II. Je Than 10 - Iaai Bible 1901 (New Caledonia)

¹ KE sevente je laku Ahaba hnyi Samaria. Ke haba Jehu ame sihnalimen je tusi me ûkhûnöng Samaria ai ka je than Jezerela, wale wahingat, me ka tavat hat je laku Ahaba, ka habe,

² Ke ka o but tusi ang köbun, ke e unyibun je lakon tuhöbun, ke e unyibun je kariota me je hors, me taun adre up veten, me je omjehen vat;

³ öbun e he ka ûca ke nokon tuhöbun ae so me ûcû, me ip e hon theron anyin kamen, me vat hobi kâu lap anyin tuhöbun.

⁴ Ke ti gan anyidrin ot, me ödrin e ha, ka habe, Wâ bi, a ca tot li than hnyi hnyimakan: ke otin e he ka hawa ka tot?

⁵ Haba at ame muso hnyaba, me at ame muso taun, me wahingat, me tavat ödrin e hat je wanakat, ödrin e ûkhûnöng kö Jehu, ka habe, Ohmun ang lathnyabaem, me ohmun e he ka ânyâ ta je ûnyi hia u me he ka hunâ kohmun; ohmun e ca he ka otilâ ke at hnân than: ânyâ thö ûnyi ae so hnyi hnyimâkâm.

⁶ Me e ame sihnalimen; ködrin tusi a loiny, me ha, ka habe, A ne tha hiöbun mönya ke öbun e ne he ka long hok hofuc, me hom but ban tavat a je lakon tuhöbun, me hom but jem könya hnyi Jezerela helâ nyi ang. Ke ödrin sevente je lakon than ödrin e laba unyin je at hnathuiny taun tavat adre me hat ödrin.

⁷ Kʼ ame o but tusi ködrin, me ödrin e hom je lakon than, me hlingʼ ödrin a ödrin sevente, me hitangen je bodrin me kunâ kâu Jezerela ai.

⁸ Ke ame o but at me thumeto e me ha, ka habe, Ödrin e o but me ban je lakon than. Ke haingen, ka habe, Khon ju me me lo li hna khon hnyi homagöule ke ne o but nyi.

⁹ Ke hnyi hnyomakatu e ame didrut, me tot, me ha ka tavat hia, ka habe, Wisa but öbun: wâ bi oge ûhûg-ûnö than me tuhok, me hlingâ e: ke ia hlingâ tavat hia eang?

¹⁰ Khanʼ öbun dö walang ang a ame ca he ka kolu hnyikânâi ke uthofuc ho Iehova, wale ame ha Iehova ge lap anyi Ahaba: anyin a hia but Iehova ânyâ ûnyi e ame ha a deny Elia athnyabainy.

¹¹ Ke wale Jehu ame kot kolon hia lap anyi Ahaba hnyi Jezerela, me anyin je at hnathu hia, me je waeny, me anyin tavat bihut, ke ne o but ame ba but kolon.

¹² Me e ame todrö me he, me he Samaria ai. Ke e eû hnyi gethen hnyi uma hnân subâ leûnen mamoe umen tavat tuö mamoe,

¹³ haba Jehu ame ûkhanö me je liamekeiny me Ahazia than Juda, me ha, ka habe, Öbun ie hnyat? Ke ödrin e thu, ka habe, Ohmun je liamekeiny me Ahazia; kʼ ohmun e he he ka iouny me lakon than, me lakon momo than.

¹⁴ Me e ame ha, ka habe, Hom meliödrin dö, me ödrin e hom meliödrin hnyi thopiny uma adre sö leûnen mamoe hnyin, a ödrin fâte tu, kʼ ame ca hna but kolon.

¹⁵ Ke e ame he but ûheny e, me e ame ûkhanö me Jonadab, nöku Rekaba ame he ka iouny mē: ke e ame iouny, me ha kâu, ka habe, Hawa e wisa hnyekom helâ me hnyekuk köu? Me haingö Jonadab, ka habe, Eke. A ne helâe, awe, ho jem hnyamâm. Ke e ame inâ hnyamen; me e ame hom e kâu ka hnyi hon kariota.

¹⁶ Ke haingen, ka habe, Ötu ma tha he, me u me he ka wâ tang hwegiök hobi kö Iehova. Me adre me olaba e hon kariota.

¹⁷ Ke ame o hnyi Samaria, me e ame kot hia je kolon lap anyi Ahaba hnyi Samaria, ke ne o but e ame ohia, hoton hofuc ho Iehova, waleji e ame ha ko Elia.

