Genese 16 - Iaai Bible 1901 (New Caledonia)

¹ HABA Sarai öiö Aberama ame ca hnoköa, ke e unyin ke athnyabainy a at Aigupito, Hagara ien.

² Ke Sarai ame ha kö Aberama, ka habe, Wâ ju, ame musö Iehova a oge me ca he ka hnokoâ; ö u he thö ka anyik hlu; ame ne he ka hu lakuk ûnyi gan. Me Aberama ame löng hwan Sarai.

³ Ke a hia, but Aberama laba libenyita ta je huna hnyi hnyei Kanana, ke Sarai öiö Aberama ame hum Hagara at Aigupito a anyin hlu, me ham e kö Aberama âiân, me me âiân bi.

⁴ Ke e ame hum Hagara, me e ame erkin dut: ka löng ut e a ga erkin dut, me e ame hûkötiâ momo at a musö e.

⁵ Ke haingö Sarai kö Aberama, ka habe, Ûnyi gam hna okongu nya: oge ham köu anyik hlu, ke a löng ut a ga erkin dut, me e ame hûkötiö nya: bamö Iehova he ka owisa kötu.

⁶ Ke haingö Aberama kö Sarai, ka habe, Wâ bi, e unyâm ânyâm hlu, më ânyâ kâu hoton wem. Ke Sarai ame ovecâ e, me e ame kec ut gan.

⁷ Ke ame ö e hnen angela anyi Iehova hnyi an ame pupua hnyi hnyebuba, wale ame pupua hnyi gethen ka he Sura ai.

⁸ Ke e ame ha, ka habe, Hagara lö, hlu anyi Sarai, u je mʼ ua? ke u me he kâ? Me e ame ha, ka habe, oge me kec ga Sarai, momo ame musi nya.

⁹ Ke haingen angela anyi Iehova kâu, ka habe, Hmetu ju ka at ame musi u, me löng hoton.

¹⁰ Ke haingen angela anyi Iehova kâu, ka habe, Oge me he ka ti osehia mâtrânâm, ke ca hnân öû ödra, anyin a ödra se hia.

¹¹ Ke haingen angela anyi Iehova kâu, ka habe, Wâ bi, u erkin dut, ke u ma he ka hnokoâ da; me hwenyi ien Isamaela, anyin a löng ut Iehova ânyâm vec.

¹² Ke e ame he ka tha ûcû me asina ae hiny unyin tavat; kʼ ame he hnyamen ka iwahnaihmiöny me tavat hia, kʼ ame he hnyamen tavat hia ka iwahnahmiöny më; ke e ame he ka laba hnyi hnyimakan je liamekeiny më.

¹³ Haba momo ame hwenyi iö Iehova at ame fuc kâu, ka habe, U thibi Khong at ame wâ: anyin a haingen, ka habe, Hawa oge hap wâ ju ang at ame ö nya?

¹⁴ Anyin a wale, adre hwenyi ien an ka habe, Bere-lahai-roi; wâ bi, e hnyi wanben Kadesi me Bareda.

¹⁵ Ke Hagara ame hnokoâ da nöku Aberama: ke Aberama ame hwenyi ien nokon, a hnokoâ Hagara, me Isamaela.

¹⁶ Ke eite siks hunai Aberama hnyi hnö Hagara hna hnöku Isamaela nöku Aberama.