Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

लूका 6 - ह्योल्‍मो


थाङ सोएँ ङ्यिहमागी तेहन्‍दाला टी़हदाप
( मत्ती १२:१-८ ; मर्क २:२३-२८ )

1 येशू थाङ सोएँ ङ्यिहमाला राहङगी स्‍याहप्‍च्‍यीया़ ङ्याम्‍बु ने़ह स्‍यिहङ लाहमलेगी जेती फेप नाङसीन। ओहले स्‍याहप्‍च्‍यीया़गी ने़ह-सी़ ट़ूहदी मुर्ती साहसीन।

2 ओहले ओ़ह थोङदी फरिसीया़गी, “थाङ सोएँ ङ्यिहमाला छ्य़े-ठिमगी पेहच्‍ये मेहयोहङगे माक्‍योकी ल़ेहया़ ख्‍यागी च्‍यिबे पेह तेहकें?” म़ेदी स्‍याहप्‍च्‍यीया़ला टी़हसीन।

3 ओहले येशूगी सुङ नाङसीन, “क्‍याहल्‍बु दाऊद दाङ खोगी रो़हया़ टेहपा तो़गेन ती़हजीला दाऊदकी च्‍यि पेहपा? च्‍यि ख्‍यागी टा़हदी म़ेहबा?

4 खुङगीनी किन्‍ज्‍योगी छ्योखाङ नाहङला स्‍य़ूहदी किन्‍ज्‍योला फुल्‍ग्‍योगी खुरा रो़हया़ ङ्याम्‍बु थुल्‍दी साहसीन। माज्‍येराङ मासीमाना छ्य़े-ठिमला ता डोनानी पूजाहारीगी मिहम्‍बा लेहमेन सुज्‍यीगीॱआङ ओ़ह खुरा साहज्‍ये मेहयोहङ येहकें, यिहॱनाङ दाऊदगी नि राहङगी च्‍यी़राङ मा़हसेहबा पेहती लेहमेन मिहया़ॱलाङ साहज्‍येला तेर्सीन।”

5 ओहले येशूगी स्‍याहल था़ च्‍येती सुङ नाङसीन, “मिहगी स़ेबु थाङ सोएँ ङ्यिहमादीॱआङ चो़वो यिहम्‍बा!”


लाहक्‍पा काम्‍ग्‍योगी मिह टा़हक्‍यो
( मत्ती १२:९-१४ ; मर्क ३:१-६ )

6 ओहले येशू येहपाराङ थाङ सोएँ ङ्यिहमाला छो़खाङला फेप्‍ती सुङ ख्‍येप्‍टा नाङसीन। ओहले ओ़हला योबा लाहक्‍पा काम्‍ग्‍योगी मिह च्‍यी़ॱआङ येहकें।

7 ता़ह फरिसी दाङ छ्य़े-ठिमकी लोबेनया़गी येशूला फातुर च़ूज्‍येला का़हलेगी ताम क़ू ज्‍योर्के नि म़ेदी क़ूह तेहती येहकें। ओहले येशूगी थाङ सोएँ ङ्यिहमालाराङ टा़ह च्‍य़ूगेनी म़ेदी ङ्याहम च्‍येती तेहसीन।

8 येशूगी खुङगी सेमगी ताम ङोह ख्‍येन्‍सीन, ओहले लाहक्‍पा काम्‍ग्‍योगी मिहला, “ख्‍ये लाहङदी दि दिनला तेह स्‍यो ले!” म़ेदी सुङ नाङसीन। ओहले ओ़ह मिह लाहङदी येशूगी कुम्‍देनला काहल्‍सीन।

9 ओहले येशूगी जोम्‍ग्‍यो मिहया़ला, “ङाहगी ख्‍याला टी़हएँ, छ्य़े-ठिमला थाङ सोएँ ङ्यिहमाला च्‍यि पेहतोङ म़ेदी प्री़हदी येहबा? ल़ेह या़हबु पेहतोङ नि चोक्‍पा पेहतोङ? मिहला थार च्‍य़ूदोङ नि स्‍यि च्‍य़ूदोङ?” म़ेदी टी़ह नाङसीन।

