II. Je Than 17 - Iaai Bible 1901 (New Caledonia)

¹ KE haba hnyi huna a twelvi Ahaza than Juda, me ame hwân Hosea nöku Ela ka than hnyi Samaria hon Isaraela, nain je huna.

² Ke e ame ânyâ ûnyi ae kong hnyi hnyimakö Iehova, ke so bi e ca helâ me je than Isaraela a bân.

³ Ke ame o kâu vat ga Salemanesa than Asuria; ke haba Hosea ame bi athnyaba kâu, me ham kâu je bwihlany.

⁴ Ke a wâ but than Asuria hna sihnân ga Hosea; anyin a e ame hia but kunâ je ûthumetu kö So than Aigupito, me ca kunâ ke bwihlany ka than Asuria, helâ me hnen hna labö ânyâ hnyi ke huna me ke huna: anyin a wale haba than Asuria ame hlöng hwanuma kâu, me ca e hnyi umaʼceat.

⁵ Haba than Asuria ame vheno hnyei hia, me he Samaria ai, me thelöng e hnyi kun ta huna.

⁶ Ke hnyi huna a naini Hosea, haba than Asuria ame hûgûnâ Samaria, me hom Isaraela Asuria ai, me ip ödrin hnyi Hala, me Habora, hnyi wagewe Gozana, me je taun anyin at Madai.

⁷ Ke helâe anyin a je lakon Isaraela ame kong hwakecidrin kö Iehova Khongudrin, at a hum ödrin ûnyi hnyi hnyei Aigupito ûnyi hnyi hmelen hnyamö Farao than Aigupito, me outen je khong,

⁸ me vheno je hnanyibu anyin je hnyei, wale a obâ Iehova hnyi hnyimakan lakon Isaraela, me je hnanyibuiny je than Isaraela, wale ödrin e otilâ.

⁹ Ke haba lakon Isaraela ödrin e ânyâ duöngâ je ûnyi ae ca wisa bi kö Iehova Khongudrin; ke ödrin e otilâ hobi ködrin bi je dok ae görany hnyi anyidrin je taun hia, hwân hnyi tap anyin tavat hmâkâ, ke ne o but hnyi taun adre up veten.

¹⁰ Ke ödrin e otilâ hobi ködrin bi je veto ame tot, me je Aseira hon je bucen hia, me hmelen je ûö hia ae hât:

¹¹ ke ödrin e leû uto ae bo so eling hnyi je dok ae görany hia helâ me je hnyei wale a oc degecâ Iehova hnyi hnyimaködrin; ke ödrin e ânyâ je ûnyi ae kong he ka ohmö-nyini Iehova:

¹² ke ödrin e bi athnyaba ka je idola, waleji a ha Iehova ködrin, ka habe, Ca he öbun ka ânyâ ûnyi e.

¹³ Ke so bi haba Iehova ame haimemenâ ka Isaraela, me Juda, a deny je perofeta hia, me tavat wâ hia, me ha, ka habe, Hwio thö ûnyi hnyi debun ta je gethen ae kong, ke tuö ju hnok je hna hûna, me anyik je hnanyibu, helâ me je hnanyibu hia waleji oge hûna ka lakamöbun, me kunâ köbun a deny je athnyabaik a je perofeta.

¹⁴ Ke so bi ödrin e höcö long, me ohwegiâ je nyidrin, helâ me nyin je lakamödrin, tavat adre me ca labageju bi kö Iehova Khongudrin.

¹⁵ Ke ödrin e hna degecâ anyin je hnanyibu, me anyin ûhihinyköu waleji e ame ânyâ me lakamödrin, me hnen je hna ohnathoâ ködrin; ke ödrin e hnu hoton ûnyi ae ûnyi baû, me ödrin e hop bi, me hnu hoton je hnyei igigili ödrin, waleji a ha Iehova a ödrin e ca he ka ânyâ e ûcû mödrin.

¹⁶ Ke ödrin e hna degecâ je hna hûna hnö Iehova Khongudrin, me ânyâ hobi ködrin je idola adre oköiâ, a li nokon kau, me ânyâ Aseira me khudrung ka je ûnyi hia hnyi drany, me bi athnyaba kö Baala.

¹⁷ Ke ödrin e kunâ lakudrin je baga me hlu he ka he hnyi wanben meic, me bi khong, me biobotkong, me ûcû ödrin bi he ka ânyâ hulö hnyi hnyimakö Iehova, he ka ohmö-nyinâ e.

¹⁸ Anyin a wale Iehova ame hmonyin gan hmâ kö Isaraela me kunʼ ödrin dut ûnyi hnyi hnyimakan: e ba köluidrin, ke hake so thiju tribu anyi Juda.

¹⁹ Ke haba Juda minya ame ca tuö je hnanyibu anyi Iehova Khongudrin, ke odrin e vheno je hnanyibu anyin je than Isaraela waleji ödrin e otilâ.

²⁰ Haba Iehova ame hna degecâ je mâtrâni Isaraela hia, me oveci ödrin, me hnʼ ödrin ka hnyi hnyamen tavat sei, ke ne o but e ame obʼ ödrin ûnyi hnyi hnyimakan.

