II. Je Than 12 - Iaai Bible 1901 (New Caledonia)

¹ AME hwân Joasa ka than hnyi hunainy musi a seveni Jehu: kʼ ame musi hnyi Jerusalema hnyi je huna a fâte; haba ien hinyen me Zibia momo Bere-seba.

² Ke haba Joasa ame ânyâ ûnyi ae so hnyi hnyi-makö Iehova hnyi bongon ta je bong hia; wale hnö Jehoiada at bihut hna nâ e.

³ Ke so bi adre me ca ohia je dok ae görany: ke haba tavat adre me bi hut bala me leû uto ae bo so hnyi je dok ae gorany.

⁴ Ke haba Joasa ame ha ka tavat bihut, ka habe, Haba je mone hia ae kap wale adre me labö hom ka hnyi uma umo Iehova, a mone cici, wale mone anyin tavat adre ve ûcû, me mone hia a ûnykûme tavat he ka hom ka hnyi uma umo Iehova,

⁵ me hamen tavat bihut he ka ve kap ûnyi ge je lahanödrin: me adre me he ka okhötâ je dok ae hmouca hnyi uma, wale je dok ae hmouca adre me he bi ka wâ.

⁶ Ke haba hnyi huna a twente theri anyi Joasa a than me haba tavat bihut ödrin e tiga ca okhötâ je dok ae hmouca hnyi uma.

⁷ Me haba Joasa than ame hawo Jehoiada at bihut, me tavat bihut, me ha ködrin, ka habe, Ieû gabun öbun e ca okhötâ je dok a hmouca hnyi uma? ke walang ang ca kap hmetu bi je mone ûnyi ge je lahanöbun, ke so bi ham but e hnân hobi kâu je dok ae hmouca hnyi uma.

⁸ Me haba tavat bihut ödrin e ogâ a ödrin e ca he hmetu ka kap mone ûnyi ge tavat, ke haba khaca ödrin e ca he ka okhötâ je dok ae hmouca hnyi uma.

⁹ Me haba Jehoiada at bihut ame hom ke tang me koû moko hlinginy, me ip e hnyi baten taben hut, hnyi ke keihen a metân at ame he ka hnyi uma umo Iehova: ke haba tavat bihut a tavat tuö homagöule ödrin e hitangen eling ta je mone hia adre me hom ka hnyi uma umo Iehova.

¹⁰ Ke hnyi ûen ödrin e wâ a e gan mone hnyin tang, me ame o but at sihnalimen anyin than, tha e me at bihut ae beönua, me ödru me hitangen me aû je mone adre me wâ hnyi uma umo Iehova.

¹¹ Ke ödru me ham mone wale adre hia but tuluto ka hnyi hnyamen tavat ödrin e ânyâ huliwa, tavat tuö uma umo Iehova: me ödrin e bi hwaban tavat tretrau uto, me tavat up uma, tavat adre me huliwan uma umo Iehova;

¹² me hobi kâû minya tavat up veto, me tavat tretrau veto, me hnân ûcû uto, me je veto adre tretrao he ka okhötâ je dok ae hmouca hnyi uma umo Iehova, me hobi kâu ta je ûnyi hia adre ûco hobi kâu uma he ka ânyâwia e.

¹³ Ke adre ca ânyâ hobi kâu uma umo Iehova je utkaia sileva, me uthesiûn, me je kaia me je trutru, me je kaia gol, me je kaia sileva, ûnyi hnyi mone adre hom ka hnyi uma umo Iehova:

¹⁴ anyin a ödru me ham e ka tavat ânyâ huliwa: ke ödrin e ânyâwia uma umo Iehova ge mone eling.

¹⁵ Ke haba khaca ödru me ca tuluto ka tavat, wale ödru me ham ködrin mone he ka ham ka tavat huliwa: anyin a ödrin e khenâ hnathoâ.

¹⁶ Haba moneiny je hudiny hulö, me moneiny je hudiny monu, adre ca hom ka hnyi uma umo Iehova: ke hobi kâu tavat bihut e.

¹⁷ Ke haba Hazaela than Suria ame he me vat hnyi Gatha, me hûgûnâ e: ke Hazaela ame hnyimakan he ka he Jerusalema ai.

¹⁸ Haba Joasa than Juda ame hom ta je ûnyi hia ae kap, wale a okabâ Jehosafata, me Jorama, me Ahazia, a lakamen, je than Juda, me anyin bi ta je ûnyi ae kap, me ta je gol hia adre me wâ hnyi hna ip omjeû hnyi uma umo Iehova, me uma umen than, me kunâ kö Hazaela than Suria: me e ame he but ûheny Jerusalema.

¹⁹ Ke haba kolon je hna ânyâ hnö Joasa, me anyin ta je huliwa, hawa, adre ca sihnalimen hnyi tusi hnân ha je bong bongon je than Juda?

²⁰ Ke ame todrö lathnyabai Joasa, me sihnân, me hlingâ hnyi uma hnyi Milo, gethen ûheny Sila.

²¹ Ke haba Jozakara nöku Simeatha me Jebozabada nöku Somera, a li athnyabainy, ödru me kot e, me e ame mokcu: ke adre me konâm e tha e me lakamen hnyi taun anyi Davita: kʼame than biju Amazia a nokon hwaban.