II. Je Than 5 - Iaai Bible 1901 (New Caledonia)

¹ HABA Naamana a taben vat anyin than Suria, me e at ae gan unyin tuhan, kʼ adre me ogânâ, anyin a Iehova ame omelö at Suria a deny e; ke e at ae hwege, ke lepera bi.

² Ke haba at Suria ödrin e hia but he a ûnyâ vat, kʼ adre hûgûnâ ûnyi hnyi hnyei Isaraela ke in ae ûhnyûkong; kʼ ame bi athnyaba ka öiö Naamana.

³ Ke haba in ame ha ka momo at ame muso e, ka habe, E na laba ju tuhok unyin perofeta wale hnyi Samaria! anyin a e ame he ka omelö e ûnyi hnyi anyin lepera.

⁴ Me ame didro ke at me thumeto tuhan, ka habe, Ame ha helang me helâe in ûheny hnyi hnyei Isaraela.

⁵ Me haba than Suria ame ha, ka habe, Awe, oge me he ka kunâ tusi ka than Isaraela. Me e ame he, kʼ ame tha hom me ta je talan sileva a ten, ke siks thauzan je sekel gol, ke ten ta hna khaû.

⁶ Ke e ame hom tusi ka than Isaraela, ame ha, ka habe, E ka o köu tusi ang, me wâ bi, oge me hia but kunö Naamana a athnyabaik köu, mʼ u me he ka omelö e hnyi anyin lepera.

⁷ Ke a hia but than Isaraela aû tusi, me e ame kia anyin ûkhaû, me ha, ka habe, Hawa, iny Khong, he ka hlingâ me omelö, me me kunâ könya at ang he ka ohia lepera ge ke at? Ke wâhmakhmetoâ thö, me wâ, a e ame heleû can gak.

⁸ Ke a long ut Elisaia aten Khong a gʼ ame kia anyin ûkhaû than Isaraela, me e ame ûkhûnöng ka than me ha, ka habe, Ieû gam u je kia ânyâm ûkhaû? e so e ame he jem könya, me e ame he bi ka wâhmakhmeto ae hu perofeta hnyi Isaraela.

⁹ Me ame o Naamana tha e me haleny je hors me anyin kariota me tot hnyi hwanumen uma umo Elisaia.

¹⁰ Haba Elisaia ame kunâ ûthumetu kâu me ha, ka habe, He thö ka soû ama oseven hnyi Joridano, me ame be ka so hmetu unyâm me hât.

¹¹ Ke ame hmönyi Naamana, me e ame be, me ha, ka habe, Wâ bi, oge me ûnykûme a e ame he ka didrut me tot me hawâ iö Iehova a Khongon, me aba dok eling ge hnyamen, me ohia lepera.

¹² Hawa, e ca beönua bi Abana me Farapa li wageweiny Damaseko bon ta je köiö hia thithö hnyi Isaraela? hawa, oge me ca he ka soû hnyin me inye so but? Me e ame hwio me he hmonyin.

¹³ Haba lathnyabainy ödrin e hakekenyâ e me ha, ka habe, Cica, hawa, a ne ha perofeta köu ûnyi ae gan hmâ, u me ca he ka ânyâ? ke ca hâhâ köu ûnyi e a ha, ka habe, Soû but me u me so?

¹⁴ Me e ame he me oseven khut hnyi Joridano helâ me hofuc hwan aten Khong: me ame hmetu utioiny helâ me utioiny wanakat ae ûhnyûkong, ke e ame so but.

¹⁵ Me e ame hmetu ka aten Khong, e me anyin bunyen hia, me o, me tot hnyi hnyimakan: ke e ame ha, ka habe, Wâ bi, oge me wâ ju walang ang, ae ba Khong hnyi hmeledrany hia, ke hnyi Isaraela thibi: ke walang ang ö u hom dö bwihlany gak a athnyabaem.

¹⁶ Ke haingen, ka habe, Kia inya Iehova at oge me tot hnyi hnyimakan, a oge me ca he ka hom ke ûnyi. Ke e ame ûjengö e he ka kap; ke e ame höcö.

¹⁷ Haba Naamana ame ha, ka habe, Hawa, a ne ca eling, ö u hnʼ ödrin he ka ham ka athnyabaem tang kânâ ame aijen li miul, anyin ame ca he hmetu athnyabaem ka hudo hudiny leû me ke hut bi ka ke je khong ke so bi kö Iehova thibi.

¹⁸ Ke haba hnyi ûnyi ang e so ame he Iehova ka betenge ka athnyabaem; e ka didro tuhok hnyin uma umo Rimona he ka khudrung eling, ke e ame cimâ hnyamok, me oge me nom hnyi uma umo Rimona, haba iny ka nom hnyi uma umo Rimona, me e so ame he Iehova ka betenge ge athnyabaem hnyi nnyi eling.

¹⁹ Ke e ame ha, ka habe, He thö me hnahic. Me e ame he gan, kʼ ame ca sâkâû ûheny.

²⁰ Ke haba Gehazi athnyabai Elisaia aten Khong ame ha, ka habe, Wâ bi tuhok ame betenge ga Naamana at Suria, kʼ ame ca kap ûnyi hnyi li hnyamen ûnyi e ame hom jem: kia inya Iehova a oge me he ka wâdring hoton me hom gan ke ûnyi.

²¹ Me Gehazi ame he hotu Naamana. Ke a wâ but Naamana a ga wâdring hoton ke at, me e ame utut ûheny hon kariota he ka ûkbanö mē, me ha, ka habe, Hawa e so hia?

²² Haingen, ka habe, E so hia. Ke a kunö nya tuhok he ka ha, habe, Wâ bi ame o könya walang ang li hidröu ûhedru hnyi hnyei ae hut hnyi Eferaima, hanen lakon je perofeta; ö u ham ju ködru khaca talan sileva, ke lo li hna khaû.

²³ Haba, Naamana ame ha, ka habe, E so ka hom lo: li talan. Ke e ame ûjengö e, me e ame ca li talan sileva hnyi hnyin li tang, me li hna khaû, me ip hon li lathnyabainy, me ödru me hom tilâ hnyi hnyimakan.

²⁴ Ke e ame o but ka hnyi dok ae hut, me e ame, hom ta je ûnyi e gadru, me ip hnyin uma: me e ame kunâ li at, mʼ ödru me he.

²⁵ Ke e ame didro me tot hnyi hnyimakan tuhan. Ke haba Elisaia ame ha kâu, ka habe, Gehazi lö u je mua? Me e ame thu, ka habe, E ba dok a mwi hnyin athnyabaem.

²⁶ Ke haingen kâu, ka habe, Hawa, ame ca he unyâm hnyekuk kʼ ame hwio thö at ûheny hon anyin kariota he ka ûkhanö möû? Hawa, e ûcû ûen ang he ka kap sileva, me je ûkhaû, me je hnyei elaio me vine, me je mamoe me bolok, me lathnyaba obaga me omomo?

²⁷ Anyin a wale ame he ka kece köu me je mâtrânâm nyiele baluae lepera anyi Naamana. Me e ame didrut gan a e lepera but ke hau helâ me kiona.