ज्याल्गा 2 - ह्योल्मोएफिससकी छेन्छोकला लेहङगु 1 “एफिससकी छेन्छोकला चारा पेहकेन स्यिहङगामकी स्याहप्च्यीला दि ताम प्री़हदोङ: ‘कार्मा तिहन राहङगी योबा छ्या़ला नोम्गे दाङ सेरकी छ्येकुङ तिहनकी पाहरक्यीले फेप्केन्दीगी दि ल़ेहमु सुङ नाङसीन। 2 ख्येगी कादुप च्येती पेहक्योगी ल़ेह ओहले ख्येगी ना़स्यीङ छ्यिम्बु पेहक्योदी ङाहला क्यी़ह येह। ख्येगी मिह ङ्येहम्बाया़ला ना़ मी़हखुएँ म़ेदीॱआङ ङाहला क्यी़ह येह। ओहले ल़ेह-पेन यिहना मिहम्बाला ङाह ल़ेह-पेन यिहम्बा म़ेदी माएँया़ला ख्येगी या़हबु ङ्याहम च्येती खुङया़ स्योप्क्येरे यिहन म़ेदी तेन्ग्योकी केच्याॱआङ ङाहला क्यी़ह येह। 3 ख्यागी ना़स्यीङ छ्यिम्बु पेहती ङाहगी तेहन्दाला तुहक्पु खुर्सीन ओहले तोहरोङॱआङ ख्यागी सेम स्यिदी म़ेह म़ेदी ङाहला क्यी़ह येहबा। 4 यिहॱनाङ ताम च्यी़दी ङाहगी ख्याला टाह पेहती माॱराङ कोहएँ। ख्यागी ङाहला तोहङमा ल़ेहमु चेवा ताहन्दा पेहच्ये क्युर्ती येहबा। 5 ख्या काहजे थोम्बु ग्या़ले माहर ताहप्क्यो दुबा ओ़ह या़हबु नोम्साङ ताङदोङ। ता़ह स्या़बा डुप्तोङ ओहले ख्यागी तोहङमा पेहक्यो ल़ेहमु ल़ेह पेहतोङ। ख्येगी स्या़बा मी़हडुप्सीन माना ङाह ख्येसाला ओहङज्ये येह ओहले ख्येती छ्येकुङ ओ़ह ग्या़लेगी तेन्ज्ये येह। 6 यिहॱनाङ ख्ये ङ्याम्बु गिन या़हबु ताम च्यी़ येहबा, ओ़ह च्यि यिहम्बा माना ङाहगी ल़ेहमुराङ ख्येगीॱआङ निकोलाइटसया़की ल़ेहला ङ्याप्च्यु पेहकें। 7 सुती नाम्ज्यो येहबा खोगी ङ्यिहन्ज्यु, किन्ज्योकी थुगी छेन्छोकया़ला च्यि सुङ नाङगेराङ येहबा। सुगी क्याहल्गे ओ़हदीला ङाह किन्ज्योकी स्यिहङगामकी क्याहल्सीला येहकेन्की मिहली तेर्के तोहङबोकी सेदो साहज्येला तेर्च्ये येह।’” स्मुर्नाकी छेन्छोकला लेहङगु 8 “स्मुर्नाकी छेन्छोकला चारा पेहकेन्की स्यिहङगामकी स्याहप्च्यीला दि ताम प्री़हदोङ: ‘दि ताम तोहङ यिहन्ज्युराङ ज़्य़ू नाङगेन दाङ नाहम्स्यी किन्दुॱराङ ज़्य़ू नाङगेन्दीगी सुङ नाङगु दु, मिहरो टोहङ नाङग्यो येहकें ओहले येहपाराङ सोम्बो ज़्याङ नाङसीन। 9 ङाहला ख्येगी तुहक्पु क्यी़ह येह, ओहले ख्ये प्राङबु येह म़ेदीॱआङ क्यी़ह येह, माज्येराङ मानानी ख्ये छ्युक्पु येहबा। ङाहगी खुङया़ला ङोह स्य़ेएँ, खुङ राहङला यहूदी यिहन म़ेदी माज्येनी माएँ, यिहॱनाङ खुङ तेहन्दामला यहूदी मिहम्बा। खुङगी ख्याला टाह पेहते माक्यो तामया़ ङाहला क्यी़ह येह। खुङ ती़ह गो-छ्येवाकी छो़खाङ यिहम्बा। 