At Khet 11 - Iaai Bible 1901 (New Caledonia)

¹ KHÛÂ but ânyâm areto ka hnyi hon du: anyin a u me he ka wâ hmetu hwaban je bong ae se hia.

² Ve ha jekhon tavat a ödrin seven, eke, ame ne eit; anyin ae ca khanö u ûkonguny ame he ka o eang hmeledrany.

³ Ame ne unöngöt je ûlâ ge we, me ame ta we ka hnyi hon kânâ: ke ame ne ta ûö, ame ne ka hnyi hwaiöu, ame ne ka hnyi hwadro, haba hna ta hnen ûö, me ame he ka mokut hnyi dok eling.

⁴ Haba at ame tuö ang, e ame ca he ke belök; ke haba at ame tuö je ûlâ ame ca he ka menu.

⁵ E ca khanö u gethen deny ang, me ûkûen ta je jö hnyi hnyekon momo ae erkin; helâe e ca khanö u ta je huliwa anyin Khong at ame ânyâ hia.

⁶ Hnyi hnyomakatu tâ ju hatungâm je hatong, ke hnyi sahac ca thawâ li hnyamâm: anyin ae ca khanö u ûnyi ame he ka kû, ame ne eang ame ne e, ke ame ne he ka tha so hia.

⁷ E hnathu e kese lany, ke so ka li ecmak he ka wâ seûno.

⁸ Eke, ame ne möt at, me se hia ta je hunainy, me so e ame senyinâ hia; ke so bi e so e ame ûnykûme je bong ae menekholom, anyin ame he ka se hia. Thatûnyi ta je ûnyi hia ame o.

⁹ Hidröu lö, senyin dö, u ka tiga but; ke hobâ thö hnyekom hnyi je bonginy ânyâm hidröu, ke vheno thö je gethen deny hnyekom, me ta je ûnyi u je wâ hnen li emâkâm: ke khanö u thö a ame he Khong ka hum u can ta je ûnyi hia e ka hnyi hna owisa.

¹⁰ Anyin a wale, degec ut vec ûnyi hnyi hnyekom, ke ûsâkâûö but me hulo: anyin ae thatûnyi ûen wanakat me hmai.