II. Je Than 4 - Iaai Bible 1901 (New Caledonia)

¹ KE ame tenge kö Elisaia ke momo âiân ke nokon je perofeta, me ha, ka habe, A mokcu öiök athnyabaem: ke u me wâ e at ame outö Iehova, athnyabaem: ke ame o but at waleji e ame hom gufa gan, he ka hom lakuk li baga he ka bi athnyaba.

² Haba Elisaia ame ha ka momo, ka habe, Ieû oge me ânyâ hobi köu? ha thö könya; ie ûnyi unyâm hnyin umâm uma? Haingen momo, ka habe, E ba but ûnyi unyik a athnyabaem hnyin uma, ke tap wakaco thibi.

³ Ke e ame ha, ka habe, he thö ka me sumâtâ ke je kaia unyin tavat hia adre me laba hakekenyi u, je kaia ae ba önyen; ca owakhaletâ bi.

⁴ Ke u me he ka tha didro me lakom me hlöng hwanumâm, me hingâlâ ka hnyi je kaia hia eling, me ip je kaia ae unöngöt.

⁵ Haba momo ame he but gan, me hlöng hwanumen me lakon; ke ʼödrin e hom je kaia kâu, me e ame hingâlâ.

⁶ Kʼ ame unöngöt je kaia, haba momo ame ha ka nokon, ka habe, Hö jem ke kaia. Ke haingen kâu ka habe, E ba hmetu kaia. Me ame todru wakaco.

⁷ Ke haba momo ame he me thumeto aten Khong. Ke haingen, ka habe, He thö ka ûco wakaco me bi hwaban hna hok gufa, ke u me he bi me lakom ka möt ge kolon.

⁸ Ke haba hnyi ke bong Elisaia ame he Sunema ai, ke wale ke momo ae ûnyi hnathu; ke e ame thawâ e he ka han. Ke haba hnyi je ûen e ame vheno gethen, e ame labö saû kâe he ka han.

⁹ Ke momo ame ha ka âiân, ka habe, Wâ bi e khanö nya a aten Khong ae kap e, at ame labö he eang.

¹⁰ Otu me he ka ânyâ hnyeule ae ûhnyûkong hon hna up haginy; ke otu me he ka ip eling hobi kâu, hna mokut, me laulau, me tap, me taben lamepa: ke e ka o kötu, me ame he ka saû kâe.

¹¹ Ke hnyi ke bong e ame o kâe, me saû ka hnyi hnyeule, me mokut eling.

¹² Ke e ame ha kö Gehazi a athnyabainy, ka habe, Hawâ thö momo Sunema. Ke e a hia but hawâ, me e ame tot hnyi hnyimakan.

¹³ Ke e ame ha kâu, ka habe, Ha thö ka momo, ka habe, Wâ bi, u je kong hnyekuni ohmu ge ta je ûnyi hia eang adre penapena; ie ûnyi adre me he ka ânyâ hobi köu? hawa, u je wem adre me he ka haiö u ka than, ame ne taben utbavat? ke momo ame ha ka habe, Inya oge me laba thibi me je lahanök.

¹⁴ Ke haingen, ka habe, Ie ûnyi adre me he ka ânyâ hobi kâu momo? Haba Gehazi ame thu, ka habe, E ba nokon, ke hingat ut âiân.

¹⁵ Me haingen, ka habe, hawâ hmeto. Ke a hia but hawâ, me ame tot momo hnyi hwanuma.

¹⁶ Me ame ha, ka habe, Cicö ûen ang hnyi huna ame he ka o, me u ma he ka delûâ ke da. Haingen momo, ka habe, Ohe, than a aten Khong u me ca he ka thoi ka athnyabaem.

¹⁷ Ke ame erkin dut momo me hnokoâ da huyi ûen eling hnyi huna ame o wale a ha Elisaia ka momo.

¹⁸ Ke ame gan dut da, me haba hnyi ke bong e ame he unyin kamen ka tavat subö hwit.

¹⁹ Ke haingen ka kamen, ka habe, Ekölö ge bök, ekölö ge bök. Me e ame ha ka athnyabainy, ka habe, Hom do ka hinyen.

²⁰ Ke e ame hom e, me hom ka hinyen, me e ame laba hon li jevan momo ke ne o but jebigö, kʼ ame mokcu.

²¹ Ke haba momo ame öliâ, me ip e hon hna mokut a hnen aten Khong, me hlöng hwanumen, me didrut.

²² Ke haba momo ame hawâ âiân me ha, ka habe, Ö u kunâ thö könya ke athnyaba me asina, mʼ inye he ka wadring ka aten Khong, me ie hmetu.

²³ Me haingen, ka habe, Anyin a ieû u me he kâu hnyi bong ang? ke ca teb ûnyi tehi me sabath ang. Me haingen momo, ka habe, ame he ka so.

²⁴ Ke haba momo ame hûkâlâ taben hon asina, me ha ka athnyabainy, ka habe, Alen logotâ me he; ke ca obeci nya hnyi ûhek iny ka ca ha bi köu.

