Hosea 5 - Iaai Bible 1901 (New Caledonia)

¹ TAVAT bihut lö, long ju hofuc ang; lap anyi Isaraela lö, löng ju; lap anyin than lö, tevehlöng ju, anyin adre ha hwaban köbun; anyin a hnewe öbun ka Mizepa, me ert adre thong hon Tabora.

² Ke haba tavat thu musi adre me ûhlingö gan hmâ; ke inya bi at û ödra hia.

³ Oge me ō Eferaima but, ke ca iyong bi Isaraela könya: unyin a walang ang, u Eferaima, u je hia but bi ûnyi monu, ke kong ut Isaraela.

⁴ Haba anyidra ta je huliwa ame ovheli ödra he ka hmetu ka Khongudrin: anyin a e unyidra weny he ka bi ûnyi monu, ke ca khanʼ ödra but Iehova.

⁵ Ke haba bi gan anyin Isaraela ame ohnathoâ hnyi hnyimakan: anyin a wale ame he ka tha ta Isaraela me Eferaima hnyi anyidru hulo; kʼ ame he minya Juda ka ta unyidru.

⁶ Adre me he ka he me elom Iehova me haledra je hnahat mamoe me kau; ke adre me ca he bi ka wâ e: e ame ka he me digic ödra.

⁷ Adre hia but iyawo kö Iehova; anyin adre hia but hnokoâ je lakudra a je atkanyua: ke walang ang ame he tehi a teb ûnyi ka ön ödra me je jekhoûdra.

⁸ Tûâ thʼ öbun sofa hnyi Gibea, me trutru hnyi Rama: kuku thö hnân haten hnyi Beth-aven; e hnyi hotom Beniamina.

⁹ Ame he ka ba wan Eferaima hnyi bong û: oge hia but omanenâ ka je tribuiny Isaraela ûnyi ame he ka o.

¹⁰ Haba je than hnyi Juda e ûcû me tavat adre me hok hnyigot: oge me he ka hingâlâ hudrin anyik hmonyin helâ me köiö.

¹¹ Adre ovecâ Eferaima, adre ngâ e hnyi ûhnei; anyin a e ame ogâ he ka hnu hoton hna hûna.

¹² Anyin a wale, iny helâ me nokon walelaba ka Eferaima, ke iny helâ me bobot ka lap anyi Juda.

¹³ Ke a wâ but Eferaima anyin mok ke a wâ but Juda hnân aat, me haba Eferaima ame he Asuria ai, kʼ ame ûkhûnöng kö Jareba than; ke ca khana bi he ka omeli u, me ometo hnobun aat.

¹⁴ Anyin a oge me he ka helâ me liona ka Eferaima, ke helâ me nak liona ka lap anyi Juda: haba inya me oge me he ka oloû kia me he but; oge me he ka hom, ke ba at ame he ka hûgûnâ.

¹⁵ Oge me he ka he but me hmetu ka hnyi hnok, ke ne o but adre me ogâ anyidra monu, me elâm hnyi-makök: ke adre me he ka ti elom nya e ka hu vec gadra.