²¹ Anyin a e ame kia Isaraela ûnyi hnyi lap anyi Davita; ke ödrin e othani Jeroboama nöku Nebata: ke haba Jeroboama ame lili Isaraela me me ca hnu hotu Iehova, me kunʼ ödrin he ka ânyâ hulö ae gan hmâ.

²² Ke haba lakon Isaraela ödrin e vheno ta je hulö hia anyi Jeroboama e ame ânyâ; ödrin e ca saû but ûnyi hnyin;

²³ ke ne o but Iehova ame hom Isaraela but ûnyi hnyi hnyimakan, helâ me hnen hna ha a deny je athnyabainy hia a ta je perofeta. Me adre me hom at Isaraela ûnyi hnyi idrin hnyei Asuria ai, ke ne o but hnyi bong ang.

²⁴ Ke haba than Asuria ame hom tavat ûheny Babulona, me Kutha, me Ava, me ûheny Hamath me Sefaravaima, me ip ödrin hnyi je tauniny Samaria hwaban lakon Isaraela: me ödrin e labâ Samaria, me laba hnyi je tauniny.

²⁵ Ke haba hnyi ibi laba a ödrin e, me ödrin e ca outö Iehova: waleling me me kunâ je liona hnö Iehova, me hlingâ keihen gadrin.

²⁶ Me ödrin e fuc ka than Asuria, me ha, ka habe, Haba tavat u je hia but hom me ip hnyi je tauniny Samaria, me ca khanʼ ödrin bongon Khongon hnyei: anyin a wale e ame kunâ ködrin je liona, me wâ bi, ödrin e hlingʼ ödrin, anyin ae ca khanʼ ödrin bi bongon Khongon hnyei.

²⁷ Me haba than Asuria ame hûna me ha, ka habe, Adre me he ka kunâ eling ke at bihut, waleji at öbun e hom ûheny e; ke ödrin e he ka he me laba eling, ke hamen he ka nʼ ödrin bi ge bongon Khongon hnyei.

²⁸ Me haba ke at bihut waleji ödrin e hom ûheny Samaria ame o me laba hnyi Beth-ela me nʼ ödrin ge bongon he ka outö Iehova.

²⁹ Ke so bi haba aten je hnyei ödrin e ve ânyâ je khongudrin bi, me ip hnyin je uma hnyi je dok ae görany waleji a ânyâ at Samaria, a ta je hnyei hia hnyi anyidrin je taun wale ödrin e labâ.

³⁰ Ke haba at Babulona ödrin e ânyâ Sukotha-benotha, ke haba at Kutha ödrin e ânyâ Neregala, ke haba at Hamath ödrin e ânyâ Asima,

³¹ ke haba at Avi ödrin e ânyâ Nibehaza me Taretaka, ke haba at: Sefaravaima ödrin e thong lakudrin ge meic kö Aderameleke me Anameleke a li khongon Sefaravaima.

³² Me ödrin e outö Iehova, me otilâ hobi ködrin ke ûnyi gadrin, hnyat bihut hnyi je dok ae görany, a hnyat ödrin e bi hut hobi ködrin hnyi je uma umen je dok ae görany.

³³ Ödrin e outö Iehova me bi athnyabainy je khongudrin, hoton hwakecin je hnyei adre hia but hum ödrin ûnyi hnyin.

³⁴ Ke ödrin e ânyâ hoton hwakecidrin ehac ke ne o but hnyi bong ang: ödrin e ca outö Iehova, ke haba khaca ödrin e ca ânyâ hoton anyidrin je hnanyibu, me anyidrin tulut, me hoton hnanyibu me hna hûna waleji a hûna Iehova ka lakon Jekob, a hnyat e ame hwenyi iödrin me Isaraela;

³⁵ at eji Iehova ame ûhihinyköu mē, me hûna ködrin, ka habe, Ca he öbun ka outen je khong, me nom ködrin, me bi athnyabaidrin, me bi hut ködrin:

³⁶ Ke haba Iehova at ame hum öbun ûnyi hnyi hnyei Aigupito ge man ae gan me benyin ame hai, öbun e he ka outen, me khudrung kâu, me bi hut kâu:

³⁷ ke haba je hna ohmâ, me je hna otilâ, me hnanyibu, me hna hûna, waleji e ame sihnalimen hobi köbun, me öbun e he ka tuö me ânyâ hnyi taogo bong hia; ke ca he öbun ka outen ta je khong bi:

³⁸ ke ca he öbun ka hnying hnok hna ûhihinyköu möbun; ke ca he öbun ka outen je khong:

³⁹ ke so bi öbun e he ka outö Iehova Khongubun; kʼ ame he ka omeli öbun ûnyi hnyi hnyamen je iwahnaihmiony möbun hia.

⁴⁰ Ke ödrin e ca long, ke ödrin e ânyâ helâ me hwakecidrin ehac.

⁴¹ Ke haba je hnyei eling ödrin e outö Iehova, me bi athnyaba ka anyidrin je hnatheat; helâe minya lakudrin, me lakon lakudrin, ödrin e ânyâ helâ me hna ânyâ hnen lakamödrin ke ne o but hnyi bong ang.