II. Je Than 24 - Iaai Bible 1901 (New Caledonia)

¹ HABA hnyi bongon je bong ame o but Nebukaneza than Babulona, me haba Jehoiakima ame bi athnyabainy hnyi kun ta huna: ke e ame tot me hna degecâ e.

² Ka haba Iehova ame kunâ kâu je deo vat anyin at Kaledaia, me je deo vat anyin at Suria, me je deo vat anyin at Moaba, me je deo vat anyin laku Amona, me kunʼ ödrin Juda ai he ka ohia e, helâ me hofuc ho Iehova waleji e ame ha a deny lathnyabainy a je perofeta.

³ E hnathu a ûnyi ge hna hûna hnö Iehova, me me o ûnyi eling ka hnyi hon at Juda, he ka hum ödrin ûnyi hnyi hnyimakan, can je hulö anyi Manase, hoton hnen hna ânyâ;

⁴ me can minya dra ae ba hnyikongon, waleji e ame hingâlâ; anyin a e ame ounöngötâ Jerusalema ge dra ae ba hnyikongon: ke ame höcö Iehova he ka hna degecâ.

⁵ Ke haba kolon je hna ânyâ hnö Jehoiakima me anyin ta je huliwa hia thithö, hawa, adre me ca sihnalimen hnyi tusi hnân ha je bong bongon je than Juda?

⁶ Ke ame mokut ut Jehoiakima tha e me lakamen, ke ame than biju Jehoiakina nokon hwaban.

⁷ Ke ame ca o hmetu bi than Aigupito ûheny hnyi iny hnyei: anyin a than Babulona ame hia but hûgûnâ hia je hanymen than Aigupito, hwân hnyi wagewe Aigupito ke ne o but hnyi wagewe Euferati.

⁸ Eitin je hunai Jehoiakin hnyi ûen e ame hwân ka than; ke e ame musi hnyi Jerusalema hnyi kun ta tehi: ke haba ien hinyen me Nehuseta, nöku Elenathana at Jerusalema.

⁹ Ke e ame ânyâ ûnyi ae kong hnyi hnyimakö Iehova, helâ me hna ânyâ hia ge lakamen.

¹⁰ Ke hnyi ûen e, ame o but lakei Nebukaneza than Babulona ka hnyi Jerusalema, me adre me thelöng taun.

¹¹ Ke haba Nebukaneza than Babulona ame o ka hnyi taun, ke ame tiga thelöng e ge lakeiny;

¹² me ame he but Jehoiakin, me hinyen, me anyin je taben, me anyin je eunuka ka than Babulona: ke than Babulona ame hom e hnyi hunainy ka musi a eit.

¹³ Ke e ame hom but ûheny e ta je omjeûiny hia uma umo Iehova, me je omjeûiny uma umen than, me susubâ je kaia gol hia waleji a ânyâ Solomona than Isaraela hnyi uma umo Iehova, helâ me Iehova ame ha.

¹⁴ Ke e ame hom Jerusalema hia, me je than hia, me tavat hwege vat hia, a ödrin ten thauzan je bâ, me tavat ae metâ hia hnyi ta je huliwa, me tavat huliwan fao; e ba but kolon, ke so bi tavat thiju ae theduoc hnyi hnyei.

¹⁵ Ke e ame hum Jehoiakin Babulona ai; tha e me hinyen than, me laâiân than, me anyin je eunuka, me je homakan hnyei, e ame hum ödrin a je hwenbâ Babulona ai ûheny Jerusalema.

¹⁶ Ke haba tavat hwege hia ödrin seven thauzan, me haba je hnyat ae metâ huliwa, me hnyat huliwa fao ödrin wan thauzan, a tavat hwege hia me khanʼ ödrin vat, haba tavat eling than Babulona ame hom Babulona ai a je hwenbâ.

¹⁷ Ke haba than Babulona ame otilö Matania ka than, a liamekeiny me kamen, me hnân hwaban, me hwenyi ien e me Zedekia.

¹⁸ Twente wan dut je hunai Zedekia hnyi ûen e ame hwân ka than; ke e ame musi hnyi Jerusalema hnyi eleven je huna: ke haba ien hinyen me Hamutala nöku Jeremia at Libena.

¹⁹ Ke e ame ânyâ ûnyi ae kong hnyi hnyimakö Iehova, helâ me hna ânyâ hia hnö Jehoiakima.

²⁰ Ke haba Iehova ame hmonyin ka Jerusalema me Juda ke ne o but e ame digic ödrin hnyi hnyimakan bi: ke haba Zedekia ame hna degecâ than Babulona.