10 ओहले येशूगी मिह ऱेह-ऱेहला ज़ी़ नाङसीन। ओहले नेहपाला, “ख्‍येगी लाहक्‍पा क्‍याङदोङ ले!” म़ेदी सुङ नाङसीन। ओहले नेहपागी योबा लाहक्‍पा क्‍याङ फान्‍ज्‍यो लाहक्‍पा ओ़हजेलाराङ टा़हसीन।

11 ओहले छ्य़े-ठिमकी लोबेन दाङ फरिसीया़गी स्‍यिहताङगी मेहॱराङ पाहर्ती, “येशूला च्‍यि पेहच्‍ये ता़ह?” म़ेदी टे़ह क्‍याहप्‍सीन।


येशूगी स्‍याहप्‍च्‍यी च्‍यिङ्यी़ला दाम नाङग्‍यो
( मत्ती १०:१-४ ; मर्क ३:१३-१९ )

12 ङ्यिहमा च्‍यी़ येशू काहङ च्‍यी़ला फेप्‍ते नुहप काहङ किन्‍ज्‍योला सोल्‍वाङ ताप्‍ते ज़्‍य़ू नाङसीन।

13 ओहले नाहम लाहङ फान्‍ज्‍यो स्‍याहप्‍च्‍यीया़ला क़े क्‍याहप नाङसीन, ओहले स्‍याहप्‍च्‍यीया़ नाहङला मेहन्‍दा च्‍यिङ्यी़ला दाम्‍दी ल़ेह-पेन ज़ो नाङसीन।

14 ल़ेह-पेनया़गी मिहन दिया़राङ यिहम्‍बा– येशूगी सिमोनला पत्रुस माएँ मिहन ज़्‍या़ नाङसीन ओहले पत्रुसकी नो़ह अन्‍द्रियास, याकूब, यूहन्‍ना, फिलिप, बारथोलोमाइ,

15 मत्ती, थोमा, अल्‍फयसकी पुह याकूब, देशभक्त माएँगी सिमोन,

16 याकूबकी पुह यहूदा, ओहले येशूला ज़ुङ च्‍य़ूएँगी यहूदा इस्‍करियोत।


येशूगी मिह माहङबुला टा़ह च्‍य़ू नाङग्‍यो
( मत्ती ४:२३-२५ )

17 ओहले येशू ल़ेह-पेनया़ ङ्याम्‍बु काहङदोलेगी माहर फाप्‍ती थाङगा च्‍यी़ला लेप नाङसीन। ओहजेला ओ़हला स्‍याहप्‍च्‍यी माहङबुराङ जोम्‍दी तेहती येहकें, ओहले यहूदीया साने़की मिह, यरूशलेम क्‍याहसाकी मिह, छो-क्‍याहम्‍जोकी सुहरला येहकेन टुरोस दाङ सीदोन क्‍याहसाकी मिहॱआङ माहङबुराङ जोम्‍दी येहकें।

18 ओ़ह मिहया़, येशूगी सुङदेन ङ्यिहन्‍ज्‍येला, ओहले नाहजाया़ टा़ह च्‍य़ूज्‍ये म़ेदी ओहङदी येहकें। ओहजेला मेहचाङा नाम्‍स्‍यीया़ स्‍य़ूहदी तुहक्‍पु ङ्युहङग्‍योगी मिहया़ॱआङ टा़हसीन।

19 मिह थाम्‍ज्‍यीगी येशूला दे़ज्‍ये छोल्‍सीन च्‍यिबेमाना येशू लाहमले थेन्‍ग्‍यो ओङगी मिह थाम्‍ज्‍यीराङ टा़हसीन।


येशूगी नाङग्‍योकी सुङदेनया़
( मत्ती ५:१-१२ )

20 ओहले येशूगी राहङगी स्‍याहप्‍च्‍यीया़ ङो़ले ज़ी़दी सुङ नाङसीन, “ए प्राङबुया़, ख्‍याया़ काहजे सोनाम-साक्‍पु, च्‍यिबेमाना किन्‍ज्‍योगी क्‍याहल्‍सी ख्‍याया़दीराङ यिहन।

21 ए नाहरे तो़क्‍योया़! ख्‍या काहजे सोनाम-साक्‍पु, च्‍यिबेमाना ख्‍याया़ टेहपा काहङज्‍ये येह। ए नाहरे ङुहएँया़! ख्‍या काहजे सोनाम-साक्‍पु, च्‍यिबेमाना ख्‍याया़ क़ेहमु क्‍याहप्‍च्‍ये येह।”

