II. Je Than 23 - Iaai Bible 1901 (New Caledonia)

¹ KE haba than ame ûkhûnöng, me ödrin e ûkhacaköu kâu wahingatiny hia Juda me Jerusalema.

² Haba than ame he ka hnyi uma umo Iehova, tha e me tavat Juda hia, me aten Jerusalema hia, me tavat bihut, me ta je perofeta, me tavat hia ae ûhnyûkong me gan: ke e ame aû hnyi je hnyikönyidrin ta je hofuc hnyi tusiny ûhihinyköu adre wâ hnyi uma umo Iehova.

³ Kʼ ame tot than hnyi tap me ânyâ ûhihinyköu hnyi hnyimakö Iehova, he ka he hotu Iehova, me tuö anyin ta je hnanyibu, me hnen ta je hna ohnatho, me hnen je hna otilâ, ge hnyekon ae bekhot me hanon ae bekhot, he ka ânyâ je hofuc hnyi ûhihinyköu ang, adre me sihnalimen hnyi tusi ang: me haba tavat hia adre me tot hwege ka hnyi ûhihinyköu.

⁴ Me haba than ame hûnö Hilekia at bihut ae nua, me tavat bihut a loiny, me tavat tuö hwanuma, he ka hom ûnyi hnyi hnyin uma umo Iehova je kaia hia adre ânyâ hobi kö Baala, me Aseira, me hobi kâu ta je ûnyi hia hnyi drany: me e ame thong degecâ hnyi hoton Jerusalema hnyi je utkânâ hnyi Kederon, me hom je dron Beth-ela ai.

⁵ Me e ame obâ hnyat bihut anyin je idola, wale a otilâ je than Juda he ka leû utö ae bo so hnyi je dok ae görany hnyi je taun hnyi Juda, me je dok a igigilo Jerusalema; me tavat leû utö ae bo so kö Baala, me seûno, me tehi, me je okhû, me ta je ûnyi hia hnyi drany.

⁶ Ke e ame hom but Aseira ûnyi hnyi hnyin uma umö Iehova hoton Jerusalema ai ka hnyi wagewe Kederon, me thong degeci ödrin hnyi wagewe Kederon, me omomono e, me khûâ but dröuiny hon je erkemok anyin houmonu.

⁷ Ke e ame thö hnyikânâi je uma umen tavat adre me hwen Sodoma wale hnyi uma umo Iehova, a hwâwâ hnyin je mano singiny Aseira hnen omomo.

⁸ Ke e ame hom tavat bihut ûnyi hnyi je taun Juda hia, me oikikiâ je dok ae görany ame leû hnyin uto ae bo so ge tavat bihut, hwân hnyi Geba ke ne o but hnyi Bere-seba; ke e ame thö degecâ je dok ae görany hnyi je homagöule wale hnyi homagöule Josua at ame muso taun, wale hnyi ke keihen a meny homagouleny taun.

⁹ Ke so bi, haba tavat bihut hnyi je dok ae görany ödrin e ca hnyi he ka hnyi taben hut kö Iehova hnyi Jerusalema, ke ödrin e hnyi an areto adre ca levenâ bi, tha ödrin me je liamekeiny mödrin.

¹⁰ Ke e ame oikikiâ Tofet a e hnyi hnyigöulen bucen iny laku Hinom, me me ca he ke at ka kunâ nokon baga ame ne hlu he ka he hnyi wanben meic kö Moleka.

¹¹ Ke e ame hom je hors waleji a ham je than Juda ka seûno, hnyi hwanuma uma umo Iehova, hnyi baten hnyeule Nathana-meleka, at tuö umen omjeû, wale eiö hnyin haginy; ke e ame thong degecâ je kariota anyin seûnö ge meic.

¹² Ke haba je taben hut walethö hnyi hon ban hnyeule Ahaza, a ânyâ ge je than Juda, me je taben hut a ânyâ Manase hnyi li hnyeuleny uma umo Iehova, me haba than ame kia but, me hagutâ hnyikânâi ûheny e, me khûâ dron ka hnyi wagewe Kederon.

¹³ Ke haba je dok ae görany cicö Jerusalema hnyi ke keihen metân buceniny hnaûhango, waleji a ânyâ Solomona than Isaraela hobi kö Aseira ûnyi ae ikiki anyin at Zidona, me hobi kö Kemosa ûnyi ae ikiki anyin at Moaba, me hobi kö Milekoma ûnyi ae ikiki anyin je laku Amona, me haba than ame oikikiâ.

¹⁴ Ke e ame kot omomono je veto ame tot, me sö degecâ je Aseira, me ounöngötâ hnödrin je hna tot hnyin ge je jeien je komok.

¹⁵ Ke haba taben hut minya hnyi Beth-ela, me dok ae görany waleji a ânyâ Jeroboama nöku Nebata, at a okûâ hwakecin ae monu anyin at Isaraela, haba taben hut me dok minya ae görany, e ame hagutâ hnyikânâi; ke e ame thong degecâ dok ae görany me oamamâ e, me thong degecâ Aseira.

¹⁶ Ke haba Josea ame hwio me wâ je erkemok ae hnyi bucen; me e ame ûkhûnöng he ka hom je jeien komok ûnyi hnyi je erkemok me thong degecâ hon taben hut me oikikiâ e hoton hofuc ho Iehova, waleji a ha aten Khong, wale at a ba je hofuc ang.

