II. Je Than 1 - Iaai Bible 1901 (New Caledonia)

¹ KE haba at Moaba ödrin e ûkhin fuc ka at Isaraela hwaban do a mokcu Ahaba.

² Ke haba Ahazia ame kolu ûnyi hnyi hna pewanâ mamalama hnyi hnyeuleny ethö, hnyi Samaria, me e ame moko: ke e ame kunâ je ûthumetu, me ha ködrin, ka habe, He thö ka hnei Bele-sebuba kongon Ekerona me inye he ka möt ûnyi hnyi mok ang.

³ Ke haba angela anyi Iehova ame ha kö Elia at Tisebi, ka habe, he thö ka ûkhanö me je ûthumetu anyin than Samaria me ha ködrin, ka habe, Hawa, anyin ae ba Khong hnyi Isaraela me öbun e he ka hnei Bele-sebuba khongon Ekerona?

⁴ Anyin a wale, walang hna ha hnö Iehova, kâ habe, U me ca he ka ut ûnyi hnyi hna mokut u me mokut hon, ke e hnathu u me he ka mokcu. Haba Elia ame he but.

⁵ Ke ame hmetu ju kâu je ûthumetu, ke e ame ha ködrin, ka habe, Anyin a ieû öbun e hmetu?

⁶ Ke ödrin e ha kâû, ka habe, Haba ke at ame o me ûkhanö möhrnun me ha kohmun, ka habe, He hmetu thö ka than at a kûnʼ öbun, me ha kâu, ka habe, Walang hna ha, hnö Iehova, ka habe, Hawa, anyin ae ba Khong hnyi Isaraela, me u me ûkhûnöng he ka hnei Bele-sebuba khongon Ekerona? anyin a wale u me ca he ka ut ûnyi hnyi hna mokut u me mokut hon, ke e hnathu u me he ka mokcu.

⁷ Me e ame ha ködrin, ka habe, Ieû bongon at ame o me ûkhanö möbun, me ha köbun hofuc e?

⁸ Ke ödrin e thu kâu, ka habe, At ae leûn unyin, kʼ ame weikâ unen meno. Me e ame ha, ka habe, Elia e at Tisebi.

⁹ Haba than ame kunâ kâu taben tavat a fifte tha e me anyin tavat a fifte. Ke e ame ölö but kâu: ke wâ bi e ame laba hon ban dok ae hut. Ke e ame ha kâu, ka habe, Aten Khong lö, haingen than, Utut.

¹⁰ Ke haba Elia ame thu me ha ka taben tavat a fifte, ka habe, Oge ne aten Khong, me hamen meic he ka gâ ûnyi hnyi drany me le degeci u me tavat a fifte unyâm. Me ame gâ but meic ûnyi hnyi drany me le degecâ e me tavat unyin a fifte.

¹¹ Ke e ame kunâ hmetu kâu ke taben tavat a fifte me tavat a fifte unyin. Me e ame thu me ha kâu, ka habe, Aten Khong lö, walang hofuc hwan than, ka habe, Ie utut.

¹² Ke; Elia ame thu me ha ködrin, ka habe, Oge î ne aten Khong, me hamen meic he ka gâ ûnyi hnyi drany me le degeci u me fifte unyâm. Me ame gâ but meic hlogon Khong ûnyi hnyi drany, me le degecâ e me anyin fifte.

¹³ Ke e ame kunâ hmetu ke taben tavat a fifte, at a kuniny, a tha e me anyin fifte. Me ame ölö thö taben tavat a fifte a kuniny, me o me ciboucâ hnyi hnyimakö Elia, me ame khöû kâu, me ha kâu, ka habe, Aten Khong lö, ö u oûnyihnathoâ anyik möt, me möt minya anyin tavat a fifte eang a lathnyabaem.

¹⁴ Wâ bi, ame gâ meic ûnyi hnyi drany me le degecâ lo li taben tavat a fifte a tha ödru me anyidru li ve fifte: ke haba walang ang e so e ûnyi hnathu anyik möt hnyi hnyimâkâm.

¹⁵ Haba angela anyi Iehova ame ha kö Elia, ka habe, Tha utut mē; ca outen e. Me e ame tot me tha utut mē ka than.

¹⁶ Ke e ame ha kâu ka habe, Walang hna ha hnö Iehova, ka habe, Anyin a u je kunâ je ûthumetu he ka hnei Bele-sebuba khongon Ekerona, hawa can ae ba Khong hnyi Isaraela he ka hnö hofuc a hwan? anyin a wale u me ca he ka ut ûnyi hnyi hnâm hna mokut, ke u me he bi ka mokcu.

¹⁷ Me e ame mokcu helâ me hofuc ho Iehova wale a ha Elia. Ke ame hwân ka than Jorama hwaban, hnyi huna a loi Jorama nöku Jehosafata than Juda; anyin ae ba nokon da.

¹⁸ Ke haba kolon je hna ânyâ hnö Ahazia, waleji e ame ânyâ, hawa, adre me ca sihnalimen hnyi tusi hnân ha je bong bongon je than Isaraela?