22 “ख्‍या काहजे सोनाम-साक्‍पु, मिहगी स़ेबुगी तेहन्‍दाला मिहया़गी ख्‍याया़ला नाम्‍दो पेहच्‍ये येह, ओहले छ्यु च्‍येच्‍ये येह, ओहले स्‍ये़हन्‍डील पेहच्‍ये येह, ओहले ङ्येहन्‍दा ने़दी ख्‍याया़दी मिहनला स्‍याहम्‍डेन तेन्‍ज्‍ये येह।

23 ओहले ओ़ह ती़हजीला ख्‍या, क़ेहनाङ पेहतोङ, ख्‍या क़ेहनाङगी छ्याम्‍दोङ! च्‍यिबेमाना स्‍यिहङगामला ख्‍याला च्‍याहगा छ्यिम्‍बुच्‍यी ज़्‍या़दी येहबा। तोहङमागी लुहङतेम्‍बाया़ॱलाङ ख्‍याला तुहक्‍पु तेरक्‍यो ओ़ह मिहया़की आख्‍ये मे़हमेया़गी ओ़हठीॱराङ पेहती तुहक्‍पु तेरक्‍यो येहकें!” सुङदी येशूगी सुङ नाङसीन।

24 “ए छ्युक्‍पुया़, ख्‍या काहन्‍डुमु छा़ तुहवा। च्‍यिबेमाना ख्‍यागी क्‍यिपु पेहती तेहकेन्‍गी मिहलीदी चो़ह सिहन्‍सीन।

25 ए ताहन्‍दा टेहपा काहङग्‍योया़, ख्‍या काहन्‍डुमु छा़ तुहवा! तिङले ख्‍या टेहपा तो़बाराङ लिहच्‍ये येह। ए ताहन्‍दा क़ेहमु क्‍याहप्‍केया़, ख्‍या काहन्‍डुमु छा़ तुहवा! च्‍यिबेमाना ख्‍याया़ तुहङाल पेहच्‍ये येह ओहले ङुहज्‍ये येह”

26 “मिह थाम्‍ज्‍यीगी ख्‍याला ख्‍या ज्‍यिबुराङ या़हबु यिहन म़ेदी क्‍या़ज्‍ये येह यिहॱनाङ ख्‍या काहजे छा़ तुहवा! च्‍यिबेमाना ओ़ह ल़ेहमुराङ पेहती खुङया़गी आख्‍ये मे़हमेया़गी ची़हमा लुहङतेम्‍बाया़लाॱआङ ख्‍या ज्‍यिबुराङ या़हबु यिहन म़ेदी क्‍या़क्‍यो येहकें।”


टाहॱलाङ चेवा पेहतोङ
( मत्ती ५:३८-४८ ; ७:१२ )

27 “ङाहगी लोप्‍च्‍युङ ङ्यिहन्‍गेनया़ला ङाहगी माएँ, ख्‍यागी टाहला चेवा पेहतोङ ओहले ख्‍याला ङेन्‍ज्‍येन पेहकेन मिहला या़हबु पेहतोङ।

28 ख्‍याला मे़मु क्‍याहप्‍केनया़ला मेलाम क्‍याहप्‍तोङ ओहले ख्‍याला सुगीॱआङ चोक्‍पा पेहसीमाना खोला या़हबु ओहङज्‍यु म़ेदी किन्‍ज्‍योला सोल्‍वाङ ताप्‍तोङ।

29 सुगीॱआङ ख्‍याला डाम्‍ज्‍या च्‍यी़ क्‍याहप्‍सीन माना लेहमेन डाम्‍बाॱआङ सेहतेर। सुज्‍यीगी ख्‍येगी योल्‍सेन फ्रो़दी ख्‍येर्सीमाना छ्युबाॱआङ ख्‍येर च्‍य़ूदोङ।

30 ख्‍येला लाङगेया़ला तेर्तोङ, ख्‍येगी पेला ख्‍येर्केनया़ला लो़ लाङ माहमा।

31 मिहया़गी ङाहला दि ल़ेहमु छ्याप्‍स्‍यी पेह तेर्ना ओहङज्‍ये येहकें म़ेदी राहङगी सेमला ने़गे ल़ेहमु ख्‍येगीॱआङ मिहया़ला पेहतोङ।”

