II. Je Than 11 - Iaai Bible 1901 (New Caledonia)

¹ KE a wâ but Athalia hinyö Ahazia a ga mokcû nokon, me e ame todrö me hlingâ je mâtrâniny than hia thithö.

² Ke haba Joseba, hlu nokon than a Jorama, hani Ahazia ame hum Joasa nöku Ahazia, me hom duöngâ ûnyi hnyi lakon than adre hlingâ, a tha e me momo ame hat e, me tuö hnyi hnyeule mokut; kʼadre me ikhâlâ e ga Athalia, me me ca hlingâ e.

³ Kʼ adre tha ikhâlâ e me momo hnyi uma umo Iehova hnyi je huna a siks: ke ame than dö Athalia hnyi hnyei.

⁴ Ke haba hnyi huna a seven, haba Jehoiada ame ûkhûnöng he ka hawâ je taben haded, me at Keri, me tavat tue, me hom ödrin kâu ka hnyi uma umo Iehova; me e ame ûhihinyköu mödrin, me kunʼ ödrin he ka khemanyin hnyi uma umo Iehova, me omanenâ ködrin nokon than.

⁵ Ke e ame ha ködrin, ka habe, Walang ûnyi öbun e he ka ânyâ: haba ke keihen gabun a kuniny, tavat adre me didro hnyin hnyi sabath, adre me he ka tuö hna hmak hnyi ama umen than;

⁶ ke haba ke keihen a kuniny adre me he ka laba hnyi homagöule Sura; ke haba ke keihen a kuniny hnyi homagöule hoton tavat tue: me öbun e he helâe ka tuö hna hmakiny uma, mʼ öbun e helâ me hak bi.

⁷ Ke haba lo li ke keihen gabun tavat adre me didrut hnyi sabath, adre me he ka tuö uma umo Iehova singiny than.

⁸ Ke öbun e he hia ka lan than, me ve kât anyibun je omjehen vat hnyi je hnyamöbun; ke haba at ame he ka dit hnyin anyibun je deö vat, me adre me he ka hlingâ: ke öbun e he ka tha e me than e ka didro me didrut.

⁹ Ke haba je taben haded ödrin e ânyâ helâ me hofuc hia a ha Jehoiada at bihut; me ödrin e ve hom je atödrin, tavat adre me he ka didro hnyi sabath, tha ödrin me tavat adre me he ka didrut hnyi sabath, me o kö Jehoiada at bihut.

¹⁰ Ke haba at bi hut ame ham ka je taben haded je ö me je bec waleji anyi Davita a than a e hnyi uma umo Iehova.

¹¹ Ke haba tavat tue ödrin e ve tot me je omjehen vat hnyi je hnyamödrin, igigilo than, hwân hnyi ke keihen metâiny uma ke ne o but hnyi ke keihen meny uma, hnyi baten taben hut me uma.

¹² Ke e ame hom but nokon than, me obicâ e ge korona, me ham kâu ûnyi hnân ohnatho; ke ödrin e otilâ e me me than, me hû e; me ödrin e khöûkhöû hnyam me ha, ka habe, Khong lo omelö than.

¹³ Ke a long ut Athalia medien hnyat tue me tavat, me e ame he ka tavat hnyi uma umo Iehova:

¹⁴ me haba momo ame wâ, ke wâ bi, ame tot than hnyi tap, helâ me hwakecin, me tha e me than ta je taben me ta je trutru; ke ame senyin tavat hia hnyi hnyei me tuö trutru. Ke haba Athalia ame kia anyin je ûkhaû, me hongot, ka habe, Ûhûgûnö than, ûhûgûnö than dut ang.

¹⁵ Haba Jehoiada at bihut ame hûna ka je taben haded tavat muso uttavat me ha ködrin, ka habe, Hom but momo ka hnyi wanben li deo vat; ke haba at ame he hoton, hlingâ ju ge hele vat: anyin a at bihut ame ha, ka habe, ca he ka hlingâ momo hnyi uma umo Iehova.

¹⁶ Me ödrin e hna deny hobi kâu momo; me momo ame vheno gethen deny je hors ka hnyi uma umen than: me adre me hlingâ momo eling.

¹⁷ Haba Jehoiada ame ânyâ ke ûhihinyköu wanbö Iehova me than me tavat, me me lakei Iehova ödrin; wanben than me tavat minya.

¹⁸ Haba tavat hnyi hnyei hia adre me didro ka hnyi uma umo Baala me kia but e; ke ödrin e thu omomono anyin je taben hut, me je hna theatâ e bi, me hlingö Matana at bihut kö Baala cicö je taben hut. Ke haba at bihut ame otilâ tavat tuö uma umo Iehova.

¹⁹ Ke e ame hom je taben haded, me tavat Keri me tavat tue, me aten hia hnyei; me ödrin e utut me than ûnyi hnyi uma umo Iehova, me he hnyi gethen homagouleny tavat tue ka hnyi uma umen than. Ke e ame tabâ theroniny je than.

²⁰ Me ame senyin tavat hia hnyi hnyei, ke ame laba wia taun: ke ödrin e hlingö Athalia ge hele vat hnyi umen than.

²¹ Ke seven ta hunai Joasa hnyi ûen e ame hwân ka than.