10 ता़ह ख्या थो़ला तुहक्पु बाप ओहङज्ये पेहती येह ओ़ह यिहन्ज्यु मा़हन्ज्यी। ती़ह गो-छ्येवागी ख्या नाहङला लाहलाला ङ्याहम च्येच्ये म़ेदी चोन-खाङला लू़ज्ये पेहती येह, ओहले ख्याला ङ्यिहमा च्यु थु च्यी़राङ तुहक्पु ओहङज्ये येह। स्यि कोहॱनाङ ङाहलेगी तेहपा मा़हलोह, ओहले क्याहल्दी ज्योर्केन्की च्याहगा था़ म़ेहबा मिहली ज़ाङबु ङाह ख्येला तेर्के। 11 सुती नाम्ज्यो येहबा खोगी ङ्यिहन्ज्यु, किन्ज्योकी थुगी छेन्छोकया़ला च्यि सुङ नाङगेराङ येहबा! सुगी क्याहल्गे, खोला ङ्यिपा स्यिवागी च्यिॱआङ ने क्याल ख़ूज्ये म़ेह।’” पर्गाममकी छेन्छोकला लेहङगु 12 “पर्गाममकी छेन्छोकला चारा पेहकेन स्यिहङगामकी स्याहप्च्यीला दि ताम प्री़हदोङ: ‘दि ताम लेहप ङ्यिकाराङ ङो़ले नुम्बु पादाङ येहकेंन्दीगी दि ल़ेहमु सुङ नाङगु दु। 13 ख्याया़ ती़हगी ॱठि येहकें ग्या़ला बा़सा तेहकें म़ेदी ङाहला क्यी़ह येह। यिहॱनाङ ख्या ङाहती मिहनला थिक-चि पेहती तेहकें। ङाहती यिह-छ्य़ेबु पाङबु एन्टिपासकी ती़हजीलाॱआङ ङाह थो़ला ज़्या़क्योकी तेहपा ख्याया़गी माहक्युर। ती़ह गो-छ्येवा तेहकें ग्या़ला ख्याया़गी पाहरक्यीलाराङ खोला सेसीन। 14 यिहॱनाङ ख्याला टाह पेहते ङाहगी च्यिरा तामनी माॱराङ कोहएँ। ख्यागी पाहरक्यीला लाहला बालामकी लुहङ ची़गेया़ॱआङ येहबा। कुया़ला छ्येपा फुल्ग्यो से़हया़ से़हदी ओहले छ्येउ-छ्येंमु पेहती इस्राएलीया़ला तिहक्पाला छ्यि च्य़ूज्येला बालामगी क्याहल्बु बालाकला लोप्क्यो येहकें। 15 ओ़हठीॱराङ पेहती निकोलाइटसकी लुहङ ची़गे मिहया़ॱआङ ख्याया़गी पाहरक्यीला येहबा। 16 ओ़ह सोङबे स्या़बा डुप्तोङ, मिहन्सीमाना ङाह ख्येसाला ग्यो़बाराङ ओहङगे, ओहले ङाहती खाले थेन्गे पादाङगी ओ़ह ल़ेह ङ्येहम्बा पेहकें मिहया़ ङ्याम्बु मा़ क्याहप्च्ये येह। 17 सुती नाम्ज्यो येहबा खोगी ङ्यिहन्ज्यु, किन्ज्योकी थुगी छेन्छोकया़ला च्यि सुङ नाङगेराङ येहबा! सुगी क्याहल्गे, ङाह खुङया़ला पे़हदी ज़्या़क्योगी मन्न तेर्च्ये येह। ङाह खुङला तोह कार्पु च्यी़ॱआङ तेर्के, ओ़ह तोह कार्पुला मिहन साम्बा च्यी़ प्री़हदी येहबा। दि तोह कार्पु ज्योर्केया़गी मिहम्बा लेहमेन सुगीॱआङ ह्अ मेहकोहएँ।’” थिआटीराकी छेन्छोकला लेहङगु 18 “थिआटीरा छेन्छोकला चारा पेहकेन स्यिहङगामकी स्याहप्च्यीला दि ताम प्री़हदोङ: ‘मेह ल़ेहमु ती़हगेन च्येन दाङ मेहला सा़दीमाराङ ताहर्ती ज़्या़क्योकी पित्तल ल़ेहमु येहपा छ्या़गे स्याहप नोम्ग्यो किन्ज्योकी स़ेबुगी दि ल़ेहमु सुङ नाङगु दु। 