II. Je Than 22 - Iaai Bible 1901 (New Caledonia)

¹ EIT ta hunai Josea hnyi ûen e ame hwân ka than, ke e ame musi hnyi Jerusalema thote wan je huna: haba ien hinyen me Jedida, nöku Adaia ûheny Bozekath.

² Ke ame ânyâ ûnyi ae so hnyi hnyimakö Iehova, me vheno gethen hia de Davita a kiben, kʼ ame ca saû ka hnyi ke keihen metâ me me.

³ Ke haba hnyi huna a eitini Josea than, me haba than ame kunö Basana nöku Azalia nöku Mesulama, at sihnalimen, ka hnyi uma umo Iehova, me ha, ka habe,

⁴ He thö kö Hilekia at bihut ae nua, me me aû je mone adre hom ka hnyi uma umo Iehova, wale a kap hnen tavat tuö hwanuma ûnyi ge tavat:

⁵ kʼ ödrin e he ka ham e ka tavat adre me ânyâ huliwa kʼ adre me tuö uma umo Iehova; ödrin e he ka bâm e ka tavat adre me huliwan uma umo Iehova, he ka okhötâ je dok ae hmouca hnyin uma;

⁶ hobi kâu hnyat tretrau uto, me hnyat up uma, me hnyat up veto; me hnân bi hwaban uto me je veto adre kave he ka ânyâwia uma.

⁷ Ke so bi adre me ca tuluto ködrin mone adre ham ködrin; anyin a ödrin e khenâ hnathoâ.

⁸ Ke haba Hilekia at bihut ae nua ame ha kö Safana at sihnalimen, ka habe, Oge me wâ tusiny hnanyibu hnyi uma umo Iehova. Ke Hilekia ame ham tusi kö Safana, me e ame aû.

⁹ Ke haba Safana at sihnalimen ame o ka than, me thumeto than, me ha, ka habe, A hia but lathnyabaem hingâlâ je mone a e hnyin uma, me ham e ka tavat bi huliwa, tavat adre me tuö uma umo Iehova.

¹⁰ Ke haba Safana at sihnalimen ame thumeto than, me ha, ka habe, Haba Hilekia ame ham könya ke tusi. Me Safana ame aû e hnyi hnyimakan than.

¹¹ Ke a long ut than ta je hofuc hnyi tusiny hnanyibu, me e ame kia anyin je ûkhaû.

¹² Me haba than ame hûnö Hilekia at bihut, me Ahikama nöku Safana, me Akebora nöku Mikaia, me Safana at sihnalimen, me Asaia athnyabainy than, me ha, ka habe,

¹³ He thʼ öbun, me elâm unyi Iehova hnân hobi könya, me tavat, me Juda hia thithö ge onyen tusi ang adre wâ: anyin ae gan hmâ hmonyin anyi Iehova kötin, can a ca long hnen lakamötin hoton je hofuc hnyi tusi ang, he ka ânyâ hia hna sihnalimen gatin.

¹⁴ Me haba Hilekia at bihut, me Ahikama, me Akebora, me Safana me Asaia, ödrin e he kö Huleda perofeta momo, öiö Saluma nöku Tikeva, nöku Hasera, at tuö khaû; (ke haba momo ame laba hnyi Jerusalema hnyi ke keihen a loiny); me ödrin e ûhnenamö me momo.

¹⁵ Ke haba momo ame ha ködrin, ka habe, Walang hna ha hnö Iehova Khongu Isaraela, ka habe, Ha thʼ öbun ka at wale a kunʼ öbun könya, ka habe,

¹⁶ Walang hna ha hnö Iehova, ka habe, Wâ bi, oge me he ka oâ monu ka taun ang me tavat adre me labâ e, wale ta je ûnyi hia hnyin tusi a aû than Juda:

¹⁷ can ödrin e hia but hna degeci nya, me leû uto ae bo so ka je khong, me ohmönyini nya ge ta je huliwa hia anyin je hnyamödrin, anyin a wale ame ubâhlâ thö anyik hmonyin ka dok ang, ke adre me ca he ka omoko.

¹⁸ Ke haba than Juda at a kunʼ öbun he ka elöm Iehova, öbun e he ka ha helâng kâu, ka habe, Walang hna ha hnö Iehova Khongu Isaraela: haba ge ta je hofuc u je long,

¹⁹ anyin ae menyik hnyekom, ke u je ohnyikânâi u bi hnyi hnyimakö Iehova, hnyi ûen u me long hnok hna ha ge dok ang, me tavat adre me labâ e, mʼ ödrin e he ka ba at ke hnaûhango, ke u je kia ânyâm je ûkhaû, me tenge hnyi hnyimakök; awe, haingö Iehova, Oge hia but ling u.

²⁰ Wâ bi, anyin a wale, oge me he ka ûkhacaköuö u tha e me lakâmâm, ke adre me he ka ûkhacaköuö u ka hnyi erkemok kʼ u hnahic, ke ame ca he li emâkâm ka wâ ta je ûnyi hia ae kong oge me he ka oâ ka hnyi dok ang. Me ödrin e hmeto je hofuc eling ka than.