II. Je Than 14 - Iaai Bible 1901 (New Caledonia)

¹ KE haba hnyi huna a loi Joasa nöku Jehoaza than Isaraela, me ame hwân Amazia nöku Joasa than Juda he ka than.

² Twente faiv je hunainy hnyi ûen e ame hwân ka than; ke e ame musi hnyi Jerusalema twente nain ta je huna: ke haba ien hinyen, me, Jehoadana a momo Jerusalema.

³ Ke e ame ânyâ ûnyi ae so hnyi hnyimakö Iehova, he so bi a ca helâ me Davita a kiben: kʼ ame ânyâ hia hoton hna ânyâ hnö Joasa a kamen.

⁴ Ke so bi adre me ca ohia je dok ae görany: ke haba tavat adre me bi hudo bala bi je hut me leû uto ae bo so hnyi je dok ae görany.

⁵ Ke adre hia but ohmâ dökhu hnyi hnyamen, me e ame hlingâ li athnyabainy a li at ödre hlingâ than a kamen:

⁶ ke e ame ca hlingâ lakon li at ûhüngö: helâ me hna sihnalimen hnyi tusi hnanyibu anyi Mose, waleji a hûna Iehova, ka habe, Adre me ca he ka hlingâ je kamen can je nokon, ke haba khaca adre me ca he ka hlingâ je lakon can je kamen; ke adre me he ka ve hlingâ at can anyin bi hulö.

⁷ Ke e ame kot at Edoma hnyi thopiny sâlt, a ödrin ten thauzan, me hûgûnâ Sela hnyi vat, me hwenyi ien me Joketheela ke ne o but hnyi bong ang.

⁸ Ke haba Amazia ame kunâ je ûthumetu kö Joasa nöku Jehoaza, nöku Jehu, than Isaraela, me ha, ka habe, Otu me he ka ûhnyimakötuköu.

⁹ Me Joasa than Isaraela ame ûkhûnöng kö Amazia than Juda me ha, ka habe, Haba iwadekonginy Lebanona ame ûkhûnöng ka arasiny Lebanona, me ha, ka habe, Ham dö nokom hlu me me âiân nokuk: he haba ke menoiny hnyeuten Lebanona ame he ehele me ututo iwadekong.

¹⁰ E hnathu u je kot at Edoma, kʼ ame ogöranyi u ge hnyekom bi: senyin dö, ke laba ju hnyi hnyabam; anyin a ieû u me he ka okûâ monu, me u me he ka ta me at Juda a tha ödrin möu?

¹¹ Ke Amazia ame höcö long. Me haba Joasa than Isaraela ame he; ke e me Amazia than Juda ödru me ûhnyimaködruköu hnyi Bethe-semes hanen hnyei Juda.

¹² Ke Juda ame ngâ but hnyi hnyimakan Isaraela; me ödrin e ve kec ka hnyi umödrin je uma mano.

¹³ Ke haba Joasa than Isaraela ame hum Amazia than Juda, nöku Joasa, nöku Ahazia, hnyi Bethe-semes, me o hnyi Jerusalema, me kia hna up haginy veto hnyi Jerusalema hwân hnyi homagouleny Eferaima ke ne o but hnyi homagouleny obiny bahebet, foa haded je kubit.

¹⁴ Ke e ame hom gol hia, me sileva, me ta je kaia hia adre me wâ hnyi uma umo Iehova, me hnyi hnyeuleny omjeû hnyi uma umen than, me tavat adre hûgûnâ me hnân hwaban hnyei,; me adre me hmetu Samaria ai.

¹⁵ Ke haba kolon je hna ânyâ hnö Joasa, me anyin ta je huliwa hia, me tang hwegien, me hnen hna vat me Amazia than Juda, hawa, adre ca sihnalimen hnyi tusi hnân ha je bong bongon je than Isaraela?

¹⁶ Ke ame mokut ut Joasa tha e me lakamen, me adre me konâm e hnyi Samaria tha e me je than Isaraela; ke ame than biju Jeroboama a nokon hwaban.

¹⁷ Ke ame möt Amazia nöku Joasa than Juda hwaban do a mokcu Joasa nöku Jehoaza than Isaraela, hnyi fiftin je huna.

¹⁸ Ke haba kolon je hna ânyâ hnö Amazia, hawa, adre ca sihnalimen hnyi tusi hnân ha je bong bongon je than Juda?

¹⁹ Ke ödrin e sihnân e hnyi Jerusalema; ke e ame kec Lakisa ai: ke ödrin e ûkhûnöng hoton Lakisa ai, me ödrin e hlingâ eling.

²⁰ Ke ödrin e hom e hon je hors: ke adre konâm e hnyi Jerusalema tha e me lakamen hnyi taun anyi Davita.

²¹ Haba tavat Juda hia Ödrin e hum Azaria, wale a sikstin dut je hunainy, me otilâ e ka than hnân hwabö Amazia a kamen.

²² Haba e ame op Elath me ham hmetu e ka at Juda, hwaban do a mokut ut than tha e me lakamen.

²³ Ke haba hnyi huna a fiftini Amazia nöku Joasa than Juda, me ame hwân ka than Jeroboama nöku Joasa than Isaraela hnyi Samaria, ke ne o but hnyi fâti wan je huna.

²⁴ Ke e ame ânyâ ûnyi ae kong hnyi hnyimakö Ieheva: kʼ ame ca saû ûnyi hnyi ta je hulö hia anyi Jeroboama nöku Nebata, at ame okûâ monu hnyi Isaraela.

²⁵ Ke ame hom hmeto hnyigötden Isaraela hwân hnyi gethen ûheny Hamath ke ne o but hnyi köiöiny hnyei ae tha hon, helâ me hofuc ho Iehova Khongu Isaraela, waleji e ame ha a deny athnyabainy a Jona nöku Amitai, perofeta, ûheny Gatha-hefera.

²⁶ Anyin a Iehova ame wâ vec anyin at Isaraela ae ti gan: anyin ae ba at adre ca, ke ba at he monu, ke ba ûhadruo hnyi Isaraela.

²⁷ Ke Iehova, ame ca ha a gʼ ame he ka kot degecâ but iö Isaraela ûnyi eang hmeledrany: me e ame omeli ödra ge hnyamö Jeroboama nöku Joasa.

²⁸ Ke haba kolon je hna ânyâ hnö Jeroboama, me anyin ta je huliwa hia, me tang hwegien, me hnen hna vat, me hom hmetu Damaseko, me Hamath hnyi Juda, hobi kâu Isaraela, hawa adre ca sihnalimen hnyi tusi hnân ha je bong bongon je than Isaraela?

²⁹ Ke ame mokut ut Jeroboama; tha e me lakamen je than Isaraela; ke ame! than biju Zakaria a nokon hwaban.