ज्याल्गा 8 - ह्योल्मोथे़जी तिहम्बा 1 ल़ूह स्ये़बुगी तिहम्बा थे़जी खा फे़ नाङगेमु छ्युजी फे़ थु स्यिहङगामला यिङबु काहल्सीन। 2 ओ़ह तिङले ङाहगी किन्ज्योकी दिनला लाहङदी तेहकेन्गी स्यिहङगामकी स्याहप्च्यी तिहन थाल थोङसीन। खुङया़ला रोहवा-लीङ तिहन नाङदी येहकें। 3 ओहले सेरकी साङबुर थो़क्यो लेहमेन स्यिहङगामकी स्याहप्च्यी च्यी़ ओहङदी छ्येकाङ पोहला लाहङदी तेहसीन। ज़्य़ू-ठि दिनला येहकें सेरकी छ्येकाङ थो़ला किन्ज्योकी थाम्ज्यी मिहया़की सोल्वाङ ङ्याम्बु फुल्ज्येला खोला स्युक्पा माहङबुराङ नाङसीन। 4 स्यिहङगामकी स्याहप्च्यीगी लाहक्पालेगी स्युक्पाकी तिहपा किन्ज्योकी मिहया़की सोल्वाङ ङ्याम्बुराङ याहर उहर्ती किन्ज्योकी दिनला लेप्सीन। 5 दि तिङले ओ़ह स्यिहङगामकी स्याहप्च्यीगी साङबुर थो़दी छ्येकाङकी मेहस्या काङसीन, ओहले जाम्बुलीङला क्युर चाहङसीन। ओहले नाम दिर्ती क़े तेन्सीन ओहले चिलाम क्याहप्ती साङगुल ओहङसीन। रोहवा-लीङया़ 6 ओहले ओ़ह रोहवा-लीङ तिहन थो़क्यो मेहन्दा तिहन स्यिहङगामकी स्याहप्च्यीया़ रोहवा-लीङ फुज्येला ठाबे काहल्सीन। 7 तोहङस्यो स्यिहङगामकी स्याहप्च्यीगी रोहवा-लीङ फुएँमु ठा़ ङ्याम्बु से़दी सेरा दाङ मेह जाम्बुलीङला क्याहप्सीन। दिगी पेहते बो सुमला बो च्यी़ जाम्बुलीङ छी़सीन ओहले बो सुमला बो च्यी़ तोहङबोया़ ओहले रेबेॱराङ ङुम्बु चाया़ छी़सीन। 8 दि तिङले स्यिहङगामकी स्याहप्च्यी ङ्यिपागी राहङगी रोहवा-लीङ फुसीन ओहजेला मेह ती़हदी तेहक्योगी लाह छ्यिम्बु ल़ेहमु पेहक्योज्यी छो-क्याहम्जोला ताहप्सीन। ओहले छो-क्याहम्जो बो सुमला बो च्यी़ ठा़ ग्युर्सीन। 9 ओहले बो सुमला बो च्यी़ छो-क्याहम्जोला येहकेन्की रेबेॱराङ सोम्बो सेम्ज्येनया़ स्यिसीन ओहले छो-क्याहम्जोला डोएँगी छ्यु-टुहया़ॱआङ बो सुमला बो च्यी़ तोङदी काहल्सीन। 10 दि तिङले सुम्बा स्यिहङगामकी स्याहप्च्यीगी राहङ ङ्याम्बु येहकेन्गी रोहवा-लीङ फुसीन, ओहले नामले माहर मेहनाङ ल़ेहमु ती़हक्योकी कार्मा छ्यिम्बु च्यी़ ताहप्सीन। ओहले बो सुमला बो च्यी़ चाङबुया़ दाङ छ्यु क्येज्युया़ला ओ़ह कार्मा ताहप्सीन। 11 ओ़ह कार्माकी मिहन “खाक्ती” यिहम्बा। ओ़हगी पेहती बो सुमला बो च्यी़ छ्यु खाक्ती काहल्सीन, ओहले ओ़ह छ्यु खाक्ती थुङदी मिहया़ माहङबुराङ स्यिसीन। 12 ओ़ह तिङले ज़्यिबा स्यिहङगामकी स्याहप्च्यीगी राहङ ङ्याम्बु येहकेन्की रोहवा-लीङ फुसीन, ङ्यिहमागी बो सुमला बो च्यी़ थो़ला क्याहप्सीन, ओहले दायुमगी बो सुमला बो च्यी़ थो़ला ओहले कार्माया़गी बो सुमला बो च्यी़ थो़ला क्याहप्सीन, ओहले ओ़हया़गी येहसेर बो सुमला बो च्यी़ ना़-जुबे काहल्सीन। ओहले ङ्यिहन दाङ नुहप बो सुमला बो च्यी़ ना़-जुबे काहल्सीन। 13 ओ़ह तिङले ङाहगी तासीन ओहले नामला उहर्केनॱराङ पेहक्यो ख्युङ च्यी़गी क़े छ्यिम्बु तेन्दी दि ल़ेहमु माक्यो थ़ेसीन, “आबुइ! काहन्डुमु ज्यी़सुकी ताम! च्यिबेमाना लिहक्योगी स्यिहङगामकी स्याहप्च्यी सुमगी राहङ-राहङगी रोहवा-लीङ फुक्योकी क़े थे़गेमु जाम्बुलीङकी मिहया़ला काहजे छा तुहवा! काहजे छा तुहवा! काहजे छा तुहवा!” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.