लूका 21 - ह्योल्मोह्युग्मोगी किन्ज्योला डेल्बा फुल्ग्यो ( मर्क १२:४१-४४ ) 1 ओहले येशूगी छ्योखाङ नाहङला फार छुर ज़ी़ नाङगेमु मिह छ्युक्पुया़गी डेल्बा फुल्गेन काहमला डेल्बा फुल तेहक्यो ज़ी़ नाङसीन। 2 ओहले ह्युग्मो प्राङबुज्यीगीॱआङ ओहङदी ओ़ह काहमला साहङमागी टाङगा ङ्यी़ ल़ूगे ज़ी़ नाङसीन। 3 ओहले येशूगी सुङ नाङसीन, “तेहम्बाराङ ङाहगी ख्याया़ला माएँ, लेहमेन मिहया़गी म़ेदी दि ह्युग्मो प्राङबुगी टाङगा माहङबु फुल्ग्यो येह। 4 च्यिबेमाना लेहमेन मिहया़गीनी राहङला बोल्बु काहल्ग्यो क्युहलेगी डेल्बा फुल्सीन, दि ह्युग्मो प्राङबुगीनी राहङगी क्याहबे ङ्ये़हदी साह कोहएँगी टाङगा थाम्ज्यीराङ फुल्सीन” म़ेदी येशूगी सुङ नाङसीन। छ्योखाङ तोङदी डोएँगी तेहन्दाला येशूगी सुङदेन नाङग्यो ( मत्ती २४:१-१४ ; मर्क १३:१-१३ ) 5 लाहला स्याहप्च्यीया़गी, “तोह या़हबु या़हबुगी ज़ोक्यो दाङ मिहया़गी फुल्ग्योगी छ्येपा पेलाया़गी ज़ाप्क्योगी छ्योखाङ काहन्डुमु या़हबा!” म़ेदी ताम म़ेदी तेहक्यो येहकें। 6 ओहले येशूगी सुङ नाङसीन, “ङ्यिहन्दोङ, दि ल़ेहमु ती़हजी च्यी़ॱआङ लेप्च्ये येह, ओ़ह ती़हजीला ख्यागी देला थोङगेन्गी तोह च्यी़ थो़ला लेहमेन तोह लिहच्ये म़ेह!” 7 ओहले स्याहप्च्यीया़गी, “लोबेन ला़ह, दि नाहम ओहङगे? ओ़ह केच्या तेहन्दा डुप्च्ये पेहसीन म़ेदी ङ्यिहगी काहन्डुमु पेहती ङोह स्य़े ख़ूज्ये?” म़ेदी स्युहसीन। 8 ओहले येशूगी सुङ नाङसीन, “जेम्बु पेहतोङ, सुज्यीगीॱआङ ख्याला गो़ कोर माहङ्युहङज्यु च्यिबेमाना मिह माहङबुगीराङ ङाहगी मिहन तेन्दी, ‘ङाहराङ थार्पा थोप च्य़ूगेन्गी मास्यीका यिहम्बा।’ ओहले, ‘काल्बा तोङगेन ती़हजी ता़हनी लेप्च्येराङ पेहसीन’ म़ेदी मा ओहङज्ये येह। खुङगी तिङ ङ्यादी माहन्डो। 9 मा़ क्याहप्के दाङ ठ़ूस्यी सिहङदा पेहकें तामया़ थे़एँमु मा़हन्ज्यी। दि ल़ेहमु केच्यानी ओहङॱराङ कोहकें, यिहॱनाङ ओहजेलाराङनी जाम्बुलीङ तोङज्ये म़ेह” म़ेदी येशूगी सुङ नाङसीन! 10 ओहले येहपाराङ येशूगी सुङ नाङसीन, “क्यिहपा च्यी़गी च्यी़ला मा़ क्याहप्च्ये येह, क्याहल-खाप च्यी़गी च्यी़ला च्योम्ज्ये येह। 11 छ्यिम्बु-छ्यिम्बु साङगुलया़ ओहङज्ये येह, छ्यो़ काहने थेतेराङ मुहयी लाहङज्ये येह, नाहजा चोक्पा चोक्पाया़ क्याहप्च्ये येह, ओहले नामला ज्यी़ज्ये ल़ेहमु से़हया़ थोङज्ये येह। 