32 “चेवा पेहकेन्‍दीला च्‍यी़राङ चेवा पेहसीमाना ख्‍याला च्‍यि ख्‍येप्‍साङ काहल्‍बा ले? तिहक्‍च्‍येम्‍बाया़गीॱआङ राहङला चेवा पेहकेनया़ला ओ़ह ल़ेहमुराङ पेहकें।

33 या़हबु पेहकेनया़ला च्‍यी़राङ या़हबु पेहसीमाना ख्‍याला च्‍यि ख्‍येप्‍साङ ले? दि ल़ेहमुनी तिहक्‍च्‍येम्‍बा मिहया़गीॱआङ पेहकें।”

34 “ख्‍येगी पेहलेन च्‍याल ख़ूएँगी मिह च्‍यी़लाॱराङ पेहलेन तेर्सीमाना ख्‍येला च्‍यि ख्‍येप्‍साङ ले? दि ल़ेहमुनी येहपाराङ ओहजेराङ ज्‍योर्के म़ेदी रेहवा पेहकें तिहक्‍च्‍येम्‍बाया़गी तिहक्‍च्‍येम्‍बाया़ला पेहलेन तेर्के।”

35 “आहन्‍डा मिहम्‍बा, ख्‍येगी राहङगी टाहॱलाङ चेवा पेहतोङ, ओहले खुङया़ला या़हबु पेहतोङ, लो लेहन्‍गेन्‍गी रेहवा माहबेबा पेहती पेहलेन तेर्तोङ। दि रोहवा पेहसीमाना ख्‍येला च्‍याहगा छ्यिम्‍बुच्‍यी ज्‍योर्च्‍ये येह, ख्‍ये वाङज्‍या छ्यिम्‍बु जेती ज़्‍य़ू नाङगेन किन्‍ज्‍योगी छार्क्‍यीन ओहङज्‍ये येह। किन्‍ज्‍योगी गिन म़ेहबा दाङ मिह ङ्येहम्‍बालाॱआङ थुज्‍यी ज़ी़ नाङगे।

36 स्‍यिहङगामला ज़्‍यू़गेन ख्‍येगी याहप्‍च्‍येन आबागी निङज्‍यी जेकें ल़ेहमुराङ, ख्‍याॱआङ निङज्‍यी पेहकेन ओहङ कोहएँ” सुङदी येशूगी सुङ ख्‍येप्‍टा नाङसीन।


मिहला क्‍येन माहता
( मत्ती ७:१-५ )

37 “ओहले लो़हलो मिहया़ला ठिम माहताङ, ओहले किन्‍ज्‍योगी ख्‍याॱलाङ ठिम ताङ नाङज्‍ये म़ेह। राहङसा मिहया़ला क्‍येन माहता, ओहले किन्‍ज्‍योगी ख्‍याॱलाङ क्‍येन ता़ नाङज्‍ये म़ेह। लो़हलो मिहया़ला कोहङदा तेर, ओहले किन्‍ज्‍योगी ख्‍याॱलाङ कोहङदा नाङज्‍ये येह।

38 तेर्तोङ, ओहले ख्‍याॱलाङ ज्‍योर्च्‍ये येह। मिहया़गी साप्‍ती-साप्‍ती, युङदी काहङदे फो़गे थु ख्‍यागी खुमाला ल़ू तेर्च्‍ये येह। च्‍यिबेमाना ख्‍यागी मिहला का़हन्‍दी ठुगी ताहप्‍ते तेर्के, ओ़ह ठुला ख्‍याया़गीॱआङ लो़ ज्‍योर्च्‍ये येह।” सुङदी येशूगी सुङ ख्‍येप्‍टा नाङसीन।

39 ओहले येशूगी पे ज़्‍या़दी सुङ नाङसीन, “मी़ मेहथोङगेन मिहगी लेहमेन मी़ मेहथोङगेन मिहला ॱठि ख़ूएँ ले? का़हलेॱआङ ठिसीमानानी खुङ ङ्यिकाराङ ओमला बोक स्‍य़ूहगे।

40 ओहले येहपाराङ, सुॱआङ लोप्‍टु लोबेन म़ेदी छ्यिम्‍बु ओहङ ख़ूएँ ले? यिहॱनाङ, लोप सिहन फान्‍ज्‍योनी लोबेन ल़ेहमुराङ डो ख़ूएँ।”

41 “येहपाराङ, राहङदी नो़हगी मी़ला जेम स्‍य़ूहक्‍योदी थोङगे, च्‍यिबे राहङगी मी़ला गाल्‍बा स्‍य़ूहक्‍योदी मेहथोङगे?