¹⁸ Ke haba Jehu ame ûkhacaköuâ tavat hia thithö, me ha kodra, ka habe, E ûhnyûkong hnö Ahaba hna bi athnyaba kö Baala; ke gan bi hnö Jehu hna he ka bi athnyaba kâu.

¹⁹ Anyin a wale, hawâ thö könya je perofeta anyi Baala hia thithö, me lathnyabainy hia, me tavat bi hut hia kâu; e so e he ka ca hia ke at a khaca, anyin ae hu gak hut ae gan kö Baala; ame ca he ka möt bi at ame hia. Haba Jehu ame ânyâ iyawâ e, me me he ka ohia lathnyabai Baala.

²⁰ Ke haingö Jehu ka habe, Okabâ ju ûkhacaköu ae ûnyi hnathu kö Baala. Me adre me haimemenâ.

²¹ Ke Jehu ame ûkhûnöng ka hnyi Isaraela hia thithö: me ame o je lathnyabai Baala hia, ke ba at ae hia. Ke ödrin e o ka hnyi uma umo Baala; kʼ ame unöngöt uma umo Baala hnyi je ke keihen hia.

²² Me e ame ha ka at ame tuö hnyeuleny je ûkhaû, ka habe, Hom jem je ûkhaû me oûco lathnyabai Baala hia. Me e ame hom je ûkhaû hobi ködrin.

²³ Ke haba Jehu me Jonadab nöku Rekaba ödru me didro eiö hnyin uma umö Baala; me e ame ha ka lathnyabai Baala, ka habe, Elâm dö, me wâ, wâ e nye hu athnyabai Iehova eang unyibun, ke so e hake lathnyabai Baala.

²⁴ Ke ödrin e didrut he ka hudo ta je hut me je hudiny leû. Ke a hia but Jehu ip tavat a eite hnyou, me ha ködrin, ka habe, Haba at ame he ka möt ûnyi hnyi tavat oge me he ka hom ka hnyi hnyamöbun, ame he ka hwaban e unyibun.

²⁵ Kʼ a hia but hudo hudiny leû me haba Jehu ame ha ka tavat tue, me je taben, ka habe, Didro, me hlingʼ ödrin; ame ca he ka didrut ke at. Me ödrin e kuc ödrin ge hele vat; ke haba tavat tue me je taben ödrin e khûʼ ödrin kâû, me he but ka hnyi tauniny uma umö Baala.

²⁶ Ke ödrin e hom kâû je veto ame tot ûnyi hnyi uma umö Baala, me le degecâ e.

²⁷ Ke ödrin e hagutâ degecâ hnatheati Baala, me kia degecâ uma umo Baala, me wia hnân uma digic thatûnyi, ke ne o but hnyi bong ang.

²⁸ Helâe hnö Jehu hna ohiö Baala ûnyi hnyi Isaraela.

²⁹ Ke so bi Jehu ame ca saû ûnyi hnyi je hulö anyi Jeroboama nöku Nebata, at ame okûâ je hwakecin ae kong anyin at Isaraela, ge li nokon kau gol waleji hnyi Beth-ela, me Dana.

³⁰ Haba Iehova ame ha kö Jehu, ka habe, Anyin ae so hnâm hna ânyâ, wale u je ânyâ wisa hnyi hnyimakök, me ânyâ ka lap anyi Ahaba helâ hia me hnyekuk, anyin a wale ame he je mâtrânâm ka tabâ theron hnyi Isaraela ke ne o but hnyi dö a vakiny.

³¹ Ke ame ca wâ wia Jehu he ka vheno hnanyibu anyi Iehova Khongu Isaraela, me hnyekon a khaca: e ame ca saû ûnyi hnyi ta je hulö anyi Jeroboama, wale ame okûâ je hwakecin ae khong anyin at Isaraela.

³² Ke haba hnyi ûen eling Iehova ame hwân he ka hom ûhnyûkongo at Isaraela: ke haba Hazaela ame kuc ödrin hnyi ta je hnyigöulen Isaraela hia;

³³ me hwân hnyi Joridano e deiö, hnyei Gileada hia, me at Gada, me Rheubena, me Manase, hwân Aroera hnyi hnyigöulen bucen e Arenona, wale Gileada me Basana.

³⁴ Ke haba kolon je hna ânyâ hnö Jehu, me anyin je huliwa, me tang hwegien, hawa, adre ca sihnalimen hnyi tusi hnân ha je bong bongon je than Isaraela?

³⁵ Ke a mokut ut Jehu tha e me lakamen; me ödrin e konâm e hnyi Samaria. Ke ame than biju Jehoaza a nokon hwaban.

³⁶ Haba Jehu ame musi at Isaraela hnyi Samaria bnyi je huna a twente eit.