रोमी 15 - ह्योल्मोलेहमेन मिहया़ला ची़नाङ पेह कोहएँ 1 ओहराङ यिह-छ्य़ेला सान्दी येहकेनया़गी राहङला च्यी़राङ क़ेहनाङ लाहङ च्य़ूगेन्की सेम्बाया़ मा़हथोबा पेहती यिह-छ्य़ेला मा-फाम्बु येहकेनया़दी मा फाम्बुला ना़ कोहएँ। 2 ओहराङ थाम्ज्यीगी राहङ टोहङरो यिह छ्य़ेलुला याहरक्यी पेहती डो ख़ूज्यु ओहले खोला या़हबु ओहङज्यु म़ेदीमाॱराङ खोला क़ेहनाङ लाहङ च्य़ू कोहएँ। 3 च्यिबेमाना मास्यीकागीॱआङ राहङला क़ेहनाङ लाहङ च्य़ूगेन्की छ्या़लेया़ जे माहनाङ। ओ़हठीॱराङ सुङरापलाॱआङ दि ल़ेहमु प्री़हदी येहबा, “राहङला स्ये़हन्डील पेहकेनया़की स्ये़हन्डील ङाह थो़ला बाप्ती येह।” 4 सुङरापला प्रुहक्योकी सुङदेनया़ ओहराङला लोप्ताम क्याहप्च्येकी तेहन्दाला प्रुहक्यो यिहम्बा। ओहराङगी रेहवाला स्यि मी़हच्य़ूज्येगी तेहन्दाला छ्य़ेगी ओहराङला ना़ ख़ूएँकी ओङ दाङ स्युक क्ये च्य़ूगे। 5 ना़ ख़ूएँकी ओङ दाङ स्युक क्ये च्यु नाङगे किन्ज्योगीॱराङ ख्याया़ला मास्यीका येशू ङ्याम्बु च्यी़ डी़दी सेम च्यी़राङ डोएँगी ओङ नाङज्यु। 6 दि ल़ेहमु पेहती ख्या सेम च्यी़ डी़दी क़े च्यी़लाॱराङ ओहराङ चो़वो येशू मास्यीकाकी किन्ज्यो दाङ याहपला ख्याया़गी ज़िज्यिद फुल ख़ूज्यु। लेहमेन क्यिहपागी तेहन्दाला या़हबु लेहङगु 7 ओ़ह सोङबे किन्ज्योकी ज़िज्यिदगी तेहन्दाला मास्यीकागी ख्याया़ला लोक जे नाङग्यो ल़ेहमुराङ ख्याया़गीॱआङ च्यी़गी च्यी़ला लोक पेहतोङ। 8 तेहम्बाराङ ङाह ख्याया़ला माएँ, किन्ज्योगी खुङया़गी आख्ये मे़हमेया़ ङ्याम्बु ज़्या़ नाङग्योकी ताहम्ज्याला ते़बे छाङबु जे नाङज्येला मास्यीका यहूदीया़की योक्पु काहल्सीन। 9 ओहले किन्ज्योगी जे नाङग्यो काटीनगी तेहन्दाला लेहमेन क्यिहपाकी मिहया़गी मिहरोला ज़िज्यिद फुल्ज्यु। छ्य़े-ठिमला दि ल़ेहमु प्री़हदी येहबा, “ओ़ह सोङबे ङाह लेहमेन क्यिहपाया़की पाहरक्यीला राहङला त़ेरा तेच्या फुल्गे, ओहले राहङगी छेनला छ्ये़-लु लेहन्गे।” 10 येहपाराङ दि ल़ेहमु प्री़हदी येहबा, “ए लेहमेन क्यिहपाकी मिहया़, किन्ज्योगी दाम नाङग्यो मिहया़ ङ्याम्बु डी़दी क़ेहनाङ पेह।” 11 ओहले येहपाराङ, “ए थाम्ज्यी लेहमेन क्यिहपाकी मिहया़, चो़वोला त़ेरा तेच्या फुल्दोङ, ओहले मिह थाम्ज्यीगी मिह-रो़हलाॱराङ त़ेरा तेच्या फुल्ज्यु।” 12 येहपाराङ लुहङतेम्बा यशैयागीॱआङ दि ल़ेहमु सुङ नाङदी येह, “यिशैकी क्यिहपालेगी मेहन्दा च्यी़ फेप नाङज्ये येह, मिहरोगी लेहमेन क्यिहपाया़ थो़ला ओङ छ्य़े नाङज्ये येह, मिहरो थो़ला लेहमेन क्यिहपाया़गी रेहवा पेहच्ये येह।” 