12 दि केच्याया़ ओहङगे म़ेदी तोहङलेराङ ख्यागी ङाहला यिह-छ्य़े पेहक्यो सोङगोराङ, मिहया़गी ख्याला तुहक्पु तेर्च्ये येह, ज़ुङज्ये येह, छो़खाङया़गी गोबासाला ख्येर्ती ठिम ताङदी चोन-खाङला लू़ज्ये येह, क्याहल्बु दाङ स्युहङ-पेन छ्यिम्बुया़गी दिनला लाहङ च्य़ूज्ये येह। 13 ओहजेला ख्याला ङाहगी तेहन्दाला स्येच्येला लोहङ ज्योर्च्ये येह। 14 ओहलेगी थार्च्येला च्यि मा कोहएँ म़ेदी तोहङले तुहङाल माहबेबा पेहती सेम ज़ुङदी तेह! 15 ङाहगीराङ ख्याला रिहक्स्यीगी काहङ च्य़ूदी मा कोहएँगी तामया़ ओ़हजेलाराङ ङोह स्य़े च्य़ूज्ये येह, ओहले ख्यागी टाहया़गी खाला खाप्ज्यु क्याहप्च्ये येह। 16 राहङगी आबा-आमा, आदा-नो़ह, ङ्येन्जेन-ङ्येहवाया़गीॱआङ ख्याला ज़ुङ च्य़ूज्ये येह। ओहले ख्या पाहरक्यीला रे़हरेलानी खुङया़गी सेॱआङ सेच्ये येह। 17 ङाहगी मिहनगी पेहती थाम्ज्यीगीराङ ख्याला ङेन्ज्येन पेहच्ये येह। 18 यिहॱनाङ, ख्यागी टा क्युहङबाज्यीॱआङ साला जार्च्ये म़ेह। 19 सेम माहङग्युर्पा पेहती तेहतोङ, ओहले ख्यागी तेहन्दामगी मिहली ज्योर्च्ये येह” म़ेदी येशूगी सुङ नाङसीन। यरूशलेम तोङगेन्गी तेहन्दाला सुङ नाङग्यो ( मत्ती २४:१५-२१ ; मर्क १३:१४-१९ ) 20 “टाहया़गी यरूशलेम क्याहसाला कोर्के ख्यागी थोङ फान्ज्यो क्याहसा तोङगे ती़हजी लेप्च्ये पेहसीन दु म़ेदी ङोह स्ये़दोङ। 21 ओहजेला यहूदीया लुहङबाला तेहकेन्गी मिहया़ लाह ङो़ले प्रे़हज्यु, क्याहसा नाहङला येहकेनया़गी क्याहसा क्युर ज्य़ा़ज्यु ओहले युहलला येहकेनया़ क्याहसाला मा़हस्युहज्यु। 22 च्यिबेमाना, ओ़हदीॱराङ ङ्य़ेहबा फो़एँगी ती़हजी यिहम्बा, ओहले सुङरापला प्रुहक्योगी केच्या थाम्ज्यीराङ तेहन्दा डुप्च्ये येह। 23 ओहजे काहङला ज़ुबु ङ्यिहपा येहकेन दाङ पेहजा ल़ेनु येहकेन्गी आमाया़ला ज्यिबुराङ खेन्दा-का़हबु ओहङज्ये येह। जाम्बुलीङला छे म़ेहबागी तुहक्पु ओहङज्ये येह। किन्ज्योगी ङ्य़ेहबा दि क्यिहपाया़गी थो़ला कल नाङज्ये येह 24 टाहया़गी दि क्यिहपागी मिहया़ला पादाङगी तुप्ती सेच्ये येह, रेहरेला ताहम्दी लेहमेन लेहमेन क्याहल-खापया़ला ख्येर्च्ये येह। ओहले लेहमेन क्यिहपागी ङ्यिहमा माहछाङ थु टाहया़गी यरूशलेम क्याहसाला काङबागी नेम्दी ज़्या़ज्ये येह।” मिहगी पुह फेप नाङगेन्गी तेहन्दाला ( मत्ती २४:२९-३१ ; मर्क १३:२४-२७ ) 25 “ङ्यिहमा, दायुम दाङ कार्माया़ला याहम्जेम्बागी ताक्छेनया़ थोङज्ये येह। ओहले छो-क्याहम्जोकी छ्युया़ ल्हा़बा लुङजीगी फार छुर याप्ती ज्यी़ज्ये ल़ेहमु क़े तेन्गे थे़गेमु मिहया़ ज्यी़दी थामा थोमे लिहच्ये येह। 