II. Je Than 16 - Iaai Bible 1901 (New Caledonia)

¹ KE haba hnyi huna a seventini Peka nöku Remalia me ame hwân ka than Ahaza nöku Jotham than Juda.

² Twente but hunai Ahaza hnyi ûen e ame hwân ka than; ke e ame musi hnyi Jerusalema sikstin je huna: ke e ame ca ânyâ ûnyi ae wisa hnyi hnyimakö Iehova a Khongon, helâ me Davita a kiben.

³ Ke e ame vheno gethen deny je than Isaraela, eke, me kunâ nokon he ka he hnyi wanben meic, helâ me hwakecin ae ikiki anyin ke je hnyei, waleji a obâ Iehova hnyi hnyimakan lakon Isaraela.

⁴ Ke e ame bi hut me leû utö ae bo so hnyi je dok ae görany, me hon je dok ae hut, me hmelen je ûö hia ae hât.

⁵ Ke haba Rezina than Suria, me Peka nöku Remalia than Isaraela, ödru me he Jerusalema ai he ka vat: me ödru me theling Ahaza, ke ca tudrin bi.

⁶ Haba hnyi ûen eling Rezina than Suria ame hûgûnâ hmetu Elath hobi kâu Suria, me obâ at Juda ûheny Elath: ke ame o at Suria Elath ai me laba eling, ke ne o but hnyi bong ang.

⁷ Haba Ahaza ame kunâ je ûthumetu kö Tigelathi-pilesera than Asuria, me ha, ka habe, Inya ang athnyabaem me nokom: aiö u, me omeli nya ûnyi hnyi hnyamen than Suria, me ûnyi hnyi hnyamen than Isaraela, hnyat adre me tot könya.

⁸ Ke haba Ahaza ame hom sileva me gol adre me wâ hnyi uma umo Iehova, me hnyi hna ip omjeû hnyi uma umen than, me kunâ e hnân bwihlany ka than Asuria.

⁹ Me haba than Asuria ame long kâu: me ame he than Asuria Damaseko ai, me hûgûnâ e, me hom tavat adre hom bâ Kira ai, me hlingö Rezina.

¹⁰ Ke ame he Ahaza than Damaseko ai he ka ûkhanö me Tigelathi-pilesera than Asuria, ke e ame wâ taben hut hnyi Damaseko: me Ahaza a than ame kunâ uthumetu kö Uria at bihut he ka ha bongon e, me tulutiny, hoton hia hna huliwan.

¹¹ Me haba Uria at bihut ame otilâ taben hut: hoton hia hna kunâ hnö Ahaza than ûheny Damaseko, me Uria at bihût ame ânyâ helâe hobi kâu e ka o hmetu Ahaza than ûheny Damaseko.

¹² Ke ame o but than ûheny Damaseko, me e ame wâ taben hut: me haba than ame hakekenyâ taben hut, me hudo hut hon.

¹³ Me e ame le hudiny leû, me hudiny han, kʼ ame hingâlâ hudiny ic, me e ame dukâiâ dra dren hudiny ole hon taben hut.

¹⁴ Ke e ame oc taben hut a bras wale ame tot hnyi hnyimakö Iehova, ûnyi hnyi hnyimakan uma, wale ûnyi hnyi wanben anyin taben hut me uma umö Iehova, me ip bi hnyi ke keihen anyin taben hut ka hnyi hwadro.

¹⁵ Ke haba Ahaza than ame hûna kö Uria at bihut me ha, ka habe, Adre me he ka le hon taben hut ae gan hudiny leû anyin hnyomakatu, me hudiny han anyin sahac, me hudiny leû anyin than, me anyin hudiny han, me hudiny leû anyin tavat hia hnyi hnyei, me anyidrin hudiny han, me anyidrin hudiny ic; me dukâiâ hon e dra hia dren hudiny leû, me dra hia dren hut: ke haba taben hut a bras me hnân hobi könya bi hnân hnei hnyin.

¹⁶ Me Uria at bihut ame ânyâ hia helâ me hna hûna hnö Ahaza than.

¹⁷ Ke haba Ahaza ame subâ degecâ je baten je taben, me oc ûnyi hnyi hon je taben soû; me oc kâû taben köiö ûnyi hnyi hon je bolok a bras eû hmelen, me ip bi hon hna bi dek veto.

¹⁸ Ke haba gethen adre bi ban ethö hon hobi kâu bong sabath, wale adre me ânyâ hnyi uma, me gethen deny than hnyou, me e ame wia ûnyi hnyi uma umo Iehova, can than Asuria.

¹⁹ Ke haba kolon je hna ânyâ hnö Ahaza wale e ame ânyâ, hawa, adre ca sihnalimen hnyi tusi hnân ha je bong bongon je than Juda?

²⁰ Ke ame mokut ut Ahaza tha e me lakamen, me adre me konâm e tha e me lakamen hnyi taun anyi Davita: ke ame than biju Hezekia a nokon hwaban.