19 ख्येगी ल़ेह, ख्येगी चेवा, ख्येगी तेहपा, ख्येगी स्याहप्तो स्युहएँकी ल़ेह ओहले ख्येती ना़स्यीङ छ्यिम्बु ङाहला क्यी़ह येह। तोहङले म़ेदी ख्येगी ताहन्दादी माहङबुराङ स्याहप्तो स्युहएँराङ येहबा म़ेदी ङाहला क्यी़ह येहबा। 20 यिहॱनाङ ख्येला टाह पेहते ङाहगी ताम च्यी़नी माॱराङ कोहएँ, ओ़ह ईजेबेल माएँ पी़हमीला ख्येगी ग्या़ तेर्ती येह। मोहगी ङाह लुहङतेम्बा यिहन म़ेदी माएँ ओहले ङाहला स्याहप्तो स्युहएँगी मिहया़ला गो़ कोर च्य़ूदी छ्येउ-छ्येंमु पेहच्येला ओहले कुया़ला छ्येपा फुल्ग्योगी से़हया़ साहज्येला लोप्कें। 21 ङाहगी मोहला तिहक्पालेगी स्या़बा डुप्च्येला लोहङ तेर्सीन, यिहॱनाङ मोहगी छ्येउ-छ्येंमु पेहतीराङ तेहसीन। 22 ओ़ह सोङबे ङाह मोहला ङ्याहल्साला छ्यिकें थु नाह च्य़ूज्ये येह ओहले ङ्याहल्साला मोह दाङ मोह ङ्याम्बु छ्येउ-छ्येंमु पेहकेनया़गी छे-मे़हबा तुहक्पु ङ्युहङज्ये येह। सेम ग्युर्ती खुङया़गी राहङगी तिहक्पाकी ल़ेहया़ मेहपाङसीमाना ङाह खुङला छे-मे़हबा तुहक्पु ङ्युहङगे ग्या़ला क्युर चाहङज्ये येह। 23 मोहला तिङ ङ्या़गे थाम्ज्यीला ङाह तोङ च्य़ूज्ये येह ओहले थाम्ज्यीगी सेम्बा दाङ नोम्साङला ङ्याहम च्येकेन्दी ङाहराङ यिहन म़ेदी थाम्ज्यी छेन्छोकया़गी क्यी़ह ज्योर्च्ये येह। ङाह ख्या थाम्ज्यीला राहङ-राहङगी ल़ेहला ते़बे च्याहगा तेर्च्ये येह। 24 यिहॱनाङ दि ल़ेहमु लुहङला मा़हचीबा दाङ ती़ह गो-छ्येवाकी ह्अ कोह मी़हखुएँ तिहङ-रिहङबुकी केच्याया़ माहलोप्पागी थिआटीराकी छेन्छोकला येहकें लेहमेनया़ला ङाह दि माएँ– ङाह ख्याया़ला खुर्पु च्यिॱआङ मेहकाल। 25 यिहॱनाङ ङाह माहयोहङ थु ख्या ङ्याम्बु च्यि च्यि येहबा, ओ़हला थिक-चि पेहती तेहतोङ। 26 का़हन्दीगी क्याहल्गे ओहले तिङ थुराङ ङाहगी ल़ेहया़ पेहती छाङबु पेहकें, ङाह खोला क्यिहपा-क्यिहपागी थो़ला ओङ छ्य़ेज्येला तेर्च्ये येह। 27 ओ़ह तिङले खुङ थो़ला च्या़गी प्रेहका च्यी़गी ओङ छ्य़ेज्ये येह ओहले खुङला सासाकी निक्यीला ल़ेहमुराङ राहप-रोप रोप्च्ये येह। 28 ङाहगी याहप लाहमले ज़्योरक्यो दि ओङ खुङया़ला तेर्च्ये येह। ङाहगी खुङया़ला थो़दोङ कार्च्येनॱआङ तेर्च्ये येह। 29 सुती नाम्ज्यो येहबा खोगी ङ्यिहन्ज्यु, किन्ज्योकी थुगी छेन्छोकया़ला च्यि सुङ नाङगेराङ येहबा!’” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.