13 रेहवा नाङगे किन्ज्यो थो़ला ख्याया़गी यिह छ्य़ेदी येह। मिहरोगीॱराङ ख्याया़ला सेम काहसो दाङ स्य़िहदे नाङज्यु। ओ़हठीॱराङ पेहती नाम्पार-ताहक्पा थुगी ओङगी ख्यागी रेहवा तोहरोङ माहङबु माहङबु पेहती डो ख़ूज्यु। लेहमेन क्यिहपाया़ला पावलगी स्याहप्तो स्युहक्यो 14 आदा-नो़ह दाङ आज्यी-नुहमुया़, ख्याया़ ज्यिबुराङ या़हबु येहबा माएँ ताम ङाहला या़हबु पेहती क्यी़ह येह। ओहले ख्या येहन्देनगी काहङदी च्यी़गी च्यी़ला या़हबु पेहती लोप ख़ूएँगी ओङॱआङ ख्या ङ्याम्बु येहबा। 15 यिहॱनाङ किन्ज्योगी ङाहला नाङग्यो काटीनगी पेहती ख्याया़ला येहपाराङ टेहम्बा साल च्य़ूज्येला ङाहगी आ़र पेहती दि यिहगी प्रुहएँॱराङ येहबा। 16 लेहमेन क्यिहपाया़गी तेहन्दाला किन्ज्योगी ङाहला मास्यीका येशूला स्याहप्तो स्युहएँकी मिह ज़ो नाङसीन। लेहमेन क्यिहपाकी मिहया़ नाम्पार-ताहक्पा थु लाहमले चाङमा काहल्दी किन्ज्योकी थु ङ्ये़बाकी डेल्बा ओहङ ख़ूज्यु म़ेदी मिहरोगी ङाहला राहङदी या़हबु लेहङगु स्येच्येला पूजाहारीगी ल़ेहया़ चि क्याहप नाङसीन। 17 ङाह मास्यीका येशू ङ्याम्बु च्यी़राङ काहल्ग्यो सोङबे ङाह ङाहती किन्ज्योकी स्याहप्तो स्युहएँगी ल़ेहला छ्य़ेन्दो तेन्गे। 18 मास्यीकागी ङाहती मिहजी लाहमले जे नाङग्योकी छ्या़लेगी तेहन्दाला च्यी़राङ माज्येला ङाह आ़र पेहको येह। किन्ज्योकी काया़ ची़ च्य़ूज्येला ङाहगी लेहमेन क्यिहपाकी मिहया़ला किन्ज्योकी सुङया़ प्रा साल्दी ओहले ल़ेहया़ पेहती माॱराङ लोप सिहन्दी येह। 19 याहम्जेम्बाकी ल़ेह, ओङ छ्यिम्बुकी ता़स्यी दाङ किन्ज्योकी थुगी ओङगी यरूशलेम यिहन्ज्यु इल्लुरिकन माएँ लुहङबा थु काहल्दी ङाहगी मास्यीकाकी तेहन्दाला का़ह येहकें प्रा साल सिहन्दी येह। 20 लेहमेन मिहगी तिङग्यो ब्रामला खाङबा ज़ोक्यो ल़ेहमुराङ लेहमेन मिहगी या़हबु लेहङगु स्य़े सिहन्ग्यो ग्या़ला ङाह या़हबु लेहङगु ख्येप्टा मेहक्याहप्कें। मास्यीकाकी तेहन्दाला थे़ॱराङ मा़हथेबा ग्या़या़ला च्यी़राङ ङाहला ख्येप्टा क्याहप्च्येला ज्यिबुराङ छ्यिम्बु सेम्बा येहबा। 21 छ्य़ेला दि ल़ेहमु प्री़हदी येहबा, “मिहरोगी तेहन्दाला का़हन्दीला नाहमॱआङ स्य़ेक्यो म़ेहबा येहकें, खुङया़गी मिहरोला थोङज्ये येह, ओहले मिहरोगी तेहन्दाला का़हन्दीगी नाहमॱआङ थे़दी म़ेह, खुङया़गी ह्अ कोहच्ये येह।” रोमला डोज्येला पावल ठाबे पेहक्यो च्याहम्दा 22 दि ल़ेहमु पेहती साम्बा-साम्बा ग्या़या़ला काहल्दी या़हबु लेहङगु स्य़े कोहक्यो सोङबे ङाहला ख्यासाला ओहङज्येला खुम-लुहङॱराङ माहयोहङ। 