¹⁷ Ke e ame ha, ka habe, Ie ûnyi hnân ûnykûme eling oge me wâ? Ke ame thu kâu aten taun, ka habe, Wale erkemok hon aten Khong, at a o ûheny Juda, me ha ta je ûnyi e wale u je hia but ânyâ ka taben hut hnyi Beth-ela.

¹⁸ Ke haingen, ka habe, Hnen biju e; ca he ke at ka hom but je jeien. Me ame hnen ju je jeien tha e me jeien perofeta at ame o ûheny Samaria.

¹⁹ Haba Josea ame hom but je uma hia hnyi je dok ae görany hnyi je tauniny Samaria waleji a ânyâ je than Isaraela he ka okûâ hmonyin anyi Iehova, me ânyâ ködrin helâ me hnen hna ânyâ hnyi Beth-ela.

²⁰ Ke e ame hlingâ je at bihut hia anyin je dok ae görany eling, hon je taben hut, me thong je jeien ta je komok hon; me e ame hmetu Jerusalema ai.

²¹ Haba than ame hûna ka tavat hia me ha, ka habe, He thʼ öbun ka tuö paseka kö Iehova Khongubun, helâ me hna sihnalimen hnyi tusiny ûhihinyköu eang.

²² Ke ba ke paseka adre tuö helâe, hwân hnyi je bong bongon je hnyat owisa wale adre owisa Isaraela, me hnyi je bong hia bongon je than Isaraela, me je than Juda;

²³ ke so bi hnyi huna a eitini Josea than adre me ânyâ paseka ang kö Iehova hnyi Jerusalema.

²⁴ Ke haba tavat a ödra tren biobotkong, me bi khong, me je terafi, me je idola, me je ûnyi hia ae ikiki adre me wâ hnyi hnyei Juda, me hnyi Jerusalema, me, Josea ame ohia, me me he ka ohwâdâ je hofucin hnanyibu adre sihnalimen hnyi tusi a wâ Hilekia at bihut hnyi uma umo Iehova.

²⁵ Ke ba than a helâ mē ehac, ame hwio kö Iehova me hnyekon ae bekhot, me hanon ae bekhot, me hwegien ae bekhot, hoton ta je hnanyibu hia anyi Mose; ke a ca o bi ke at ae ûcû hwaban.

²⁶ Ke so bi Iehova ame ca hwio ûnyi hnyi anyin hmonyin ae gan wale e ame hmonyin ka Juda, can ta je hwakecin hia a ânyâ Manase he ka ohmönyinâ e.

²⁷ Ke haba Iehova ame ha, ka habe, Oge me he ka hom Juda ûnyi hnyi hnyimakök, helâ me hnok hna hom Isaraela, ke oge me he ka degec taun ang oge ûca wale Jerusalema, me uma wale oge ha gan, ka habe, Ame he ka hnen e iök.

²⁸ Ke haba kolon je hna ânyâ hnö Josea, me anyin ta je huliwa, hawa, adre ca sihnalimen hnyi tusi hnân ha je bong bongon je than Juda?

²⁹ Hnyi bongon je bong ame o but Farao-neko than Aigupito he ka vat me than Asuria hnyi wagewe Euferate: ke haba Josea than ame he he ka vat mē; ke ödru me iouny dö, me e ame hlingâ e hnyi Megido.

³⁰ Haba lathnyabainy ödrin e hom unyin a mokcu hon kariota ûheny Megido, me hom e Jerusalema ai, me konâm e hnyi hon erkemok. Haba tavat aten hnyei ödrin e hum Jehoaza nöku Josea, me hû e, me otilâ e ka than hwaban kâmen.

³¹ Twente theri but je hunai Jehoaza hnyi ûen e ame hwân ka than; ke e ame musi hnyi Jerusalema kun ta tehi: ke haba ien hinyen me Hamutala momo nöku Jeremia at Libena.

³² Ke e ame ânyâ unyi ae kong hnyi hnyimakö Iehova, helâ me hna ânyâ hia ge lakamen.

³³ Ke haba Farao-neko ame ca e hnyi Ribela hnyi hnyei Hamath, me me ca he ka musi hnyi Jerusalema; me e ame kunâ tavat he ka fat khaca haded je talan sileva, ke khaca talan gol.

³⁴ Ke haba Farao-neko ame otilö Eliakima ka than, a ke nöku Josea, me hwabö Josea a kamen, me hwenyi ien Jehoiakima; ke e ame hum Jehoaza but; ke e ame o but hnyi Aigupito me e ame mokcu eling.

³⁵ Ke haba Jekoiakima ame ham je sileva me gol kö Farao; ke e ame kunâ tavat he ka fat me ham mone helâ me hnanyibu anyi Farao: kʼ ame hawâ ûjengö sileva me gol ûnyi ge tavat aten hnyei, hoton hnen hna ve hawâ fat, he ka ham e kö Farao-neko.

³⁶ Twente faiv but je hunai Jehoiakima hnyi ûen e ame hwân ka than; ke e ame musi hnyi Jerusalema hnyi eleven ta huna: haba ien hinyin, me, Zebuda, nöku Pedaia at Ruma.

³⁷ Ke e ame ânyâ ûnyi ae kong hnyi hnyimakö Iehova, helâ me hna ânyâ hia ge lakamen.