Heberu 8 - Iaai Bible 1901 (New Caledonia)

¹ KE walang hing onyen ta je hofuc öhmun e ha, ka habe, E hu but gata at bihut ae nua helâe, waleji at ame laba hnyi ke keihen metân theron anyin Beönua hnyi drany, at huliwa hnyi dok ae kap,

² me hnyi hing uma menâ a otilâ hnen Than, ke ca hnen bi at.

³ Anyin adre otilâ tavat bihut hia ae nua, mʼ adre me he ka hudo ta je bwihlany me ta je hut: anyin a wale, e ûcû kâu he ka hu ke ûnyi minya hnân he ka hudo.

⁴ Ke ame ne laba eang hmeledrany, ame ne ca he ka at bihut, anyin ae hu tavat he ka hudo ta je bwihlany hoton hnanyibu;

⁵ tavat adre me bi athnyabainy haten me hmenon ta je ûnyi ethö, helâji me hna nö Mose ge Khong hnyi ûen e ame he ka oumo but uma menâ: anyin a haingen, ka habe, O u âu me ânyâ ta je ûnyi hia thithö hoton tulut adre omanenâ köu hon bucen.

⁶ Ke walang ang e hu but gan ke huliwa ae nua, helâe minya e at ame öûsoköu hnyi ke ûhihinyköu ae ûnyi hnathu, waleji adre hia but bi taben hon ta je hna ha bânâ ae nua.

⁷ Anyin a ne ba kongon ûhihinyköu a bân, me adre me ca he ka heleû hnen loiny.

⁸ Anyin a e ame haikongu ödra me ha, ka habe Haingen Than, ka habe, Wâ bi ame he ka o ta je bong, Me oge me he ka ânyâ ûhihinyköu ae teb ûnyi me lap anyin Isaraela me lap auyin Juda;

⁹ Ca helâ me ûhihinyköu oge hia but ânyâ me je lakamödra Hnyi bong oge me kât hnyamödra me lili ödra ûnyi hnyi hnyei Aigupito; Anyin adre me ca tethmâ hnyi anyik ûhihinyköu, Me oge me hna degeci ödra, haingen Than.

¹⁰ Anyin a walang ûhihinyköu oge me be ka ânyâ me lap anyin Isaraela Hwaban je bong eling, haingen Than; Oge me he ka ip anyik je hnanyibu hnyi ûnykûmenödra, Ke sihnalimen minya hnyi je hnyekudra: Ke oge me he ka Khong bi kodra, Ke adre me he bi ka lakeik:

¹¹ Kʼ adre me ca he bi ka ve nâ tavat ae hakekeny kodra, Ke je liamekeiny mʼ ödra, me ha, ka habe, Khanö u thö Than: Anyin ame he bi tavat hia thithö ka khanʼ ödra inya, Hwân ge tavat ae ûhnyûkong ke ne o but ge tavat ae gan gadra.

¹² Anyin oge me he ka betenge baû ge hwakecidra ae kong, Ke oge me ca he hmetu bi nya ka ûnykûme anyidra ta je hulo.

¹³ Ke haba hnyi hnen hna ha, ka habe, Ûhihinyköu ae teb ûnyi, me waleling e ame wia at a bân me me at adrem. Ke haba ûnyi ame hwân ka kueny me bobot ut, me wale ame logot he ka bia but.