23 यिहॱनाङ ता़ह दि ग्या़या़ला ङाहगी या़हबु लेहङगु स्येकेन्गी ल़ेह सिहन्दा च्ये सिहन्दी येह। माहङबुराङ लोह यिहन्ज्यु ङाहगी ख्याया़ला थू़ज्ये म़ेदी सेम पेह तेहक्यो येहकें। 24 ङाह ओ़ह लाहमले पेहती स्पेन लुहङबाला डोएँमु ख्याला थ़ूगे म़ेदी रेहवा पेहको येहबा। ङ्यिहमा तोबाज्यी ख्याया़ ङ्याम्बुराङ तेहकेन ङाहती सेम्बा येहबा। ओ़ह तिङले ङाह स्पेन लुहङबाला डोएँ ती़हजीला ख्याया़गी ङाहला रो़हराम पेह तेर्के यिहम्बानी म़ेदी ङाहगी रेहवा पेहती येहबा। 25 यिहॱनाङ ता़ह किन्ज्योकी मिहया़ला रो़हराम पेहच्येला ङाह यरूशलेमला डोएँॱराङ येहबा। 26 च्यिबेमाना अखैया दाङ माकेडोनियाला येहकेन छेन्छोकया़गी यरूशलेमकी प्राङबु किन्ज्योकी मिहया़ला डिबु ती़हदी ताङदी येह। 27 दि डिबु खुङया़ क़ेहनाङ पेहती ती़हदी ताङग्यो यिहम्बा, माज्येराङ माना दिया़गी ओ़ह प्राङबुया़ला रो़हराम पेहॱराङ कोहच्ये येहकें च्यिबेमाना खुङया़ लाहमलेॱराङ लेहमेन क्यिहपाकी मिहया़गी यिहक्तेन मेलाम ज्योर्सीन ओ़ह सोङबे दिया़गी जाम्बुलीङकी मेलाम लाहमले खुङया़ला स्याहप्तो स्युह कोहएँ। 28 ओ़ह सोङबे खुङला म़ेदी ताङ चाहङग्योगी डिबु या़हबु पेहती चि क्याहप्सीम्बाराङ ख्या साले पेहती स्पेन लुहङबाला डोज्ये सेम्बा येहबा। 29 ङाह ख्यासाला ओहङगेमु मास्यीकाकी नाङगे मेलामगी काहङदी ओहङज्ये येह। 30 आदा-नो़ह दाङ आज्यी-नुहमुया़, ओहराङ चो़वो येशू मास्यीका दाङ नाम्पार-ताहक्पा थुगी नाङग्यो चेवा लाहमले ङाहती तुहक्पुला रो़हराम जे नाङज्यु म़ेदी ङाहती तेहन्दाला ख्या फे़बे मे़हमेया़गी किन्ज्यो ङ्याम्बु स्युक छ्यिम्बु पेहती सोल्वाङ ताप नाङदोङ म़ेदी ओहर-छ्य़े स्युहउ येहबा। 31 यहूदीयाला येहकेन किन्ज्योला यिह मा़हछ्येबाकी मिहया़लेगी ङाह जेम्दी तेह ख़ूज्यु ओहले यरूशलेमला येहकेन किन्ज्योकी मिहया़ला ङाहती डेल्बा या़हबु ऩे ख़ूज्यु म़ेदीॱआङ सोल्वाङ ताप नाङदोङ। 32 ओहले किन्ज्योगी थुला ठुङदी येहसीमाना ङाह क़ेहनाङ पेहती ख्यासाला ओहङज्ये येह ओहले ओहराङ ङ्याम्बुराङ तेहती काहसो पेहच्ये येह। 33 स्य़िहदे नाङगेन किन्ज्यो ख्या थाम्ज्यी ङ्याम्बु ज़्य़ू नाङज्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.