मर्कूस 2 - ह्योल्मोयेशूगी ओङबु स्योरक्यो मिह च्यी़ला टा़ह-च्यू़ नाङग्यो ( मत्ती ९:१-८ ; लूक ५:१७-२६ ) 1 ङ्यिहमा तोबाज्यी तिङले येशू कफर्नहुम क्याहसाला लो़ह फेप नाङसीन। ओहले मिहया़गी येशू ज़िम्गाङलाॱराङ ज़्य़ू नाङदी येह माएँ ताम थ़ेसीन। 2 दि थे़दी मिह माहङबुराङ येशूसाला ओहङसीन। ओहले मिह माहङबु ओहङग्यो सोङबे खाङबा नाहङ काहङदी कोह ग्या़या़ॱलाङ तेहसा ग्या़ म़ेहबा येहकें। येशूगी मिहया़ला सुङदेन नाङगेराङ येहकें। 3 ओहले ओ़ह ती़हजीलाराङ मेहन्दा ज़्यिगी ओङबु स्योरक्यो मिह च्यी़ला खुर्ती ओ़हला लेप्सीन। 4 मिह मिह-माहङगी पेहती खुङया़गी नेहपाला येशूगी कुम्देनला ख्येर मा़हखु। ओ़ह सोङबे खुङया़गी येशू ज़्य़ू नाङग्योगी थेका सिरे खाङबा थो़गी आर्पा लो़दी ओ़ह नेहपाला तेङगो छ्याप्क्याङराङ माहर चो़ला पाप्सीन। 5 ओहले येशूगी खुङया़गी दि ल़ेहमु तेहपा पेहक्यो ज़ी़ नाङदी ओ़ह नेहपाला सुङ नाङसीन, “ए पुह, ख्येगी तिहक्पाया़ ता़हदी येह।” 6 दि केच्या थे़दी ओ़हला येहकेन्गी छ्य़ेगी ख्येम्बोया़गी सेम सेमलाॱराङ मासीन, “दि मिहगी च्यिबे दि ल़ेहमु ताम माएँराङ येहबा?” 7 खोगीनी किन्ज्योला गा स्ये़हन्डील पेहकु दु। किन्ज्योगी मिहम्बानी लेहमेन सुगी तिहक्पा ता़ह च्य़ू ख़ूज्ये ले? 8 ओ़हजेलाराङ येशूगी खुङगी सेमगी ताम ङोह ख्येन्दी सुङ नाङसीन, “च्यिबे ख्या दि रोहवा साम्लु ताङगे? 9 दि नेहपाला ‘ख्येगी तिहक्पाया़ ता़हसीन’ म़ेदी माज्ये दाङ ‘ख्येगी तेङगो खुर्ते सोङ’ म़ेदी माज्येला का़हन्दी तेहमु ओहङडो, म़ेदोङ ले? 10 यिहॱनाङ मिहगी स़ेबुला जाम्बुलीङला तिहक्पा ता़ह च्य़ूएँगी ओङ थोप्ते येह म़ेदी ख्यागी ह्अ के़हदोङ।” ओहले येशूगी ओ़ह नेहपाला सुङ नाङसीन, 11 “ङाह ख्येला माएँ, ता़ह लाहङदोङ, ओहले राहङगी तेङगो खुर्ते खाङबाला सोङ।” 12 ओ़ह नेहपा मिह थाम्ज्यीगी ताएँ ताएँमुॱराङ ह्ओप लाहङदी राहङगी तेङगो खुर्ती खाङबाला लो़ह काहल्सीन। दि रोहवा पेहती टा़हगेन थोङदी मिहया़गी ह्अ ल़ेहदी किन्ज्योला थुज्यी-छ्ये़ फुल्दी मासीन, “दि ल़ेहमु याहम्जेन छ्येवानी ङ्यिहगी ताहन्दा थु नाहमॱआङ माहथोङ!” येशूगी लेवीला क़े क्याहप नाङग्यो ( मत्ती ९:९-१३ ; लूक ५:२७-३२ ) 13 ओहले येहपाराङ येशू गालील छोगी सुहरला फेप नाङसीन। ओहले मिहया़ येशूसाला मिह-माहङ जोम्दी ओहङ फान्ज्यो येशूगी खुङला सुङदेन नाङसीन। 14 ओहले ओहलेगी फेप्केमु फेप-लाहमला येशूगी मिह च्यी़ ठाल तुहएँगी खाङबाला तेहक्यो ज़ी़ नाङसीन। खो अल्फयसकी पुह लेवी यिहन्गे। ओहले येशूगी खोला, “ङाहला ताहदा क्याहप्ती स्यो!” म़ेदी सुङ नाङसीन। दि थे़दी खो लाहङदी येशूला ताहदा क्याहप्ती काहल्सीन। 15 तिङले येशू लेवीगी खाङबाला स्याहप्च्यीया़ ङ्याम्बु सोल छ्येच्येला फेप नाङसीन। ओहले येशूला ताहदा क्याहप्ती ओहङगेन ठाल तुहएँ दाङ लेहमेन तिहक्च्येम्बा मिहया़ॱआङ येशू दाङ येशूगी स्याहप्च्यीया़ ङ्याम्बु तो सा़ज्येला तेहसीन। 16 फरिसी बा़लगी छ्य़े-ठिम ताङगेन लाहला मिहया़गी येशूला दि ल़ेहमु पेहती ठाल तुहएँ दाङ लेहमेन तिहक्च्येम्बा मिहया़ ङ्याम्बु ज़्य़ूदी सोल छ्येक्यो थोङदी येशूगी स्याहप्च्यीया़ला टी़हसीन, “येशूगी च्यिबे दि ल़ेहमु ठाल तुहएँ दाङ तिहक्च्येम्बा मिहया़ ङ्याम्बु ज़्य़ूदी सोल छ्येक्यो यिहम्बा?” 