Heberu 12 - Iaai Bible 1901 (New Caledonia)

¹ ANYIN a wale ame tet igigili öta tavat ohnatho a ödra se hia, me so ate me he minya ka hna degecâ ta je hmak hia, me hulo, wale at ame ohveli öta, ke ate me he ka wadring me hokhnyokâ ûölogot a e hnyi hnyimaköta,

² me ō Iesu at ame hwân me obekhötâ labageju, waleji at ame hokhnyokâ satauro, kʼ ame ca oûnyihnathoâ hmehma, ûnyi hnyi senyin adre me ip hnyi hnyimakan, ke e ame laba ju hnyi ke keihen metân theron anyin Khong.

³ Anyin ae so öbun e ûnykûme e, at ame hokhnyokâ hnödra hna ivinö hwege mʼ ödra hnen tavat ae kong, wâ e nye sënyin me monumonu je hnyekubun.

⁴ Öbun tiga ca hia but hagutâ ke ne o but ame hingölö dröbun hnyi hnöbun hna hagutâ hulo:

⁵ ke öbun e hnying ut hna ûne wale ame ùsabö mʼ öbun helâ me je lakon, ka habe, Nökuk lö, ca oûnyibâûâ hna nâ hnen Than, Ke ca monumonu bi, e ka thawo u;

⁶ Anyin a haba at ame hnyokâ hnen Than, me e ame nâ, Ke e ame osöâ lakon e ame kap.

⁷ Öbun e hok hnyok hobi kâu hna nâ; haba Khong, me ame ânyâ köbun helâ me lakon; anyin a ie nokon ame ca nâ e hnen kamen?

⁸ Ke adre ne ca kunʼ öbun ka hnyi hna nâ, waleji a vheno hnen je lakon hia, awe, öbun je lakon gethen, ke ca je hing lakon bi.

⁹ Ke wale minya eang, e hu köta ehac lakamen unyita, he ka nʼ öta, ke ate me ogânʼ ödra: hawa, ate me ca he ka löng hoton beönuainy Kamen ta je hanu, mʼ ate me möt?

¹⁰ Anyin adre me nʼ öta hnyi je bong ae wakhalet helâ me wedra; ke e ame nʼ öta mʼ ate me so, mʼ ate me he ka tha kap më.

¹¹ Ke haba ta je hna nâ hia, me, adre me ca ûnykûme bi a hnân osenyinâ, ke hnân bi hlöuhlöu, ke hwaban e, ame kû thö wan hnahic wale hwakecin ae wisa kodra adre nʼ ödra hnen e.

¹² Anyin a wale hai thö je hnyam ame him, me je bouca ae mat;

¹³ me owisa but ta je gethen hobi kâu je cabun, me me ca he ka khikhin can ae mat, ke so bi he ka hwege hmetu bi.

¹⁴ Hnu hoton dʼ öbun ûsoköu unyin tavat hia, me hwakecin ae kap, e ba at ame he ka wâ Than e ka hia e:

¹⁵ ke wâ wia ju, wâ e nye hu ke at ame ca o ka hnyi ibetengiö baû anyin Khong; wâ e nye kû thö iwân ae hiny he ka oveci Öbun, me ame he ka kong ut tavat ae se hia hnen e;

¹⁶ wâ e nye hu ke at bi ûnyi monu, me at thothom baga helâ me Esau, waleji at ame ham hwajekhon atö he ka ûco ûjeû.

¹⁷ Anyin ae khanʼ Öbun a hwaban e, e ame weny hmetu he ka hu hna hahnahicâ, ke adre hociâ e (anyin a e ame okhodrut wâ gethen deny ietra), ke so bi e ame elâm wia e me li deköien.

¹⁸ Anyin a öbun e ca o but ka hnyi bucen ae ûcû he ka kâlâ waleji ame hiâ ge meic ke ne o but ame hlit, me menekholom, me weneû,

¹⁹ me hwan khoto, me meainy hofuc; waleji a löng ut tavat me adre me khöû a ga me ca ha hmetu hofuc kodra:

²⁰ anyin ae ca khanʼ ödra he ka hokhnyokâ hna hûna, ka habe, Ke a ne kâlâ bucen hnen ke meno bi, adre me he ka lûâ e ge veto;

²¹ hnân outen gan hmâ ûnyi ame manen, me me haingö Mose, ka habe, Inya oge me ot gan hmâ me gâ uk:

²² ke so bi, öbun e o but ka hnyi bucen Ziona, ke ka hnyi taun anyin Khong ae möt, wale Jerusalemainy drany, ke ka ta je angela a ca hnân aû,

²³ ke ka hnyi ûkhacaköu ae bekhöt, ke ekalesiainy watö wale adre me sihnalimi ʼdra hnyi drany, ke ka Khong At owisa tavat hia, me ka ta je hanon tavat ae wisa hwakecidra adre obekhötâ,

²⁴ ke kö Iesu at ame ûsoköuâ hnyi ûhihinyköu ae teb ûnyi, ke ka hnyi dra hnân dukâiâ, kʼ ame ha ta je ûnyi ae nua hon drö Abela.

²⁵ Wâ ju eâu öbun, ke ca he ka hna degecâ at ame ha hofuc. Anyin a ne ca kec möt tavat eji adre me hna degecâ at ame koû ödra eang hmeledrany, awe, e ca khanʼ öta hmonyin he ka kec möt, öta ka he ka hotuta ka at ame koû ûnyi hnyi drany:

²⁶ waleji at ame obwebwelâ hmeledrany ge ifucin ehac: ke e ame hia but ha bânâ walang ang, ka habe, Oge me he ka okhaca hmejijingâ, ca hake hmeledrany thibi, ke drany minya bi.

²⁷ Ke haba bongon hofuc ang, ka habe, Okhaca biju, me ame ha a gʼ adre me he ka hom dö ta je ûnyi adre me hmejijingâ, helâ me ta je ûnyi adre hia but op, me me he bi ka tethmâ ta je ûnyi adre ca hia but hmejijingâ.

²⁸ Anyin a wale, ate me kap dokhu ae ca khanʼ ödra he ka obwebwelâ, me so ate me he ka hu ibe-tengiö baû, mʼ ate me he ka ânyâ huliwa ame he Khong ka senyinâ, me ogânâ e me ot:

²⁹ anyin a haba Khonguta, me meic ame han hmonyin.