II. Je Than 13 - Iaai Bible 1901 (New Caledonia)

¹ KE haba hnyi huna a twente theri anyi Joasa nöku Ahazia, than Juda, ame hwân dö Jehoaza nöku Jehu he ka than hon Isaraela hnyi Samaria, ke ame musi hnyi je huna a seventin.

² Ke e ame ânyâ ûnyi ae kong hnyi hnyimakö Iehova, kʼ ame hnu hoton je hulö anyi Jeroboama noku Nebata, at ame okûâ hwakecin ae kong hnyi Isaraela; e ame ca saû ûnyi hnyin.

³ Me ame ubâhlâ thö hmonyin anyi Iehova ka at Isaraela, me e ame hnʼ ödra ka hnyi hnyamö Hazaela than Suria, me ka hnyi hnyamö Ben-adada nöku Hazaela hnyi je bong hia.

⁴ Ke haba Jehoaza ame khöû kö Iehova, me Iehova ame long kâu; anyin a e ame wâ hnödra hna okongoâ at Isaraela: anyin a than Suria ame okongu ödrin.

⁵ (Me haba Iehova ame ham ka at Isaraela at ûhomeli, mʼ ödrin e didrut ûnyi hnyi hmelen hnyamen at Suria: kʼame laba hnyi umödrin je uma mano lakon Isaraela helâji me ehac.

⁶ Ke so bi ödrin e ca saû but ûnyi hnyi ta je hulö anyin lap anyi Jeroboama, at ame okûâ hwakecin ae kong hnyi Isaraela, ke ödrin e vheno e: kʼ ame tot bala bi Aseira hnyi Samaria.)

⁷ Ke e ame ca hna tavat kö Johoaza, ke so bi ödrin fifte thibi a tavat tabô hors, ke ten je kariota, ke ten thauzan tavat he hon kânâ; anyin a than Suria ame ohiʼ ödrin, me wiʼ ödrin me me helâ me sesâ adre me uto.

⁸ Ke haba kolon je hna ânyâ hnö Jehoaza, me ta je ûnyi hia e ame ânyâ, me tang hwegien, hawa, adre me ca sihnalimen hnyi tusi hnân ha je bong bongon je than Isaraela?

⁹ Ke ame mokut ut Jehoaza tha e me lakamen, me adre me konâm e hnyi Samaria: kʼ ame than biju Joasa a nokon hwaban.

¹⁰ Ke haba hnyi huna a thote seven anyi Joasa than Juda me ame hwân dö Joasa nöku Jehoaza ka than hon Isaraela hnyi Samaria, ke ne o but hnyi je huna a sikstin.

¹¹ Ke e ame ânyâ ûnyi ae kong hnyi hnyimakö Iehova; kʼ ame ca saû ûnyi hnyi ta je hulö hia anyi Jeroboama nöku Nebata, at ame okûâ hwakecin ae kong hnyi Isaraela: ke e ame vheno e.

¹² Ke haba kolon je hna ânyâ hnö Joasa, me anyin ta je huliwa, me tang hwegien, wale e ame vat me Amazia than Juda, hawa, adre ca sihnalimen hnyi tusi hnân ha je bong bongon je than Isaraela?

¹³ Ke ame mokut ut Joasa tha e me lakamen; ke ame tabâ biju Jeroboama anyin theron: ke adre me konim Joasa hnyi Samaria tha e me je than Isaraela.

¹⁴ Ke ame takû Elisaia mok wale e ame he ka mokcu hnyin: ke Joasa than Isaraela ame he kâu me tenge gan, me ha, ka habe, cica, cica, kariota anyi Isaraela, me anyin tavat tabô hors!

¹⁵ Haba Elisaia ame ha kâu, ka habe, Hom dö cafana me thi fana. Me e ame hom cafana me thi fana.

¹⁶ Ke e ame ba ka than Isaraela, ka habe, Ip dö hnyamâm hon cafana: me e ame ip hnyamen. Ke haba Elisaia bi ame ip li hnyamen bon li hnyamen than.

¹⁷ Ke haingen ka habe, Khong ut mamalama eiö: ke e ame khong ut. Ke haingö Elisaia, ka habe, Hlec ut: me e ame hlec. Haingen, ka habe, Fana hnân ûhomeli anyi Iehova, wale fana ûhömeli ga Suria: anyin a u me he ka kot at Suria hnyi Afeka, ke ne o but u je hia but ohiʼ ödrin.

¹⁸ Ke haingen, ka habe, Hom dö thi fana: me e ame hom. Ke haingen ka than Isaraela, ka habe, Kot ja kânâ: ke e ame kot a ga okun hna, me soju.

¹⁹ Haba aten Khong ame hmonyin kâu, me ha, ka habe, Hamâm eja he ka kot, ame ne faiv, ame ne siks hna hna; ke wale a ma kuc Suria ke ne o but ame ba but: ke haba walang ang u me he ka kot Suria ama okun thibi.

²⁰ Ke ame mokcu Elisaia me ödrin e konâm e. Ke haba hnyi ioiny huna me ame o but je deo vat anyin at Moaba hon hnyei.

²¹ Ke hnyi ke bong, ödrin e tiga konâm ke komok, ke wâ bi, ödrin e wâ ke deo vat; me ödrin e khûâ komok ka hnyi hu Elisaia: ke ame mâdrâ hnen komok je jeiö Elisaia, me e ame möt hmetu thö, me tot.

²² Ke haba Hazaela than Suria ame okongoâ at Isaraela hnyi ta je bong hia thithö bongu Jehoaza.

²³ Ke haba Iehova ame betenge gadrin, me hmak gadrin, me ö drin, can anyin ûhibinyköu me Aberahama, me Isaaka, me Jekob; ke ca weny bi he ka ohiʼ ödrin, me digic ödrin bala ûnyi hnyi hnyimakan.

²⁴ Ke ame mokcu Hazaela than Suria; kʼ ame than biju Ben-adada a nokon hwaban.

²⁵ Haba Joasa nöku Jehoaza ame hûgûnâ hmetu je taun ûnyi ga Ben-adada nöku Hazaela, waleji a hûgûnâ ûnyi ga, Jehoaza a kamen hnen vat. Ke Joasa ame okun kot e, me hûgûnâ hmeto je taun anyin at Isaraela.