II. Je Than 19 - Iaai Bible 1901 (New Caledonia)

¹ Kʼ a long ut Hezekia than, me e ame kia anyin je ûkhaû, me khavâ mano ae gan nân, me he ka hnyi uma umo Iehova.

² Ke e ame kunö Eliakima at ame muso hnyaba, me Sebena at sihnalimen, me je hingat bihut, ödrin e ve khavâ mano ae gan nân, kö Isaia perofeta nöku Amosa.

³ Ke ödrin e ha kâu, ka habe, Walang hna ha hnö Hezekia, ka habe, Haba bong ang bonginy vec, me û, me ûhaikonguny: anyin a o ûen o a je wanakat, ke ba tang hwegien he ka hnokoâ.

⁴ Ame ne he Iehova Khongom ka long la je hofuc hia ho Rabesake, wale a kunâ than Asuria a tuhan he ka haikongoâ Khong ae möt, ke e ame he ka thawâ je hofuc a long Iehova Khongom: anyin a wale hic dö hobi kâu je kolon.

⁵ Me ame he je athnyabai Hezekia than kö Isaia.

⁶ Ke haba Isaia ame ha ködrin, ka habe, Öbun e he ka ha helâng ka tuhöbun, ka habe, Walang hna ha hnö Iehova, ka habe, Ca he bi ka outen je hofuc u je long waleji hnen lathnyabainy, than Asuria hna haikongu nya.

⁷ Wâ bi, oge me he ka ip hnyi hnyekon ke hanu, ke e ame he ka long ke ûthumetu, me me hmetu ka hnyi iny hnyei; ke oge me he ka ota e ge hele vat hnyi iny hnyei.

⁸ Me ame hmetu but Rabesake me wâ than Asuria hnyi Lebena ame vat eling: ke e ame long a ga he but ûheny Lakisa.

⁹ Ke e ame long ga Tiraka than Aithiop, ka habe, Wâ bi, e but ang, kʼ ame he ka vat möu; me e ame kunâ hmetu je ûthumetu kö Hezekia he ka ha, ka habe,

¹⁰ Walang hofuc öbun e he ka ha kö Hezekia than Juda, ka habe, Ca he bi ka iyawö u ge Khongom at u je labageju kâu, ka habe, Adre me ca he ka hna Jerusalema ka hnyi hnyamen than Asuria.

¹¹ Wâ bi, u je hia but long hna ânyâ hnen je than Asuria ka je hnyei hia, kʼ ame ohiʼ ödrin hia: me hawa, adre me he ka omeli u?

¹² Hawa, a hia but je khongon je hnyei omeli ödrin, waleji a ohia ge lakamök, a Gozana, me Karan, me Rezef, me laku Edena hnyi Thelasa?

¹³ Ewa thaniny Hamath, me thaniny Arepada, me thaniny taun Safaravaima, me Hena, me Iva?

¹⁴ Me haba Hezekia ame kap tusi ûnyi hnyi hnyamen uthumetu, me aû: me ame he Hezekia ka hnyi uma umo Iehova, me ame ulolo e hnyi hnyimakö Iehova.

¹⁵ Ke haba Hezekia ame hic hnyi hnyimakö Iehova, me ha, ka habe, Iehova lö, Khongu Isaraela, at ame laba hnyi wanben li kerubi, u thibi Khong hnyi ta je dökhu hia eang hmeledrany; u je op drany me hmeledrany.

¹⁶ Iehova lö, tevehlöng ju, me long; ngele thö me wâ: me long hofuc ho Saneribi, wale e ame kunâ he ka haikongoâ Khong ae möt.

¹⁷ Iehova lö, e hnathu a gʼ ame öba wan je hnyei me je idrin hûen je than Asuria,

¹⁸ me khûâ je khongudrin ka hnyi meic: anyin a ödrin ca je khong, ke so bi huliwa anyin li hnyamen at, a je uto me veto; waleling mʼ adre me ohiʼ ödrin.

¹⁹ Iehova lö, Khonguhmun, ö u omeli ohmun walang ang ûnyi hnyi hnyamen, me me khana ge je dökhu hia eang hmeledrany a u Iehova Khong, a u thibi.