17 खुङया़गी ताम सेन्दी येशूगी सुङ नाङसीन, “आम्ज्यीनी थाङबु मिहला मिहम्बा, नेहपाया़ला का कोहकें। ओ़ह ल़ेहमुराङ ङाह टाहङबु मिहया़ला मिहम्बा, तिहक्च्येम्बा मिहया़ला गा थार च्य़ूज्येला ओहङग्यो यिहम्बा।” ङ्युङने तेहकेन्गी तेहन्दाला टी़हदाप ( मत्ती ८:१४-१७ ; लूक ४:३८-४१ ) 18 बप्तिस्मा तेर्केन यूहन्नागी स्याहप्च्यीया़ दाङ फरिसीया़ ङ्युङने तेहकें ती़हजीला लाहला मिह येशूसाला ओहङदी स्युहसीन, “बप्तिस्मा तेर्के यूहन्नागी स्याहप्च्यीया़ दाङ फरिसीया़नी ङ्युङने तेहकें, राहङगी स्याहप्च्यीया़नी नाहमॱआङ ङ्युङने मेहतेह दु, च्यिबे यिहन्डो लाह?” 19 ओहले येशूगी सुङ नाङसीन, “पा़हमाला ओहङग्योगी डोम्बोया़ माहक्पा साम्बा ङ्याम्बुराङ तेहकेमु नाहमॱआङ ङ्युङने तेहकें ले? माहक्पा साम्बा ङ्याम्बु तेहकेमुनी सुॱआङ टेहपा तो़बा मेहतेहकें। 20 यिहॱनाङ दि ल़ेहमु ती़हजी च्यी़ॱआङ लेप्च्ये येह, माहक्पा साम्बा खुङया़ ङ्याम्बु खा फ़ेज्ये येह ओहजेला खुङया़ ङ्युङने तेहच्ये येह।” 21 “येहपाराङ, सुगीॱआङ काप्च्या निङबाला साम्बा ल्हेम्बा मेहक्याहप्केन ग्यिले। का़हलेॱआङ क्याहप्सीमाना साम्बा काप्च्या चामराक-चुमुरुक काहल्दी काप्च्या निङबाला राल तेर्के ओहले तोहरोङ ओम छ्यिम्बु डोएँ। 22 येहपाराङ माज्येराङ मासीमाना, साम्बा कुहन्डुमकी-निङगु निङबा को़बागी क्याल्बाला मी़हलुएँ ग्यिले। का़हलेॱआङ लू़सीमानानी क्याल्बा फोङदी कुहन्डुमकी-निङगुॱआङ पुङगे। ओ़ह सोङबे साम्बा कुहन्डुमकी-निङगु लू़ज्येलानी क्याल्बाॱआङ साम्बाराङ कोहएँ” म़ेदी येशूगी सुङदेन नाङसीन। थाङ सोएँगी ङ्यिहमागी चो़वो ( मत्ती १२:१-८ ; लूक ६:१-५ ) 23 थाङ सोएँ ङ्यिहमा च्यी़ येशू राहङगी स्याहप्च्यीया़ ङ्याम्बु ने़ह-स्यिहङलेगी जेती फेप नाङगेमु स्याहप्च्यीया़गी ने़ह-सी़ टू़हसीन। 24 दि थोङदी फरिसी छो़बागी लाहला मिहया़गी येशूला दि ल़ेहमु मासीन, “ज़ी़-नाङदोङ लाह! थाङ सोएँ ङ्यिहमाला छ्य़े-ठिमगी पेहच्ये मेहयोहङगे म़ेदी माक्यो ल़ेहॱआङ राहङगी स्याहप्च्यीया़गी च्यिबे पेहके?” 25 ओहले येशूगी सुङ नाङसीन, “क्याहल्बु दाऊद दाङ खोगी रो़हया़गी तुहक्पु ङ्युहङदी टेहपा तो़गेन ती़हजीला दाऊदगी च्यि पेहपा? ख्यागी सुङरापला मा़हटाहबा? 26 अबियाथार पूजाहारी छ्यिम्बु येहकेमु किन्ज्योगी छ्योखाङला स्य़ूहदी दाऊदगी किन्ज्योला फुल्ग्योगी खुरा रो़हया़ ङ्याम्बु थुल्दी साहसीन। माज्येराङ मानानी ओहराङगी छ्य़े-ठिमला पूजाहारी च्यी़गी मिहम्बानी लेहमेन सुगीॱआङ ओ़ह खुरा साहज्ये मेहयोहङगो येहकें यिहॱनाङ दाऊदगीनी राहङगीॱआङ साहसीन ओहले रो़हया़लाॱआङ तेर्सीन।” 27 ओहले येशूगी स्याहल था़ छ्येती सुङ नाङसीन, “थाङ सोएँ ङ्यिहमा मिहगी तेहन्दाला ज़ोक्यो यिहम्बा, मिह थाङ सोएँ ङ्यिहमागी तेहन्दाला ज़ोक्यो मिहम्बा। 28 ओ़ह सोङबे मिहगी स़ेबु थाङ सोएँ ङ्यिहमादीॱआङ ताहक्पु यिहम्बा।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.