Hna Omanenâ 1 - Iaai Bible 1901 (New Caledonia)

¹ WALANG hna omanenâ anyi Iesu Keriso, waleji hnen Khong hna ham kâu he ka omanenâ ka lathnyabainy, wale ta je ûnyi ame he ka ie o: ke e ame kunâ me omanenâ e deny anyin angela ka athnyabainy a Ioane;

² waleji at ame ohnathoâ hofuc hwan Khong, ke hna ohnatho hnö Iesu Keriso, a ta je ûnyi hia e ame wâ.

³ Hnahic hnen at ame aû, me tavat adre me löng hofuc adre perofeta, me löng hoton ta je ûnyi adre sihnalimen hnyin: anyin ae hakekeny jut ûen.

⁴ Inya Ioane oge me set ka ta je ekalesia a seven hnyi Asia: E so e unyibun ibetengiö bâu, me ûsoköu ûnyi gan, at a e walang ang, ke kâû adrem, ke ame he ka o; me ûnyi ge ta je Hanu a seven hnyi hnyimakan anyin theron;

⁵ me ûnyi ga Iesu Keriso at ohnatho ke hnathu, wale atöiny tavat ûhedra hnyi hna mok, ka tuhan ta je than hnyi hmeledrany. E so e unyin at ame betenge gata, kʼ ame thang degecâ anyita ta je hulo ûnyi ge dren;

⁶ kʼ ame wiʼ öta me me dokhu me hnyat bihut ka Khong a Kamen; e so e unyin hmanenang me dokhu nyiele nyiele balua. Amen.

⁷ Wâbie ame he ka o hnyi ta je ûlâ; kʼ ame he bi ka wâ e hnen ta je ecmak hia, me tavat waleji adre me dâ e; ke ame he ta ie tribu hia eang hmeledrany ka tenge thungaû gan. Eke, Amen.

⁸ Inya ang Alefa me Omega, haingen Than a Khong, a inya ang, ke inya kâû adrem, ke inya at ame he ka o, At ae khana hia.

⁹ Inya Ioane, liamekeiny mʼ öbun me tha inya mʼ öbun hnyi vec, me dokhu, me hok hnyok ûnyi Iesu, oge mwi but hnyi bomene Patamo ien, can hofuc hwan Khong me hna ohnathu Iesu.

¹⁰ Inya but hnyi Hanu hnyi bong bonginy Than, ke oge me löng hnyi hotuk hofuc ae gan helâ me hwan khoto, ame ha, ka habe,

¹¹ Haba ta je ûnyi u je wâ, sihnalimen ju hnyi ke tusi, me kunâ ka ta je ekalesia: wale Efeso, me Semurina, me Peregamo, me Thuataira, me Saradi, me Filadelefia, me Laodikea.

¹² Ke oge me hwio he ka wâ hofuc ame fuc könya. Ke oge me hwio thö, me oge me wâ je taben lamepa gol a seven;

¹³ ke e hnyi wanben je taben lamepa a seven ke at helâ me Nokon at, a khavâ ûkhaû ame beû ke ne o but hnyi hnyeûcan, ke ame weikâ ûlainy ge wen a gol.

¹⁴ Ke haba ban me leûnen ban, me hau helâ me leûnen mamoe, ke helâ me kiona; ke helâ me bâhlân meic li emakan;

¹⁵ ke helâ me bras ae hadröngöc li can, helâke adre le hnyi meic ae gan; ke haba ifucin, me helâ me hwan köiö ae se hia.

¹⁶ Ke e hu hnyi hnyamen a metân, je okhû a seven: ke ame o hnyi hnyimen hele vat a lo homakan ae so hwan: ke haba hnyimakan, me helâ me seûno ae hadröngöc hmönyin.

¹⁷ Ke oge me wâ e, me oge me ta hnyi hmelen li can helâ me at a mokcu. Me e ame ip hnyamen a metân huk, me ha, ka habe, ca ot; Inya ang a bân me biliny,

¹⁸ ke at ae Möt; ke oge hia but mok, ke wâ bi iny möt nyiele nyiele balua, ke e hu gak je kiiny mok me Hedis.

¹⁹ Anyin a wale sihnalimen ju ta je ûnyi eji u me wâ, me ta je ûnyi walang ang, me ta je ûnyi ame he ka o nyiele;

²⁰ walang bongon ae iyong a ta je okhû a seven waleji u je wâ hnyi hnyamok a metök, me je taben lamepa gol a seven. Haba je okhû a seven, me wale ta je angela anyin ekalesia a seven: ke haba je taben lamepa a seven u je wâ, me wale ta je ekalesia a seven.