लूका 4 - ह्योल्मोती़ह गो-छ्येवागी येशूला ङ्याहम्ज्यी पेहक्यो ( मत्ती ४:१-११ ; मर्क १:१२-१३ ) 1 ओहले येशू नाम्पार-ताहक्पा थुगी काहङदे यर्दन चाङबुलेगी लो़ह फेप्सीन। ओहले नाम्पार-ताहक्पा थुगी येशूला रिह-काम्बुला नोम फेप्सीन। 2 रिह-काम्बुला ज़्य़ूगेमु ती़ह गो-छ्येवागी येशूला ङ्यिहमा ज़्यिप्च्यु थु छेता पेहती तिहक्पाला छ्यि च्य़ूज्ये छोल्सीन। येशू ओ़ह ङ्यिहमा थु च्यिॱआङ माहछ्येपा जेती ज़्य़ूक्यो सोङगोराङ छ्याल ज्यिबुराङ टे़दी येहकें। 3 ओहले ती़ह गो-छ्येवागी येशूला मासीन, “तेहम्बाराङ राहङ किन्ज्योगी स़ेबु यिहन्सीमाना दि तोहला खुरा डोज्यु म़ेदी सुङ नाङदोङ, ओहले खुरा डोज्ये येह!” 4 ओहले येशूगी सुङ नाङसीन, “साहएँ स़ेह च्यी़गीराङ मिह थार्कें मिहम्बा” म़ेदी सुङरापला प्री़हदी येहबा! 5 ओहले ती़ह गो-छ्येवागी येशूला काहङ थोम्बु च्यी़ला ख्येर्ती याहम्बीज्यीलाराङ जाम्बुलीङगी क्याहल्सी थाम्ज्यी तेन्दी मासीन, 6 “ङाहगी राहङला दि थाम्ज्यीराङ क्याहल्सीगी क्याहल्बु ओहले दि थाम्ज्यी क्युह-नोहरगी ताहक्पु ज़ो ख़ूएँ च्यिबेमाना दि थाम्ज्यी ङाहगी लाहक्पाला येहबा ओहले ङाहगी सेम थेप्केया़ला तेर ख़ूएँ। 7 राहङगी ङाहला छ्या़ छाल्सीमाना दि थाम्ज्यी राहङदीराङ ओहङज्ये येह” म़ेदी ती़ह गो-छ्येवागी मासीन। 8 ओहले येशूगी, “‘ख्येगी राहङगी चो़वो छ्येवा किन्ज्यो च्यी़लाॱराङ ज्याल्दोङ ओहले चो़वो छ्येवा किन्ज्यो च्यी़लाॱराङ स्याहप्तो स्यी़हदोङ’ म़ेदी सुङरापला प्री़हदी येहबा!” म़ेदी सुङ नाङसीन। 9 ओहले येहपाराङ ती़ह गो-छ्येवागी येशूला यरूशलेमला ख्येर्सीन, ओहले छ्योखाङगी चेला ख्येर्ती मासीन, “तेहम्बाराङ राहङ किन्ज्योगी स़ेबु यिहन्सीमाना दिलेगी माहर फिर छ्योङ क्याहप नाङदोङ!” 10 च्यिबे मासीमाना, किन्ज्योगी छ्य़ेला दि ल़ेहमु प्री़हदी येहबा, “किन्ज्योगी राहङला थार च्य़ू नाङज्येला राहङगी स्यिहङगामकी स्याहप्च्यीया़ला कुल नाङज्ये येह, 11 ओहले राहङगी स्याहप तोहला माहफो़बा तोहङलेराङ खुङया़गी राहङला छ्या़-छया़लाराङ सेह नाङज्ये येह।” 12 ओहजेला येशूगी ल़ेहन क्याहप नाङसीन, “छ्य़ेला दि ल़ेहमुॱआङ प्री़हदी येहबा– ‘ख्येगी चो़वो छ्येवा किन्ज्योला ङ्याहम्ज्यी माहबे!’” 