26 ता़हनी जाम्बुलीङला च्यि ओहङडो म़ेदी ज्यी़सुगी मिहया़ का क्याहल्ज्ये येह। च्यिबेमाना नामगी ओङज्या छ्यिम्बुया़ युहङज्ये येह। 27 ओ़ह तिङले मिहगी स़ेबु मुक्पाला ओङज्या छ्यिम्बु दाङ ज़िज्यिद ङ्याम्बु फेप्केराङ जेक्यो थोङज्ये येह। 28 ओहले दि ल़ेहमु से़हया़ ओहङगे ती़हजीला ख्याया़ लाहङदी राहङगी गो़ याहर क्या़दोङ, च्यिबेमाना ख्याया़गी थार्पा पोहलाराङ लेप्ते येह।” को़स्यीङ तोहङबोले सुङदेन नाङग्यो ( मत्ती २४:३२-३५ ; मर्क १३:२८-३१ ) 29 ओहले येशूगी दि पे ज़्या़दी सुङ नाङसीन, “को़स्यीङ तोहङबो दाङ लेहमेन तोहङबोया़ला त़ेदोङ, 30 ओ़ह तोहङबोया़ला लाहप्ती बी़गे थोङ फान्ज्यो ख्याया़गी ता़ह छेपा दावा लेप्च्ये पेहसीन दु म़ेदी ह्अ कोहकें। 31 ओ़ह ल़ेहमुराङ पेहती दि केच्याया़ तेहन्दा डुप्केन थोङ फान्ज्यो किन्ज्योगी क्याहल्सी पोहला लेप्च्ये पेहक्यो दु म़ेदी ख्यागी ङोह स्ये़ज्ये येह। 32 ङाहगी ख्याया़ला तेहम्बाराङ माएँ, ओ़ह केच्या थाम्ज्यीराङ तेहन्दा माहन्डुप थु दि (इस्राएली) क्यिहपागी मिहया़ तोङज्ये म़ेह। 33 नाम दाङ जाम्बुलीङ तोङदी डोज्ये येह, यिहॱनाङ ङाहगी माक्योगी तामया़ नाहमॱआङ तोङज्ये म़ेह!” म़ेदी येशूगी सुङ नाङसीन। जेम्बु पेहती तेहतोङ 34 “ओ़ह सोङबे ख्या जेम्बु पेहते तेहतोङ। माहङबु डेनया़ला माहन्डो, ज़ी़दी माहतेह ओहले मिहलीगी तेहन्दाला तुहङाल माहबे। मिहन्सीमाना ओ़ह ङ्यिहमा ख्या थो़ला याहङमे-याहङ मिता सिहन्गे ल़ेहमुराङ ओहङज्ये येह। 35 च्यिबे मासीमाना, ओ़ह ङ्यिहमा जाम्बुलीङला तेहकेन मिह थाम्ज्यीगी थो़ला बाप्च्ये येह। 36 ओ़ह सोङबे जेम्बु पेहती तेहतोङ, दि ज्यिक्पा थाम्ज्यी ङो़ले थार्ते ख्या मिहगी स़ेबुगी दिनला मा़हन्ज्यीबा पेहती लाहङ ख़ूज्यु म़ेदी नाहम-माना किन्ज्योला सोल्वाङ ताप्ती तेहतोङ!” म़ेदी येशूगी सुङ ख्येप्टा नाङसीन। 37 ओहजे ती़हजीला येशू ङ्यिहमा-टाहङमाराङ छ्योखाङला सुङदेन नाङगो येहकें, ओहले नुहङमुदी जैतून काहङला ज़्य़ूज्येला फेप नाङगो येहकें। 38 ओहले मिहया़ येशूगी सुङदेन ङ्यिहन्ज्ये म़ेदी नाहम-सेमुराङ छ्योखाङला जोम ओहङगो येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.