ज्याल्गा 10 - ह्योल्मोछ्य़े टिहल्मा फेमाज्यी थो़क्योगी स्यिहङगामकी स्याहप्च्यी 1 दि तिङले ङाहगी लेहमेन स्युक छ्यिम्बु स्यिहङगामकी स्याहप्च्यी स्यिहङगामले माहर फेप्केराङ जेक्यो थोङसीन। मिहरोकी कुसोला मुक्पागी उप्ते येहकें ओहले उला ज़ा येहकें। ओहले मिहरोकी स्याहल्दोङ ङ्यिहमा ल़ेहमु येहकें ओहले स्याहपदी मेहकी काप्स्यी ल़ेहमु येहकें। 2 मिहरोकी छ्या़ला खा फे़क्योगी को़बाकी यिहगी फेमाज्यी येहकें। मिहरोगी योबा स्याहप छो-क्याहम्जोला ओहले योमा स्याहप साला पा़ नाङसीन 3 ओहले सिङग्यी ङाहर्कें ल़ेहमु मिहरोगी सुङ-क़े छ्यिम्बुच्यी तेन लुहङ म़ेहबा नामॱआङ लेहमा तिहन थु गड्याङ-गुडुङ पेहती क़े तेन्सीन। 4 लेहमा तिहन थु नाम दिर्क्यो ल़ेहमु क़े तेन लुहङ म़ेहबा ङाहगी प्रुहज्येॱराङ पेहक्यो येहकें ओ़ह ती़हजीलाराङ स्यिहङगामले दि ल़ेहमु सुङ नाङग्यो ङाहगी थ़ेसीन “ओ़ह लेहमा तिहन थु नाम गड्याङ-गुडुङ पेहती क़े तेन्ग्योकी ताम माहप्रुह यिहॱनाङ दि ताम सेमला पे़हदी ज़्या़दोङ।” 5 छो-क्याहम्जो दाङ साला ज़्याङदी ज़्य़ू नाङग्यो ङाहगी थोङग्योकी ओ़ह स्यिहङगामकी स्याहप्च्यीगी स्यिहङगाम ङो़ले ज़ी़दी राहङगी योबा छ्या़ क्या़ नाङदी। 6 नाहम्स्यी किन्दु सोम्बो ज़्य़ू नाङगेन ओहले स्यिहङगाम, जाम्बुलीङ, छो-क्याहम्जो दाङ ओ़हला येहकेन्की ना थाम्ज्यीराङ से़हया़ला छ्या़ च्य़ू नाङगेन किन्ज्योकी छेनला ना क्याल्दी ता़ह फिमु डोज्ये म़ेह म़ेदी सुङ नाङसीन। 7 यिहॱनाङ स्यिहङगामकी स्याहप्च्यी तिहम्बागी राहङ ङ्याम्बु येहकेन्की रोहवा-लीङ फी़ फान्ज्यो किन्ज्योगी राहङला स्याहप्तो स्युहएँगी लुहङतेम्बाया़ला सुङ नाङग्योकी तिहङ-रिहङबुकी केच्याया़ तेहन्दा डुप्च्ये येह। 8 ओहले स्यिहङगामले माहर ओहङग्यो सुङ-क़ेगी येहपाराङ दि ल़ेहमु सुङग्यो ङाहगी थ़ेसीन, “सोङ! छो-क्याहम्जो दाङ साला ज़्याङदी ज़्य़ू नाङग्यो ओ़ह स्यिहङगामकी स्याहप्च्यीगी छ्या़ला, खा फ़ेदी ज़्या़क्योगी को़बाकी यिहगी ख्योङदी स्यो।” 9 ओहले ङाह ओ़ह स्यिहङगामकी स्याहप्च्यी साला काहल्दे ओ़ह को़बाकी यिहगी लाङसीन ओहले मिहरोगी ङाहला दि ल़ेहमु सुङ नाङसीन, “दि लेहन्दोङ, ओहले सोह! दिगी ख्येगी फोवाला क्युर्पु ज़ोज्ये येह यिहॱनाङ ख्येगी खाला ओ़ह तिप-प्राहङ ल़ेहमुराङ ङार्मु ओहङज्ये येह।” 10 ओहले ङाहगी ओ़ह स्यिहङगामकी स्याहप्च्यीगी छ्या़ले को़बाकी यिहगी लेहन्दे साहसीन। ओहले ङाहगी खाला ओ़हदी तिप-प्राहङ ल़ेहमुराङ ङार्मु काहल्सीन यिहॱनाङ ओ़ह साह सिहन फान्ज्योदी ङाहगी फोवा क्युर्पु काहल्सीन। 11 ओहले ङाहला दि ल़ेहमु का नाङसीन, “ख्येगी माहङबुराङ मिहया़, क्यिहपाया़, तामया़ ओहले क्याहल्बुया़ला ता़ह किन्ज्योगी च्यि च्यि जे नाङज्ये येह म़ेदी स्य़े कोहच्ये येह।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.