42 राहङगी मी़ला गाल्‍बा स्‍य़ूहक्‍यो माहथोङ फान्‍ज्‍योनी ख्‍येगी नो़हला, ‘केरे, केरे, ख्‍येगी मी़ला स्‍य़ूहक्‍योगी जेम तेन्‍ज्‍ये!’ म़ेदी काहन्‍डुमु पेहती मा ख़ूएँ? ए ज्‍याप्‍ला तेन्‍गेनया़! तोहङले राहङगी मी़ला स्‍य़ूहक्‍योगी गाल्‍बा तेन्‍दोङ, ओहले ख्‍येगी नो़हगी मी़ला स्‍य़ूहक्‍योगी जेम तेन तेर्च्‍येला साल्‍बु थोङगे!” सुङदी येशूगी सुङ ख्‍येप्‍टा नाङसीन।


सेदो त़ेदी तोहङबो ह्‍अ कोहएँ
( मत्ती ७:१६-२० ; १२:३३-३५ )

43 “या़हबु तोहङबोला सेदो चोक्‍पा या़ह मी़हखुएँ ओ़ह ल़ेहमुराङ चोक्‍पा तोहङबोॱलाङ या़हबु सेदोया़ या़ह मी़हखुएँ।

44 सेदो त़ेदी तोहङबो ह्‍अ कोह ख़ूएँ। छेर्मा तोहङबो नाहङले को़स्‍यीङ मी़ह-ट़ूहएँ, ओहले ङ्या़हलाङ तोहङबोलेगी कुहन्‍डुम ट़ूह मी़हखुएँ।

45 मिह या़हबुगी राहङगी सेमला येहकेन्‍गी या़हबु से़हगी चाहङलेगी या़हबु से़हराङ तेन्‍गे। मिह चोक्‍पागी राहङगी सेमला येहकेन्‍गी चोक्‍पा से़हगी चाहङलेगी चोक्‍पा से़हराङ तेन्‍गे च्‍यिबेमाना मिहगी सेमला च्‍यि येहबा ओ़ह तामॱराङ मिहगी माएँ!” सुङदी येशूगी सुङ ख्‍येप्‍टा नाङसीन।


खाङबा ङ्यी़गी पे
( मत्ती ७:२४-२७ )

46 “ङाहगी माक्‍यो ल़ेहमुराङ मेहबेसीमाना ख्‍यागी ङाहला च्‍यिबे ‘चो़वो छ्येवा, चो़वो छ्येवा’ म़े तेहकें?

47 ङाहसाला ओहङदी ङाहगी ताम ङ्यिहन्‍गे ओहले ङाहगी माक्‍यो ल़ेहमुराङ पेहकेन मिहदी, काह-ठि ओहङगे माएँदी ङाहगी ख्‍याला स्‍येकें–

48 खो, खाङबा ज़ोएँ मिह ल़ेहमुराङ यिहम्‍बा खोगी तिहङ रिहङबु क़ेदी खाङबागी ब्राम तोह-पा़रा थो़ला तिङसीन। ओहले नाम छ्याटा क्‍याहप्‍ती स्‍योलो छ्यिम्‍बुच्‍यी ओहङदीॱआङ ब्राम सान्‍दी तिङग्‍यो सोङगोराङ ओ़ह खाङबा माहरोहम।

49 यिहॱनाङ ङाहगी ताम थे़दीॱआङ मिहङ्यीहन्‍गेन्‍दी ब्राम माहतीङबा पेहती खाङबा ज़ोएँ मिह ल़ेहमु यिहम्‍बा। स्‍योलो ओहङगेमु खोगी खाङबा रिहल्‍दी छ्या़मे-स्‍यी़हमे काहल्‍सीन।”

© 2023 (Active), Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