²⁰ Ke haba Isaia nöku Amosa ame ûkhûnöng kö Hezekia, me ha, ka habe, Walang hna ha hnö Iehova, Khongu Isaraela, ka habe, Haba hnyi hnâm hna hic könya ga Sanerebi than Asuria, me oge hia; but long.

²¹ Ke walang hofuc a ha Iehova gan, ka habe, Haba hlu baû a nöku Ziona ame hukötiö u, kʼ ame hlumö u; kʼ ame nyinyikâ ban köu hnen hlu nöku Jerusalema.

²² U je ûhaikonguny me bi gan kö ia? u je ha kö ia hofuc ae hwege me bi gan ka At ae Kap anyi Isaraela.

²³ U je hia but haikongo Than a deny ânyâm je ûthumetu me ha, ka habe, Oge ölö hon bucen, ka hnyin je ke keihen Lebanona, tha e me anyik je kariota ae se hia; ke oge me he ka sö je arasiny ae beû, me je kopiny adre ûca: ke oge me he ka o ka hnyi omtabaga hnyi obiny e, hnyi hnyeuten hna belök.

²⁴ Oge hia but khû an ikanyua me ic, ke haba li hnyeûcak ame he ka ohmö je wageweiny hia Aigupito.

²⁵ Hawa, u me ca long ge hnok hna ânyâ e ehac, me op e hnyi je bong a bân? walang ang oge hia but ohwâdâ a gʼ ame he ka ba wan je taun adre up veten, me me je hudrei

²⁶ Anyin ae ba maniny tavat adre me labâ e, ödrin ot me hmehma; ödrin helâ me hna önying, me ûö ae ometu ae hât, me hna önying hon uma, me hwit ae meleca ae tiga ca metu bi

²⁷ Ke oge wâ but hnâm hna laba me hnâm hna didrut me didro, me hnâm hna ohmö-nyini nya.

²⁸ Can anyin a o but ka hnyi hnyikönyök hnâm hna ohmönyini nya, me hnâm hna bi gan könya, oge me he ka inâ anyik otru hnyi hnyingoiâm, me anyik fao hnyi hnyimâm, ke oge me he ka ohmetu u hnyi gethen u je o hnyin.

²⁹ Ke walang haten köu: a öbun e he ka han ûnyi ame ku hwege hnyi huna ang, ke haba hnyi huna a loiny ûnyi ame ku hwege minya hwaban; ke haba hnyi huna a kuniny öbun e he ka belök, me menu, me ta ta je hnyei vine me ijem wan.

³⁰ Ke haba je kolon lap anyi Juda ae möt, ame he ka kû thö eû me wa goranyai.

³¹ Anyin ame he ka he ûheny Jerusalema je kolon, me ûheny hnyi bucen Ziona je hnyat adre me he ka möt: adre me he ka ânyâ e hnen we Iehova ae gan hmâ.

³² Anyin a wale, walang hna ha hnö Iehova ge than Asuria, ka habe, E ame ca he ka o ka hnyi taun ang, me hlec fana ka hnyin, me e ame ca he ka o hnyi hnyimakan, tha e me je bec, me khon kânâ kâu.

³³ Ke e ame he ka hmetu hnyi gethen a o hnyin, ke e ame ca he ka o ka hnyi taun ang, haingö Iehova.

³⁴ Anyin oge me he ka Bong taun ang he ka omelö e, gak bi, me ga Davita athnyabaik.

³⁵ Ke haba hnyi lit eling ame he but angela anyi Iehova me kot tavat a wan haded ke eite faiv thauzan hnyi hna hunuma anyin at Asuria: ke ame vesâ tavat hnyi hnyomakatu, me wâ bi, ödrin je komok a mokcu hia.

³⁶ Me ame todrö Saneribi than Asuria, me he, me laba hnyi Nineve.

³⁷ Ke e ame laba he ka hmi hnyi uma umo Niseroka a khongon, me haba Aderameleke me Sarezera ödru me kot e ge hele vat, me ödru me kec ka hnyi hnyei Ararata. Ke ame than biju Esar-adon a nokon hwaban.