At Khet 1 - Iaai Bible 1901 (New Caledonia)

¹ WALANG hofuc hwan at Khet, a nöku Davita, tuhan Jerusalema.

² Haingen at Khet, ka habe, E ti thatûnyi e ti thatûnyi ta je ûnyi hia.

³ Ieû troban ka at hnyi anyin ta je huliwa hia e ame mâdrâ hmelen seûno?

⁴ Ame hia ke dö, kʼ ame o bi ke dö; ke haba hmeledrany, me tet hmâ bala bi,

⁵ Ame labö o seûno, kʼ ame dit hmetu seûno, me wadring ka hnyi hnen hna o hnyin.

⁶ Ame he ang ka hnyi hwaiöu me hwio ka hnyi hwadro; kʼ ame hwihwiö monu hnyi deny gethen, kʼ ame he hmetu ang bi ka hnyi deny gethen e igigilo.

⁷ Ame hingâlâ ta je di ka hnyi köiö ae gan, ke so bi ame ca unöngöt bi köiö; ke haba dok ame hingâlâ je wagewe hnyin, me wale thibi e dok ame hmetu ka hnyin.

⁸ E ti unöngöt ta je ûnyi hia ge sënyin; e pason he ka ha: ke ca sekon bi li ecmak ge hna wâ, kʼ ame ca unöngöt li hnyeköny ge hna long.

⁹ Haba ûnyi ame o ehac, me ame he hmetu bi ka o; ke haba ûnyi adre hia but ânyâ, me adre me he hmetu bi ka ânyâ: ke ba ûnyi ae teb ûnyi hmelen seûno.

¹⁰ Hawa, e hu ke ûnyi wale adre me ha gan, ka habe, Wâ bi, ûnyi ae tebûnyi? me wale ûnyi a o ehac hnyi ûen ae tiga hiʼ ota.

¹¹ E ba hna ûnykûme hmetu je dö ehac; be haba khaca, ame ca he ka hu hna ûnykûme minya je dö ame he ka o, wale unyin tavat adre me he ka o nyiele.

¹² Inya at Khet, tuhan Isaraela hnyi Jerusalema.

¹³ Ke oge me kong hnyekunâ he ka elâm me hnö a deny metâ, ta je ûnyi hia adre me ânyâ hnyi hmeledrany: e hmak hmonyin huliwa Khong ame ham ka lakon tavat he ka huliwan.

¹⁴ Oge hia but wâ ta je huliwa hia adre me ânyâ hmelen seûno; ke wâ bi thatûnyi hia, kʼ adre me han ang.

¹⁵ E pason he ka owisa ûnyi ae hwali: ke pason he ka aû bi ta je ûnyi ae ba.

¹⁶ Oge me ûhnenamö me hnyekuk, haingök, ka habe, Wâ bi, oge hia but hom hobi könya metâ ae beönua hudra hia adre bödra hnyi Jerusalema: eke, a wâ but hnyekuk metâ me wâhmakhmeto ae gan hmâ.

¹⁷ Ke oge me kong hnyekunâ he ka metâ, me he ka khana hwen monu me hwakecin ae ûnyi baû: oge me wâ a gʼ ame han minya ang.

¹⁸ Anyin a e ka gan hmâ metâ, me gan minya bi hmak: ke e ka bi hanen wâhmakhmeto hnen at, me ame bi hanen minya vec.