13 ती़ह गो-छ्येवागी येशूला च्यि पेहतीॱआङ तिहक्पाला छ्यि च्य़ू मा़हखुबा सुङबे येहपाराङ च्याह मा़हन्डी थु येशूला क्युर ज़्या़दी काहल्सीन। येशूगी राहङगी छ्या़ले गालील साने़ला छ़ू नाङग्यो ( मत्ती ४:१२-१७ ; मर्क १:१४-१५ ) 14 ओहले येशू नाम्पार-ताहक्पा थुगी ओङ ज्योर्ती गालीलला लो़ह फेप नाङसीन। ओहले येशूगी तेहन्दाला साहर-सुहरकी थाम्ज्यीराङ दे-खामया़ला फेल्सीन। 15 ओहले येशूगी छो़खाङया़ला फेप्ते सुङ ख्येप्टा नाङसीन, ओहले मिह थाम्ज्यीगीराङ येशूला तेपा फुल्सीन। नासरतकी मिहया़गी येशूला यिह मा़हछ्येबा ( मत्ती १३:५३-५८ ; मर्क ६:१-६ ) 16 ओहले येशू राहङ छारक्यो युहल नासरतला फेप नाङसीन। ओहले तोहङमा ल़ेहमुराङ जेती थाङ सोएँ ङ्यिहमाला छो़खाङला फेप नाङसीन। ओहले येशू छ्य़े टा़हज्येला ज़्याङ नाङसीन। 17 येशूला यशैयागी प्रुहक्योगी छ्य़े टा़ह नाङज्येला फुल्सीन। ओहले छ्य़े खा फ़ेदी येशूगी दि ल़ेहमु प्रुहक्योगी ग्या़ तेन्दी टा़ह नाङसीन 18 “चो़वो छ्येवा किन्ज्योगी थु ङाह ङ्याम्बु ज़्य़ू नाङदी येह, प्राङबुया़ला या़हबु लेहङगु स्येतोङ सुङदी किन्ज्योगी ङाहला दाम्दी ताङ नाङग्यो यिहम्बा, ताहम्दी ज़्या़क्योया़ला स्यी़ तेर्च्येला, मी़ मेहथोङगेनया़ला मी़ थोङ च्य़ूज्येला, नेम्दी ज़्या़क्योया़ला लाहङ च्य़ूज्येला, 19 ओहले चो़वो छ्येवागी राहङगी मिहया़ला थार्पा नाङगेन ती़हजी लेप्सीन म़ेदी ख्येप्टा ताङज्येला चो़वो छ्येवा किन्ज्योगी ङाहलाराङ दाम नाङदी येह।” 20 ओहले येशूगी छ्य़े टिल्दी स्याहप्च्यी च्यी़ला नाङदी येशू ज़्य़ू नाङसीन। ओ़हला येहकें मिह थाम्ज्यीगी येशूला त़ेदी तेहक्यो येहकें। 21 ओहले येशूगी खुङया़ला सुङ नाङसीन, “ख्यागी ङ्यिहन्ग्योगी सुङरापगी सुङ तिहरीङ ङाहगी माएँ माएँमुराङ तेहन्दा डुप्ते येह!” 22 ओहले मिह थाम्ज्यीगीराङ येशूला तेपा फुल्सीन। येशूगी काटीनगी काहङग्योगी स्याहल थे़दी खुङ ह्अ ल़ेहसीन। ओहले च्यी़गी च्यी़ला मामा चे़दी, “दिनी योसेफकी पुह मिहम्बा ले?” 