II. Man Ûlabainy Je Than. 4 - Iaai Bible 1901 (New Caledonia)

¹ KE e ame ânyâ ke taben hut bras minya a twente je kubit ibeûen, ke twente je kubit ûlauen, ke ten kubit ibeûen goranyai.

² Ke e ame ânyâ minya taben köiö adre oköiâ a ten kubit ûnyi hnyi ke baten ka hnyi ke baten, ke wathelaba, ke faiv kubit ibeûen goranyai; ke thote kubit tulutiny igigilo.

³ Ke eû hmelen adre me theâtâ je bolok adre wadrâ igigilö, hnyi ten kubit, igigilo taben köiö. Adre me ânyâ je bolok hnyi li deo hnyi ûen adre okoiâ.

⁴ Kʼ adre bi taben e hon je bolok a twelv, kun ame tot me hnyimakan ka hnyi hwadro, kun ame hnyimakan jio, kun ame hnyimakan ka hnyi hwaiöu, kun ame hnyimakan deiö: kʼ ame tabʼ ödrin taben köiö, kʼ ödrin e iobinyköu eû hmelen.

⁵ Ke khaca hnyam ûhakiny; kʼ adre ânyâ baten helâ me baten kaia, helâ me obedila: e khana he ka hu hnyin kun ta thauzan bath.

⁶ Ke e ame ânyâ je taben soû a ten, kʼ ame ip thabûng hnyi metâ, ke thabung hnyi me, hnân soû hnyin: kʼ adre me hneû eling je ûnyi hnân hudiny leû: ke haba taben köiö, me, hnân sûen tavat bihut.

⁷ Ke ame ânyâ je taben lamepa gol a ten hoton tulut adre ha, kʼ ame ip eio hnyin uma kap, thabûng hnyi metâ, ke thabûng hnyi me.

⁸ Ke e ame ânyâ minya je laulau a ten, kʼ ame ip hnyin uma kap, thabûng hnyi ke keihen metâ, ke ke thabung hnyi ke keihen me. Ke e ame ânyâ je kaia gol a wan haded.

⁹ Ke haba khaca, e ame ânyâ hnyeuleny tavat bihut, me hnyeule ae gan, me je hlinginy hnyeule, me tube je hlinginy ge bras.

¹⁰ Ke haba taben köiö, e ame ip e hnyi ke keihen metâ e deiö ke ka hnyi hwaiöu.

¹¹ Ke haba Hirama ame ânyâ je öt, me je soi, me ta je kaia. Me haba Hirama ame umö ta je huliwa e ame ânyâ hobi kö Solomona than hnân hobi kâu uma umen Khong:

¹² waleling li hmolom, me je ûnyi ae wathelaba, me li ovejien hon ban li hmolom; me li boert hnân tube li ûnyi ae wathelaba anyin li ovejien walethö hnyi hon ban li hmolom;

¹³ ke foa haded je wan rimona hobi kâu li boert; ke lo li deü wan rimona hobi kâu ke boert, hnân tube li ûnyi ae wathelaba anyin li ovejien ethö hon ban li hmolom.

¹⁴ Kʼ ame ânyâ minya je taben, kʼ ame ânyâ minya je taben sou hon je taben;

¹⁵ me khaca taben köiö ke twelv ta bolok eû hmelen.

¹⁶ Ke haba je öt, me je soi, me je bâletiny utiö, me je omjehen hia, wale ame ânyâ Hirama a kamen hobi kö Solomona than, hnân hobi kâu uma umö Iehova ge bras ae hadröngöc.

¹⁷ Ame oköiâ e hnen than hnyi dok ae tha hon hnyi Joridano, hnyi kânâ ae kece wale wanben Sukotha me Zaretana.

¹⁸ Ke haba Solomona ame ânyâ ta je ûnyi hia eling ae ti se hia: ke adre me ca wâ bi ihmakiny bras.

¹⁹ Ke haba Solomona ame ânyâ ta je ûnyi wale eio hnyin uma umen Khong, me taben hut minya a gol, me je laulau taben je areto hnân omanenâ;

²⁰ me je taben lamepa me je lamepainy, me me möt hoton tulut hnyi hnyimakan umen hofuc, gol ae so;

²¹ me je vongon ûö, me je lamepa, me je akofi, gol, wale gol ae so;

²² me je uthesiûn, me je kaia, me je spun, me je taben meic, gol ae so: ke haba hwanumen uma, je hlinginy eiö hnyin hobi kâû dok ae ti kap, me je hlinginy uma, wale uma kap, gol.