II. Je Than 21 - Iaai Bible 1901 (New Caledonia)

¹ TWELV ta hunai Manase hnyi ûen e ame hwân ka than; ke ame musi hnyi Jerusalema hnyi fifte faiv je huna: haba ien hinyen me, Hefeziba.

² Ke e ame ânyâ unyi ae khong hnyi hnyimakö Iehova, hoton hwakecin ae ikiki anyin ke je hnyei, waleji Iehova ame obâ hnyi hnyimakan lakon Isaraela.

³ Anyin a e ame otilâ hmetu je dok ae görany waleji a ohia ga Hezekia a kamen; ke e ame otilâ je taben hut kö Baala, me ânyâ ke Aseira, helâ me hna ânyâ hnö Ahaba than Isaraela, me khudrung ka ta je ûnyi hia hnyi drany, me bi athnyabaidrin.

⁴ Ke e ame op je taben hut hnyi uma umo Iehova, wale a ha gan Iehova, ka habe, Oge me he ka ip iök hnyi Jerusalema.

⁵ Ke e ame op je taben hut hobi kâu ta je ûnyi hia hnyi drany hnyi li hnyeuleny uma umo Iehova.

⁶ Ke e ame kunâ nokon baga he ka he hnyi wanben meic, ke e ame bihihwakecin, me bi biobotkong, me tha laba unyin tavat tren hanu ae kong, me tavat bi khong: e gan hmâ hulo e ame ânyâ hnyi hnyimakö Iehova, me me ohmönyinâ e.

⁷ Ke e ame otilâ Aseira, wale e ame ânyâ, hnyi uma a ha gan Iehova kö Davita me Solomona a nokon, ka habe, Haba hnyi uma ang, me hnyi Jerusalema, wale oge me ûca ûnyi hnyi je tribu Isaraela hia, me oge me he ka ip iök hnyin nyiele balua:

⁸ ke oge me ca he ka hom li can at Isaraela he ka he ûnyi hnyi hnyei oge me ham ka lakamödrin; ödrin e ne wâ wia he ka ânyâ hia hoton hnok hna hûna ködrin, me helâ me hnanyibu hia waleji a hûna ködrin Mose a athnyabaik.

⁹ Ke so bi ödrin e ca long bi: ke haba Manase ame omonu ödrin he ka ânyâ ûnyi ae kong hon ta je hnyei hia, waleji a obâ Iehova hnyi hnyimakan lakon Isaraela.

¹⁰ Ke haba Iehova ame fuc a deny je perofeta a je athnyabainy, ka habe,

¹¹ Anyin a Manase than Juda ame ânyâ ta je ûnyi eling ae ikiki, me ânyâ ûnyi ae kong hon ta je ûnyi a ânyâ at Amora, tavat a bân, me okûâ hwakecin ae kong anyin at Juda ge anyin ta je idola:

¹² anyin a wale, walang hofuc ho Iehova, Khongu Isaraela, ka habe, Wâ bi, oge me he bi nya ka oâ ûokonguny hnyi Jerusalema me Juda, me me he ka umet hnyikonyen tavat, ödrin ka long.

¹³ Ke oge me he ka lelö hon Jerusalema tulutiny Samaria, me tulut adre otilâ anyin lap anyi Ahaba: ke oge me he ka kot Jerusalema helâ me at ame khut kaia, ame kot e me wia hnyimen hnyikânâi.

¹⁴ Ke oge me he ka hna degecâ kolon ik, me hnʼ ödrin ka hnyi hnyamen je iwhnai-hmiöny mödrin; ke ödrin e he ka je bâ me hna sei hnen je iwhnaihmiöny mödrin;

¹⁵ Anyin a ödrin e hia but ânyâ ûnyi ae kong hnyi hnyimakök, me ohmönyini nya, hwân hnyi bong a o hnyin lakamödrin ûheny Aigupito, ke ne o but hnyi bong ang.

¹⁶ Ke haba khaca, Manase ame hingâlâ dra ae ba hnyikongon e ti gan, ke ne o but ame ti unöngötö Jerusalema gan hnyi je ke keihen hia; me anyin minya hulö wale ame okûâ hwakecin ae kong anyin at Juda, wale he ka ânyâ ûnyi ae kong hnyi hnyimakö Iehova.

¹⁷ Ke haba kolon je hna ânyâ hnö Manase me anyin ta je huliwa, me anyin hulö e ame ânyâ, hawa, adre ca sihnalimen hnyi tusi hnân ha je bong bongon je than Juda?

¹⁸ Ke ame mokut ut Manase tha e me lakamen, me adre me konâm e hnyi utkânâ hnyi umen uma, wale utkânâ anyi Uza: ke ame than biju Amona a nokon hwaban.

¹⁹ Twente tu but hunai Amona hnyi ûen e ame hwân ka than; ke e ame musi hnyi Jerusalema lo li huna: ke haba ien hinyen me Mesulemeth, momo nöku Haruza ûheny Jotebath.

²⁰ Ke e ame ânyâ ûnyi ae kong hnyi hnyimakö Iehova, helâ me hna ânyâ hnö Manase a kamen.

²¹ Ke e ame vheno ta je gethen hia a vheno kamen, me bi athnyabainy je idola wale a bi athnyabainy kamen, me khudrung ködrin:

²² ke e ame hna degeci Iehova Khongon lakamen, me ca vheno bi gethen de Iehova.

²³ Ke haba lathnyabai Amona ödrin e sihnân e, me hlingâ than hnyi umen uma.

²⁴ Ke haba aten hnyei ödrin e hlingâ hia tavat adre sihnö Amona than; ke haba tavat aten hnyei ödrin e otilö Josea a nokon ka than hwaban.

²⁵ Ke haba kolon je hna ânyâ hnö Amona waleji e ame ânyâ, hawa, adre ca sihnalimen hnyi tusi hnân ha je bong bongon je than Juda?

²⁶ Ke adre me konâm e hnyi erkemok hnyi utkânâ anyi Uza: ke ame than biju Josea a nokon hwaban.