Hna Omanenâ 8 - Iaai Bible 1901 (New Caledonia)

¹ KE a hia but khong hna ohmâ haten a seveniny, me ame ba ju hwan hnyi drany hnyi haf awa.

² Ke oge me wâ je angela a seven waleji ödrin e tot hnyi hnyimakan Khong; ke adre me ham ködrin ta je trutru a seven.

³ Me ame o but ke angela me tot hnyi taben hut, e unyin taben meic a gol; me adre me ham gânâ kâu je uto ae bo so, me me he ka tha ip e me je hic hijin wakap hia thithö hnyi taben hut gol hnyi hnyimakan theron.

⁴ Me ame ölö thö hainy uto ae bo so tha e me je hic hijin wakap hnyi hnyimakan Khong ûnyi hnyi hnyamen angela.

⁵ Haba angela ame hom taben meic; ke e ame öunöngötâ ge meic ûnyi hnyi taben hut, me khûâ ka hnyi hmeledrany: me ame o but je hendreng, me je hofuc, me je hucuce, me hwiöi.

⁶ Me haba je angela a seven ödrin e penapena he ka tuö trutru, wale hnyat ae hu je trutru a seven gadrin.

⁷ Ke ame tûâ thö trutru hnen angela a bân, me ame ta but we ae wahma me meic adre ûhaniken me dra, me adre me khûâ ka hnyi hmeledrany: me adre me thong degecâ ke keihen a kuniny hmeledrany, kʼ adre thong minya ke keihen a kuniny je ûö, kʼ adre thong hna önying hia ae hât.

⁸ Ke ame tûâ thö trutru hnen angela a loiny, ke helâke adre khûâ but bucen ae gan ame hiâ ge meic ka hnyi köiö: me ame dra but ke keihen köiö a kuniny;

⁹ me ame mokcu ke keihen a kuniny ta je ûnyi ae möt eû hnyin köiö; ke adre me ohia minya ke keihen a kuniny ta je hu.

¹⁰ Ke ame tûâ thö trutru hnen angela a kuniny, me ame kolu but ke okhû ae gan hmâ ûnyi hnyi drany, ame hiâ helâ me okûnû, ke ame kolu but ka hnyi ke keihen a kuniny ta je wagewe, me je an ame pupua;

¹¹ ke haba ien okhû, me Ûnyi ae hiny: me ame hiny jut ke keihen a kuniny ta je köiö; ke se hia tavat a mok ge je köiö ûnyi hnyi ûhinyin.

¹² Ke ame tûâ thö trutru hnen angela a vakiny, me adre me kot ke keihen a kuniny seûno, me ke keihen a kuniny tehi, me ke keihen a kuniny ta je okhû; waleling me me menekholom but je ke keihen a kuniny, ke ame ca melam hmetu ke keihen a kuniny bong, ke helâe minya ge lit.

¹³ Ke oge me wâ me löng ke aeto ame gâ hnyi wanben drany, kʼ ame ha ge hwan ae hwege, ka habe, Ekölö, ekölö, ekölö ge tavat adre me laba hnyi hmeledrany ûnyi hnyi ifucin ke ta je trutru ame he ka tûâ biju hnen ta angela a kun.