तीतस 3 - ह्योल्मोकिन्ज्योला यिह-छ्य़े पेहक्यो मिहया़गी डोलु-तेहलुया़ 1 स्युहङ दाङ स्युहङ-पेनया़की ओङ चो़ला तेहतोङ, खुङया़गी माक्योकी ताम थाम्ज्यी ची़दोङ ओहले या़हबु ल़ेहया़ पेहच्येकी तेहन्दाला नाहम माॱनाङ ठाबे पेहती तेहतोङ म़ेदी खुङया़ला टेहम्बा साल च्य़ू तेर। 2 ओहले खुङया़गी सुलाॱआङ आब्रु तेन्गेन्गी ल़ेहया़ माहबेच्यु ओहले सु ङ्याम्बुॱआङ ठ़ूस्यी सिहङदा माहबेच्यु, मिह थाम्ज्यी ङ्याम्बु ङ्येम्ज्युङ दाङ छ्याप्स्यी या़हबु पेहच्यु। 3 च्यिबेमाना तोहङले ओहराङॱआङ उल्दुम्बा येहकें, माक्यो ताम मिहङ्यीहन्गेनदी येहकें, आला ख्याम्दी येहकें, नामे नाजोकी डे़छ्या दाङ ङ्याहम्साङ खाम्साङकी योक्पु काहल्दी येहकें, मिहला सेम चोक्पा च्याङदी ठादो पेहती राहङगी मिहजी ताङगो येहकें, मिहया़गी ओहराङला ङ्येन्ज्येन पेहको येहकें ओहले ओहराङगीॱआङ मिहया़ला ङ्येन्ज्येनॱराङ पेहको येहकें। 4 यिहॱनाङ, ओहराङला थार्पा नाङगेन किन्ज्योगी निङज्यी दाङ थुज्यी ज़ी़ नाङग्यो ङ्यिहगी थोङसीन। 5 ओहले किन्ज्योगी ओहराङला थार्पा नाङसीन। ओहराङगी ल़ेह या़हबु पेहक्यो सुङगोराङ दि ल़ेहमु काहल्ग्यो मिहम्बा यिहॱनाङ किन्ज्योगी ओहराङला निङज्यी जेती मिहरोगी ओहराङकी तिहक्पाया़ ठु-नाङसीन ओहले नाम्पार-ताहक्पा थु लाहमले ओहराङला मिहली साम्बा नाङसीन। 6 थार्पा नाङगेन चो़वो येशू मास्यीकाकी जेती किन्ज्योगी ओहराङला राहङगी नाम्पार-ताहक्पा थु माहङगे थु नाङदी येहबा। 7 दि ल़ेहमु जेती किन्ज्योकी काटीनगी ओहराङ किन्ज्योकी कुम्देनला ठाबे सी़ह ख़ूसीन। ओहले ओहराङगी रेहवा पेहक्योगी था़ म़ेहबा मिहली ज्योर्केन्गी हकदार डो ख़ूसीन। 8 दि तेहन्दामकी स्याहल यिहम्बा। किन्ज्योला यिह छ्य़ेक्यो मिहगी राहङला या़हबु ल़ेहया़ला सेम ताङज्येला जेम्बु पेहच्यु म़ेदी ख्येगी स्युक तेर्ती लोप्क्यो ङाहला या़हबु ने़गे। च्यिबेमाना दि ल़ेहमु तामया़ मिहया़गी तेहन्दाला या़हबु दाङ फेन थो़एँगी तामया़ यिहम्बा। 9 यिहॱनाङ तेहन्दा म़ेहबागी तामला स्येपा तुहर्केन दाङ गो़ रिङ म़ेहबागी ताहङबो चावाया़की पेतामया़, मिहया़ला ठू़ च्य़ूगे दाङ छ्य़े-ठिमकी तेहन्दाकी ठू़स्यीया़ ङो़ले ख्या था़-रिहङबुराङ तेह च्यिबेमाना दि तेहन्दा म़ेहबागी फेन मे़हथोएँगी तामया़ यिहम्बा। 10 ओहले ठू़ च्य़ूगे मिहया़ला लेहमा च्यी़ ङ्यी़ लोप्ताम क्याहप्तोङ, ओहले ओहजे पेहतीॱआङ मिहङ्यीहन्सीमाना खो ङ्याम्बु च्यामॱराङ माहच्याम। 11 ओ़ह ख्याला क्यी़हराङ येह, ओ़ह ल़ेहमु मिहया़ नोहङग्यो दाङ तिहक्च्येम्बा ओहङगे ओहले खो राहङ तिहक्पागी राहङलाराङ ङ्य़ेहबा फो़गे। ज्युक्स्योलगी लोप्ताम 12 ङाहगी अर्तिमास क्यिनी तुखिकसला ख्येसाला ताङलुङ मे़हबाराङ, ख्येती निकोपोलिसला काह-ठि पेहती यिहॱनाङ ङाहला थुज्येला स्यो, च्यिबेमाना ङाहगी ओ़ह ग्या़लाराङ सेर-काहङ तेहच्ये म़ेदी नोम्साङ ताङदी येहबा। 13 ठिम-चेन (वकिल) जेनास दाङ अपोल्लोसला लाहमला ला़ खाजेबा रो़हराम पेह तेर ओहले खुङला च्यि से़हदीॱआङ कोम्बु माहयोहङज्यु। 14 ओहराङगी मिहया़ या़हबु ल़ेहया़ला सेम ताङ ख़ूज्यु, दि लाहमले पेहती खुङगी लेहमेन मिहया़ला ज्यिबुराङ कोहपु डोएँमु रो़हराम पेह ख़ूज्यु, दि ल़ेहमु पेहसीमाना ख्या फेन मे़हथोएँगी मिहया़ डोज्ये म़ेह। 15 देला ङाह ङ्याम्बु येहकें थाम्ज्यीगीराङ ख्येला टास्यी-देले ताङदे येह। यिह-छ्य़ेला ङ्यिहला निङज्यी पेहकें आदा-नो़हया़ला टास्यी-देले म़ेदी म़े तेर। ख्या थाम्ज्यी ङ्याम्बु किन्ज्योकी काटीन ज्यू़-नाङज्यु! |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.