ eâu, ca he kâe ka hnyi ke dok; anyin ame tiga he but at Suria ka hnyi dok eling.

¹⁰ Ke haba than Isaraela ame ûkhûnöng ka hnyi dok wale a ha aten: Khong me khû hnyiköny e, me e ame omelö e bi eling ca okhaca me olo.

¹¹ Ke ame kong dö hnyekon than Suria can hofuceling; me e ame hawâ lathnyabainy me ha ködrin, ka habe, Hawa, öbun e ca he ka, thumetu nya a ie at gatin ame tha hien me than Isaraela?

¹² Haba ke athnyabainy ame ha, ka habe, Than a tuhok, e ba: ke so bi Elisaia perofeta hnyi Isaraela, ame labö thumeto than Isaraela ge ta je ûnyi u me ha hnyin hnyeulem mokut.

¹³ Ke haingen, ka habe, He thö ka wâ dok e ame laba hnyin, mʼ oge me he ka ûkhûnöng he ka hom e. Me adre me thumeto e, ka habe, Wâ bi e but hnyi Dothana.

¹⁴ Anyin a wale e ame kunâ kâe je hors, me je kariota, me utbavat ae gan hmâ: ke ödrin e o but hnyi lit me tot igigilo taun.

¹⁵ Ke ame vesâ hnyi hnyomakatu athnyabainy aten Khong, me he hnyou ai, wâ bi, adre igigilo but taun hnen vat, je hors me je kariota. Haba athnyabainy ame ha kâu, ka habe, Ekölö tuhok! otin e he ka hawa?

¹⁶ Ke haingen, ka habe, Ca ot bi: anyin a hnyat ödrin e laba unyitin ame se hia hon hnyat adre laba unyidrin.

¹⁷ Haba Elisaia ame hic me ha, ka habe, Iehova lö, ö u obwela but li emakan, me me wâ. Me Iehova ame obwela li emakan hidröu; ke e ame wâ: ke wâ bi, ame unöngötö bucen ge je hors me je kariota meic igigili Elisaia.

¹⁸ Ke ödrin e o but kâu, me haba Elisaia ame hic kö Iehova, me ha, ka habe, Ö u owadruâ but hnyat ang. Me e ame owadruʼ ödrin helâ me hna ha ga Elisaia.

¹⁹ Ke Elisaia ame ha ködrin, ka habe, Ca gethen bi ang, ke ca taun bi e; ke hnu hotuk me oge me he ka hum öbun ka at öbun e elâm. Ke e ame hum ödrin Samaria ai.

²⁰ Ke ödrin e o but hnyi Samaria, me haingö Elisaia, ka habe, Iehova lö, obwela but li emakan tavat ang, mʼ Ödrin e wâ. Me Iehova ame obwela je emaködrin, me ödrin e wâ, ke wâ bi ödrin dut hnyi Samaria.

²¹ Ke ame ö ʼdrin than Isaraela me haingen kö Elisaia, ka habe, Cica lö, hawa, oge me he ka kuc ödrin? hamök he ka kuc ödrin?

²² Ke e ame thu, ka habe, U me ca be ka kuc ödrin: hawa, u me he ka kot je hna hwenbâ ge ânyâm hele vat me cafana? ha ödrin me habelidrin, me ödrin e he ka han me ic, me hmetu ka tuhödrin.

²³ Ke e ame penapena gan hmâ hobi ködrin: ke ödrin e hia but han me ic, me e ame kunʼ ödrin, me ödrin e he hmetu ka tuhödrin. Ke a ca he hmetu bi je utbavat anyin at Suria ka hnyi hnyei Isaraela.

²⁴ Ke hwaban ta je ûnyi eling haba Ben-adada than Suria ame ûkhacaköuâ anyin utbavat hia, me he me thelöng Samaria.

²⁵ Ke gan hmâ hmiâ hnyi Samaria: ke wâ bi ödrin e thelöng e me me eite je sileva hwaban ban asina, ke faiv je sileva hwaban ke keihen kabe a vakiny tatet tiny biny.

²⁶ Ke ame ngenu than Isaraela hon hna up haginy, ke haba ke momo ame hongot kâu, ka habe, Than a tuhok lö, hom hadruo nya.

²⁷ Me e ame thu, ka habe, Ame ne ca he Iehova ka hadruo u, me oge me he bi nya ka kâmâu ka hadruo u? ame ne ûnyi hnyi hna huje hwit, ame ne ûnyi hnyi hna hlec wan vine?

²⁸ Ke haingen than kâu, ka habe, Ieû gam bi? Ke haba momo ame thu, ka habe, Haba momo ang ame ha könya, ka habe, Hö jem nokom da kʼ otin e he ka an hnyi bong ang, me otin e he nyi ka an nokuk.

²⁹ Me ohmun e ölâ nokuk, me an: me haba nyi oge me ha kâu, ka habe, Hö jem nokom da me otin e he ka an: ke haba momo ame hia but ikhâlâ nokon.

³⁰ Ke a long ut than hofuc hwan momo, me e ame kia anyin ûkhaû; (ke e ame ngenu hon hna up haginy;) ke haba tavat adre me wâ, ke wâ bi, e ame khavâ unyin ge ecmano ae gan nân.

³¹ Ke e ame ha, ka habe, Ame he Khong ka ânyâ helâe könya me bi hanen dö minya, ame ne e bala bö Elisaia nöku Safata hnyi bong ang.

³² Ke Elisaia ame laba hynin umen uma, me wahingat ödrin e tha laba mē; haba than ame kunâ ke at ûheny unyin: ke e tiga ca o bi ûthumetu kâu, me e ame ha ka wahingat, ka habe, Hawa, öbun e wâ but hnen nokon at ûhlingö ang hna ûkhûnöng he ka hom bök? wâ bi, e ka o but ûthumetu hlöng ju hwanuma, ke kât ju hlingin kâu: hawa, ca e bi hoton hwan li can tuhan?

³³ Ke e ame tiga ûhnenamö mödrin, wâ bi, ame o but kâu ûthumetu: me e ame ha, ka habe, Wâ bi, ûnyi ga Iehova kong ang; anyin a ieû oge me he ka halubahing Iehova hmetu?