II. Je Than 25 - Iaai Bible 1901 (New Caledonia)

¹ KE haba hnyi huna a naininy anyin musi, hnyi tehi a teniny, hnyi bong a teniny tehi, ame o but Nebukaneza than Babulona, me anyin je utbavat hia, ka Jerusalema, me hunuma cicö e; me ödrin e otilâ igigilo e je tap hnân vat.

² Me adre me thelöng taun ke ne o but hnyi huna a eleveni Zedekia than.

³ Ke haba hnyi bong a naininy tehi a vakiny e gan hmâ hmiâ hnyi taun, me ba jeû hobi kâu aten hnyei.

⁴ Ke adre me kia taun, me ame kec tavat vat hia hnyi hnyinghet, ödrin e gethen hnyi homagöule wanben li hak veto, hnyi utkânâ iny than: (ke e bi at Kaledaia cicö taun igigilo:) ke haba than ame kec hnyi getheniny dok ae tha hon.

⁵ Me haba utbavat anyin at Kaledaia adre me hnu than, me khaû ju e hnyi dok ae tha hon hnyi Jeriko: ke ame ve kec ut anyin utbavat hia gan.

⁶ Ke Ödrin e kât than me hom e ka than Babulona Ribela ai; ke ödrin e owisa kâu.

⁷ Me ödrin e hlingâ je laku Zedekia hnyi hnyimakan, me ûâ li emakö Zedekia, me ca e ge fao me hom e Babulona ai.

⁸ Ke haba hnyi tehi a thabûnginy, hnyi bong a seveniny tehi, wale huna a naintini Nebukaneza than, wale than Babulona, me ame o but Nebuzaradana taben tavat tue, athnyabainy than Babulona, Jerusalema ai:

⁹ me e ame thong degecâ uma umo Iehova, me uma umen than; me je uma hia hnyi Jerusalema, wale je uma ae gan, e ame thong degecâ ge meic.

¹⁰ Ke haba utbavat hia anyin at Kaledaia, unyin taben tavat tue, ödrin e hagutâ hnyikânâi hna up haginy Jerusalema igigilö.

¹¹ Ke haba je kolon tavat hia a hnen biju hnyi taun, me tavat adre me kec waleji adre kec ka than Babulona, me kolon tavat ae se, haba Nebuzaredana taben tavat tue ame hom bâ.

¹² Ke haba taben tavat tue ame ip biju ke je hnyat ae theduoc hnyi hnyei, me hnân hnyat tuö je hnyei vine, me tavat belök.

¹³ Ke haba li hmolom bras hnyi uma umo Iehova, me je taben, me taben köiö bras hnyi uma umo Iehova, haba at Kaledaia ödrin e susubâ me hom brasiny Babulona at.

¹⁴ Ke haba je öt, me je soi, me je uthesiûn, me je spun, me je kaia bras hia waleji adre huliwan, ödrin e hom.

¹⁵ Ke haba je taben wahleûhleû, me je kaia, e ka gol me adre me hom goliny, ke e ka sileva, me adre me hom silevainy, hnen taben tavat tue.

¹⁶ Lo li hmolom, ke khaca taben köiö, me je taben waleji a ânyâ Solomona hobi kâu uma umö Iehova; ca hnân tuluto bi bras hnyin je ûnyi hia eling.

¹⁷ Eitin kubit ibeûen goranyai ke hmolom, ke e hu ovejien hon ban e: ke haba ibeûen goranyai ovejien kun ta kubit; me hna huliwan boert me rimona igigilö ovejien, bras hia: ke helâe minya hmolom a loiny, me ûnyi a boert.

¹⁸ Ke haba taben tavat tue ame hum Seraia at bihut ae beönua, me Zefania at bihut a loiny, me kun ta hnyat tuö hwanuma:

¹⁹ Ke ûnyi hnyi taun e ame hom ke eunuka at ame muso tavat vat; ke ödrin thabûng tavat bwele ka wâ hnyimakan than, adre wâ hnyi taun; me at sihnalimen anyin taben utbavat, at ame ûkhacaköuâ tavat aten hnyei; me ödrin sikste tavat aten hnyei, adre wâ hnu taun.

²⁰ Ke haba Nebuzaredana taben tavat tue ame hum ödrin, me hom Ribela ai ka than Babulona.

²¹ Ke haba than Babulona ame hlingʼ ödrin hnyi Ribela, hnyi hnyei Hamath. Me adre me hom hwenbâ Juda ûnyi hnyi idrin hnyei.

²² Ke haba tavat a je kolon hnyi hnyei Juda, waleji a ip biju Nebukaneza than Babulona, e ame otilö Gedalia nöku Ahikama nöku Safana hudrin.

²³ Kʼ a long ut je taben vat hia, ödrin me je atödrin a haba than Babulona ame otilö Gedalia, me ödrin e o kö Gedalia hnyi Mizepa, wale Isamaela nöku Nethania, me Johanana nöku Karea, me Seraia nöku Tanumeth at Netofa, me Jazania nokon at Maaka, ödrin me je atödrin.

²⁴ Haba Gedalia ame khemanyin ködrin me je atödrin, me ha ködrin, ka habe, Ca he öbun ka outen lathnyabainy at Kaledaia: laba ju hnyi hnyei me bi athnyaba ka than Babulona, me ame he ka so köbun.

²⁵ Ke haba hnyi tehi a seveniny ame o but Isamaela nöku Nethania nöku Elisama, hanen je mâtrâniny than, ke ödrin ten tavat unyin, me e ame kuc Gedalia, me e ame mokcu, me at Juda me at Kaledaia tavat a tha e mē hnyi Mizepa.

²⁶ Me ame todru tavat hia thithö ae ûhnyûkong me gan, me je taben vat, me o hnyi Aigupito: anyin a ödrin e outen at Kaledaia.

²⁷ Ke haba hnyi huna a thote seveniny bâ a Jehoakin than Juda, hnyi tehi a twelviny, hnyi bong a twente seveniny tehi, me habâ Evile-merodak than Babulona ame ogöranyâ bö Jehoiakin than Juda ûnyi hnyi uma ceat hnyi huna a hwân hnyin he ka musi;

²⁸ me e ame ha kâu hofuc ae menyik, me e ame ogöranyâ anyin theron hon je theron anyin ta je than a hnyat ödrin e tha laba mē hnyi Babulona.

²⁹ Ke e ame ham kâu je ûkhaû a hwaban je ûkhaûen uma ceat, ke e ame hnyi han hnyi hnyimakan bala hnyi ta je bong hia bongon möt.

³⁰ Ke haba jekhon adre me labö ham kâu, me jekhon ûnyi ge than, hnyi ke bong me ke bong ke jekhon, hnyi ta je bonginy hia anyin möt.