23 ओहले येशूगी सुङ नाङसीन, “ङाहला क्यी़ह येह, ता़हनी ख्यागी ङाहला दि पे ज़्या़दी माज्ये येह– ‘ए आम्ज्यी, तोहङले राहङगी राहङला टा़ह च्य़ूदोङ! राहङगी कफर्नहुम ठोमला छ्या़ले छ्यिम्बु जेक्योदी ङ्यिहगी थ़ेसीन। तेहम्बाराङ यिहन्सीमानानी राहङगी फायुला आङ ओ़ह ल़ेहमुराङ याहम्जेन छ्यिम्बु छ्या़ले जे नाङदोङ!’” 24 ओहले येशूगी सुङ नाङसीन, “तेहम्बाराङ ङाहगी ख्याला माएँ, सुज्यीॱआङ लुहङतेम्बाला खो राहङगी क्येसा फायुगी मिहया़गी चा़ मेहबेएँ। 25 तेहम्बाराङ ङाहगी ख्याला माएँ, लुहङतेम्बा एलियागी ती़हजीला लोह फेदाङ ज़्यि थु नाम माहक्याहप्पा पेहती ज्यिबुराङ मुहयी क्याहप्केमु इस्राएल क्याहल-खापला ह्युग्मो माहङबुराङ येहकें। 26 यिहॱनाङ, किन्ज्योगी एलियाला सीदोन लुहङबागी पोहला येहकें सारपत युहलला तेहकें ह्युग्मो च्यी़साला च्यी़राङ ताङ नाङसीन। 27 लुहङतेम्बा एलीशागी ती़हजीला इस्राएल क्याहल-खापला जे थेन्ग्योगी मिह माहङबुराङ येहकें। यिहॱनाङ, एलीशागी सिरिया क्याहल-खापगी नामान च्यी़लाॱराङ टा़ह च्य़ू नाङसीन लेहमेन सुॱलाङ टा़ह च्य़ू माहनाङ।” 28 येशूगी दि स्याहल थे़दी छो़खाङगी मिह थाम्ज्यी ज्यिबुराङ स्यिहताङ लाहङसीन। 29 ओहले ह्अप-ह्ओप लाहङदी येशूला फुल्ज्या-फुल्ज्या क्याहप्ती युहललेगी फिला तेन्सीन। नासरत युहल काहङदोला येहकें, ओहले येशूला प्रा़हले माहर फुल चाहङज्ये म़ेदी प्रा़ह खा-खा थु लेप काहल्सीन। 30 यिहॱनाङ येशू मिह मिह-माहङ नाहङले थेन्दी राहङगी लाहम स्य़ूह नाङसीन। येशूगी ल्हेन्डी स्य़ूहक्यो मिहला टा़ह च्य़ू नाङग्यो ( मर्क १:२१-२८ ) 31 ओ़ह तिङले येशू गालील साने़की कफर्नहुम माएँ क्याहसाला फेप नाङसीन। नाम्पार-ताहक्पा थाङ सोएँ ङ्यिहमु मिहरोगी मिहया़ला सुङदेन नाङगो येहकें। 32 ओहले येशूगी खाम छ्यिम्बु जेती सुङदेन नाङग्यो सुङबे मिहया़ ह्अ ल़ेहसीन। 33 छो़खाङला ल्हेन्डी स्य़ूहक्योगी मिह च्यी़ येहकें, ओहले खोगी फे़रा तेन्दी मासीन, 34 “ओ़ नासरतकी येशू, राहङ ङ्यिहला च्यि जेच्ये म़ेदी फेप नाङग्यो? राहङ ङ्यिहला तोङ च्य़ूज्येला फेप नाङग्यो यिहम्बा? राहङला ङाहगी ङोह स्य़ेएँ, राहङ किन्ज्योगी ताङ नाङग्योकी नाम्पार-ताहक्पा स़ेबु यिहन!” 35 ओहले येशूगी, “खाजुम तेह, ख्ये दि मिहलेगी थेन्दी सोङ!” म़ेदी खोला काप्क्येन नाङसीन। ओ़हजेलाराङ ल्हेन्डीगी ओ़ह मिहला मिहया़गी पाहरक्यीला च्यार-ताप क्याहप्ती, खोला च्यिॱआङ नाहन्दी माहताङबा पेहती, ल्हेन्डी ओ़ह मिहलेगी थेन्दी काहल्सीन। 