Amosa 4 - Iaai Bible 1901 (New Caledonia)

¹ LONG ju hofuc ang öbun je kau hnyi Basana, a öbun hnyi je bucen Samaria, a hnyat öbun e ovecâ tavat ae theduoc, me okongoâ tavat ae vec, a hnyat öbun e ha ka latuhöbun, ka habe, Hom but jem me habelihmun.

² A hia but Than Iehova khemanyinâ hwakecin ae kap, a gʼ ame he ka o but köbun je bong adre me he ka hum öbun ge ta je bâlet, me lelö kolon gabun ge je wage.

³ Ke öbun e he ka he ehele hnyi je dok ae hmouca ve cici öbun; ke öbun e he ka khûʼ öbun ka hnyi Haremona, haingen Than.

⁴ Ai öbun Beth-ela ai, me ânyâ monu; ke Gilegala ai, me osehia hnobun je hna hanyâûâ; ke hom anyibun je hut hnyi je hnyomakatu, ke anyibun je ke keihen a libenyitainy hwaban ta bong a kun hia;

⁵ me hudo thö hudiny ole adre me levenâ, me thu bongon je hut ae betenge me haimemenâ: anyin a wale webun, lakon Isaraela, haingen Than Iehova.

⁶ Ke oge hia but ham köbun je nyu ae ba tiren hnyi anyibun je taun hia, me ohmiâ jeû hnyi je hnobun hia: ke so bi öbun e ca hmetu könya haingo Iehova.

⁷ Me oge hia but behânâ we köbun, ke adre me he bi ka menu hwaban kun ta tehi: ke oge me ota we hnyi ke taun, kʼ oge me ca ota hnyi ke taun: kʼ ame ta we ka hnyi hon ke ong dok, ke haba dok ame ca ta we ka hnyin me ame melecâ thö.

⁸ Waleling me me he lo li taun ame ne kun ka hnyi taun a khaca he ka ic köiö, kʼ adre me beic bala bi: ke so bi öbun e ca hmetu könya haingo Iehova,

⁹ Oge hia but kuc öbun ge meleca me löhau: ke haba wahamon ame an hnyiganiny ibun ta hnyei, me ibun je hnyei vine, me halebun je meta, me halebun je elaio: ke so bi öbun e ca hmetu könya haingo Iehova.

¹⁰ Oge hia but kunâ köbun mok ae cap helâ me hnyi Aigupito: oge hia but hlingâ wahidröu gabun ge hele vat, me hûgûnâ halebun je hors: ke oge hia but oâ bokonginy hnobun hna hunuma ka hnyi je hnyingöibun: ke öbun e ca hmetu könya haingo Iehova.

¹¹ Oge hia but ohia keihen gabun helâ me hnen Khong hna ohia Sodoma me Gomora, ke öbun ûcû me uthmeic adre oc ûnyi hnyi meic: ke so bi öbun e ca hmetu könya, haingo Iehova.

¹² Anyin a wale, oge me he ka ânyâ helâe köu Isaraela: ke can anyin oge me he ka ânyâ helâe köu, penapena thö he ka iouny me Khongom, Isaraela.

¹³ Anyin a wâ bi, haba at ame op je bucen, me mâdrâ ang, me omanenâ ka at ûnykûmenen, at ame wia hnyomakatu me me lit, me vheno je dok ae gorany hnyi hmeledrany; haba ien e, me Iehova Khongon sabaoth.