²⁵ Ke ame he momo me o ka aten Khong hnyi bucen Karemela. Ke ame wâʼ momo ke tiga sâkâû, me ame ba kö Gehazi a athnyabainy, ka habe, Wâ bi, ame he jem momo Sunema:

²⁶ ö u wadring dö walang ang he ka ûkhanö me, me hnö, ka habe, Hawa, u so? ke so âiâm? ke so wanakat? Me haingen momo, ka habe, E so.

²⁷ Ke ame o but momo ka aten Khong hnyi dok ae hut, me ame kât li can. Me haba Gehazi ame hakekeny he ka hagutâ momo; ke haingen aten Khong, ka habe, Ca ânyâ: anyin ae vec hnyekon momo; kʼ ame ikhâlâ gak Iehova a ca thumetu nya.

²⁸ Ke haingen momo, ka habe, Hawa, than a tuhok lö, oge me sumâtâ gam da î Hawa, oge me ca ha köu, ka habe, Ca iyawö nya bi?

²⁹ Me e ame ha kö Gehazi, ka habe, Hûkâlâ ju wen hnyekom, me hom anyik uci hnyi hnyamâm, me he: ame ne ûkhanö möu ke at, ca iouny mē; ke ame ne fuc köu ke at, ca fuc bi: ke u me he ka ip anyik uci hon hnyimakan wanakat.

³⁰ Haba hinyen wanakat ame ha, ka habe, Kia inya Iehova, ke kia inya u, a oge me ca he ka hnö u. Me e ame todrö me he hoton momo.

³¹ Ke ame bö Gehazi kʼ ame bilidra, me ip uci hon hnyimakan wanakat, ke ba hwan, ke ame ca long. Me e ame hmetu he ka ûkhanö mē, me ha kâu, ka habe, Ame ca hmak bi wanakat.

³² Kʼ ame o but Elisaia ka hnyi uma, me wâ bi, a mokcu wanakat, ke adre ip hnyi hon hnen hna mokut.

³³ Me e ame didro me hlöng hwanumödru, me hic kö Iehova.

³⁴ Me e ame he me mokut takoû wanakat, me ip hnyimen hon hnyimen wanakat, me li emakan hon li emakan wanakat, me li hnyamen hon li hnyamen wanakat: me e ame hlöhlöu hon, me ame mage unyin wanakat.

³⁵ Ke e ame hmetu me okhaca ngenu hnyi hnyin uma; me e ame ölö me hlöhlöu hnyi hon wanakat: ke haba wanakat ame ibi oseven cingö, me ame bwela thö li emakan wanakat.

³⁶ Me e ame hawo Gehazi, me ha, ka habe, Hawa thö at Sunema. Me e ame hawâ e. Kʼ ame o but momo kâu, me e ame ha, ka habe, Hom dö nokom da.

³⁷ Ke haba momo ame didro me ta ju ka hnyi li can, me nom hnyikânâi; me e ame hom nokon da, me didrut.

³⁸ Ke Elisaia ame hmetu Gilegala ai: ke ame hmiâ thö hnyei; ke ame laba hnyi hnyimakan lakon je perofeta: me e ame ha ka athnyabainy, ka habe, Ip ju öt ae gan me öli jeû hobi kâu lakon je perofeta.

³⁹ Me ame he ke at ka hnyi hnyot he ka uö khölak, me e ame wâ ke ûkaia hnyi hnyot me tau wan, me unöngötö ûlainy me hom, me heleâ ka hnyi öt jeû; anyin adre ca wâhmakhmeto ûö e.

⁴⁰ Ke ödrin e hingâlâ hobi kâu tavat he ka han. Ke ödrin e tiga han hna öt jeû, me ödrin e kuku, me ha, ka habe, Aten Khong lö, e hu hnân mekiny hnyin öt. Ke ca khanʼ ödrin bi he ka han.

⁴¹ Haba e ame ha, ka habe, Hok falawa. Me e ame ip e hnyi öt; me haingen, ka habe, Hingâlâ but hobi kâu tavat, mʼ ödrin e han. Ke ba but kongon hnyin öt.

⁴² Ke ame o but ke at ûheny Baala-salisa, ke ame hom ka aten Khong aretoiny je wan a bân, a twente je areto bali, me je ban hwit ae hât hnyi tangen tang. Me haingen, ka habe, Ham dö ka tavat mʼ ödrin e han.

⁴³ Haba athnyabainy ame ha, ka habe, Hawa, oge me he ka ip e hnyi hnyimakan tavat a wan haded? Me ame thu, ka habe, Ham dö ka tavat mʼ ödrin e han; anyin a walang hna ha hnö Iehova, ka habe, Odrin e he ka han, kʼ ame he bi ka hu kolon.

⁴⁴ Me e ame ip hnyi hnyimaködrin, me ödrin e han me hu kolon bi, hoton hofuc ho Iehova.