36 दि थोङदी मिह थाम्ज्यीराङ ह्अ ल़ेहदी मासीन, “मिहम्बा, दि च्यि यिहम्बा? मिहरोगी स्याहलनी काहन्डुमु खाम छ्यिम्बु दुबा! मिहरोगी खाम छ्यिम्बु जेती काप्क्येन नाङगु दु, ओहले मेहचाङा नाम्स्यीया़गीॱआङ ङ्यिहन्गु दु!” म़ेदी मिहया़गी मामा चासीन। 37 ओहले येशूगी जे नाङग्योकी छ्या़लेगी तामया़ ग्यो़बाराङ कफर्नहुम दे-खामकी साहर-सुहरकी युहलया़ला टाहम्सीन। येशूगी नेहपा माहङबुलाराङ टा़ह च्य़ू नाङग्यो ( मत्ती ८:१४-१७ ; मर्क १:२९-३४ ) 38 छो़खाङलेगी थेन्दी येशू सिमोन-पत्रुसकी खाङबाला फेप नाङसीन। ओहले सिमोन-पत्रुसकी क्यू़हमु छावा माहङबुराङ क्ये़दी ङ्याहल्साला छ्यिती येहकें। ओहले खाङबागी मिहया़गी, “मोहला टा़ह च्य़ू नाङदोङ ला़ह” म़ेदी स्युहसीन। 39 ओहले येशू नेहपागी पोहला फेप्ते छावाला काप्क्येन नाङसीन। ओ़हजेलाराङ मोहला छावागी ताङसीन, ओहले मोह लाहङदी खुङ फे़बेया़ला डोम्बो क्योङसीन। 40 ङ्यिहमा डुप्च्ये पेहकेमु मिहया़गी यिहन्जेराङ नेहपाया़ येशूसाला ख्योङसीन। ओहले येशूगी नेहपा रे़ह-रे़हगी थो़ला छ्या़ ज़्या़दी टा़ह च्य़ू नाङसीन। 41 मिह माहङबुलेगीराङ ल्हेन्डीया़ थेन्दी डोएँमु, “राहङ किन्ज्योगी स़ेबु यिहम्बा!” म़ेदी क़े तेन्सीन। ओहले येशूगी ओ़ह ल्हेन्डीया़ला काप्क्येन नाङदी तामॱराङ मा च्य़ू माहनाङ, च्यिबे मासीमाना येशू किन्ज्योगी ताङ नाङग्योगी थार्पा थोप च्य़ू नाङगेन मास्यीका यिहन म़ेदी ओ़ह ल्हेन्डीया़गी ङोह स्ये़उ येहकें। येशूकी छ्या़लेगी तेहन्दा ( मर्क १:३५-३९ ) 42 नाहङबार ङ्यिहमु ङाटु क्या-ह्राबा-ह्रिबेलाराङ येशू ज़्याङदी क्याहसालेगी थेन्दी रिह-काम्बुला फेप नाङसीन। ओहले मिहया़गी येशूला छोल्दे काहल्सीन। ओहले येशूला च्य़ेह सिहन फान्ज्यो खुङया़गी, “ङ्यिहया़ला क्युर ज़्या़दी फेप माहनाङ!” म़ेदी ला़ खाजे स्युहसीन। 43 ओहले येशूगी सुङ नाङसीन, “ता़ह ङाहगी किन्ज्योगी क्याहल्सीगी या़हबु लेहङगु लेहमेन ग्या़या़ॱलाङ स्येॱराङ कोहएँ च्यिबेमाना ङाह दिगी तेहन्दालाराङ ताङ नाङग्यो यिहम्बा।” 44 ओहले येशू यहूदीया लुहङबागी छो़खाङया़ला फेप्ते सुङ ख्येप्टा नाङज्ये छ़ूसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.